بەيسەنبى, 28 ناۋرىز 2024
بارەكەلدى! 6965 14 پىكىر 23 مامىر, 2019 ساعات 14:09

الاشتىقتارعا تاعزىم ەتۋ ءۇشىن اكىمنىڭ رۇقساتى كەرەك ەمەس

وتكەندە ورىستىڭ «بەسسمەرتنىي پولك» شەرۋىن وتكىزگەن باس قالانىڭ باسشىسى باقىت سۇلتانوۆ «الاشقا تاعزىم» شەرۋىن وتكىزۋگە رۇقسات بەرمەگەن ەدى. "پالەن" دەدى، "پىشتان" دەدى. ءتۇرلى سىلتاۋ ايتتى.

وسىعان بايلانىستى بۇگىن ءماجىلىس دەپۋتاتى، «اق جول» پارتياسىنىڭ توراعاسى ازات پەرۋاشەۆ قازاقستان حالقىنا، قازاق ۇلتىنا قايرىلىپ سويلەپ، بەينە ۇندەۋ جاريالاپتى.

«الاشقا تاعزىم» شەرۋىنە باس قالانىڭ اكىمى، اكىمدىگى رۇقسات بەرمەگەنىن، اكىم رۇقسات بەرمەدى ەكەن دەپ، الاش ارىستارىن، ستالين ساياساتىنىڭ قۇرباندارىن (رەسرەسسيا مەن اشارشىلىق قۇرباندارىن) ۇمىت قالدىرۋعا بولمايتىنىن ايتىپتى. اۋەلى ۇندەۋگە نازار اۋدارايىق... بەينە ۇندەۋدىڭ ءماتىنى مىنە:


قۇرمەتتى قازاقستاندىقتار!

جۋىردا نۇر-سۇلتان قالاسىنىڭ اكىمدىگى، «اق جول» پارتياسىنىڭ ساياسي قۋعىن-سۇرگىن قۇرباندارىن ەسكە الۋ  ءۇشىن «الاشقا تاعزىم» اتتى شەرۋىن وتكىزۋگە  رۇقسات بەرمەدى.

رۇقسات بەرمەۋگە نەگىز بولعان سەبەپتەرى – قىپ-قىزىل وتىرىك. ءبىزدىڭ وتىنىشىمىزدە بارلىق قاجەتتى اقپارات زاڭعا سايكەس كورسەتىلگەن بولاتىن. مەملەكەتتىك ورگانداردى دا تۇسىنۋگە  بولادى: ولار سايلاۋ كەزىندە ءتۇرلى ارانداتۋلار مەن باسسىزدىقتاردان قاۋىپتەنىپ وتىرعان شىعار.

سوندىقتان مىنانى ايتقىم كەلەدى: ەشكىم وتقا ماي قۇيىپ، كوپشىلىكتى اشىندىرۋعا مۇددەلى ەمەس. مەملەكەتتىك ينستيتۋتتاردى السىرەتۋ - ازاماتتاردىڭ وزدەرى ءۇشىن دە، مەملەكەت ءۇشىن دە قاۋىپتى. ۇلتتىق تاۋەلسىزدىگىمىز بەن جەرىمىزدىڭ تۇتاستىعىن ساقتاۋ ءۇشىن مىقتى مەملەكەت كەرەك.

سونىمەن قاتار، ول جاي كۇشتى عانا ەمەس، اركىم، ءوزىنىڭ مۇمكىندىكتەرى مەن قۇقىقتارىن جۇزەگە اسىرا الاتىن، ادىلەتتى دە، وزىق مەملەكەت بولۋى قاجەت.  ونىڭ ىشىندە ءسوز بوستاندىعىنا دەگەن ازاماتتاردىڭ حاقى دا بار.

مەملەكەتتىك ورگاندار، ادامداردى الاڭعا شىعاراتىن ىزا مەن كەك ەمەس، جاقسىلىققا دەگەن ۇمتىلىسى ەكەنىن تۇسىنگەنى ءجون. نارازىلىقتىڭ الدىن الۋدىڭ ەڭ ءتيىمدى جولى - بەلسەندىلەردى قاماۋ ەمەس، ناقتى رەفورمالاردى تەزدەتۋ.

جوعارىدا ايتىلعاندارعا بايلانىستى، مەن: «الاشقا تاعزىم» شەرۋىنە رۇقسات بەرمەسە دە، «اق جول» پارتياسىنىڭ جەتەكشىلەرى مەن دەپۋتاتتارى 31 مامىر كۇنى «الاش» قايراتكەرلەرى مەن قۋعىن-سۇرگىنگە ۇشىراعان اتا-بابالارىنىڭ پورترەتتەرىمەن ولاردىڭ  ەسكەرتكىشىنە بارىپ، گۇل قويىپ، قۇران باعىشتايتىنىن جاريالايمىن.

بۇل شەرۋ دە، ميتينگ تە ەمەس. سوندىقتان ءبىز وسى جولى ەشكىمنەن رۇقسات سۇرامايمىز. ءبىزدىڭ قازاق رەسپۋبليكاسىنىڭ بولاشاعى ءۇشىن قۇربان بولعاندارعا تاعزىم ەتۋگە تولىق كونستيتۋتسيالىق حاقىمىز بار.

نازارلارىڭىزعا راقمەت!

ازات پەرۋاشەۆ

«اق جول» پارتياسىنىڭ توراعاسى


الىپ-قوسارى جوق. ءدوپ ءسوز. ايتىلۋى كەرەكتىنىڭ بارلىعى دەرلىك ايتىلعان. 31 مامىر ساياسي قۋعىن-سۇرگىن مەن اشارشىلىق قۇرباندارىن ەسكە الۋ كۇنى. بۇل ۇلتتىق ازا تۇتۋ كۇنى. ستاليندىك رەپرەسسيانىڭ، قولدان جاسالعان اشارشىلىقتىڭ قۇرباندارىن ەسكە الاتىن، قازاقتىڭ تاۋەلسىزدىگىنىڭ جولىندا شەيىت كەتكەن الاش قايراتكەرلەرىن ۇلىقتايتىن كۇن.

بۇل كۇنى مارقۇمداردى، ولاردىڭ قايراتكەرلىگىن ەسكە الۋ، ولارعا قۇران باعىشتاۋ – بۇل ەشقانداي دا شەرۋ، ياكي ميتينگ ەمەس. بۇل – ءاربىر قازاقتىڭ مىندەتى.

ال وتكەن جولى سۇلتانوۆتىڭ اكىمدىگى بەرگەن رەسمي جاۋاپتا: «قازاقستان رەسپۋبليكاسىندا بەيبىت جينالىستار، ميتينگىلەر، پيكەتتەر جانە شەرۋلەر وتكىزۋ جانە ۇيىمداستىرۋ تۋرالى» قر زاڭىنىڭ تالاپتارىن بۇزۋ جاۋاپكەرشىلىككە اكەپ سوقتىراتىندىعىن ەسكەرتەمىز» دەپ جازىلعان. بۇل جاۋاپتى اقىلدىڭ شەڭبەرىنە سىيزىعا المادىق، راس. سوندا الاش قايراتكەرلەرىن ەسكە الىپ، ولارعا تاعزىم جاساۋ – زاڭ بۇزۋشىلىق پا؟ سۇلتانوۆ، قۇرباندارعا قۇران باعىشتاعان جۇرتتى جاۋاپقا تارتپاق پا؟

;feature=youtu.be

ەندى «الاشقا تاعزىم» شەرۋى تۋرالى رەتىمەن تارقاتىپ جازايىق...

17 ءساۋىر كۇنى «اق جول» پارتياسى نۇر-سۇلتان قالاسىنىڭ اكىمى باقىت سۇلتانوۆقا ۇسىنىس حات جازدى. 31 مامىر كۇنى «الاشقا تاعزىم» شەرۋىن وتكىزۋگە رۇقسات سۇرادى. بۇل تۋرالى 22 ءساۋىر كۇنى «Abai.kz» اقپاراتتىق پورتالىندا «اق جول» «الاشقا تاعزىم» شەرۋىن وتكىزۋدى ۇسىندى» اتتى ماقالا جاريالاندى.

ال 6 مامىر كۇنى اكىمدىك رەسمي جاۋاپ بەردى. دالىرەك ايتساق، اكىم جاۋاپ بەرۋى ءتيىس ماسەلەگە اكىمدىكتىڭ الدەبىر دەپارتامەنتىنىڭ ەشكىم بىلمەيتىن «زامەستيتەلى» جاۋاپ بەردى. ونىسى تاعى جاۋاپ دەۋگە كەلمەيتىن، قىپ-قىزىل وتىرىك. ول تۋرالى «Abai.kz» پورتالىندا جاريالانعان «سۇلتانوۆ «الاشقا تاعزىم» جاساۋشىلاردى جاۋاپقا تارتپاق پا؟» اتتى ماقالادا ەگجەي-تەگجەيلى باياندالعان.

وسىدان كەيىن 9 مامىر كۇنى تاۋەلسىز قازاقستاننىڭ استاناسىندا قىلىشىنان قان تامعان كەڭەستىڭ قاندى جالاۋىن جەلبىرەتىپ، قازاققا قارسى قانقاساپ جاساعان يوسيف ءستاليننىڭ پورترەتتەرىن قۇدايىنداي توبەلەرىنە كوتەرگەندەر الاۋلاتىپ-جالاۋلاتىپ شەرۋ وتكىزدى. استانادا 25 مىڭ ادام قاتىستى. شەرۋشىلەردىڭ سانى  رەسپۋبليكا بويىنشا 160 مىڭنان اسىپ جىعىلادى. شىرىگەن جۇيەنىڭ شەرۋى تۋرالى«Abai.kz» پورتالىندا «قازاقستان «ۇلىدەرجاۆالىق شوۆينيزم شوۋىنىڭ» ساحناسىنا اينالدى» اتتى ماقالا جاريالاندى.

سونىمەن، كرەملدىڭ يدەولوگيالىق پروپوگانداسىنىڭ قۇرالىنا اينالعان «بەسسمەرتنىي پولك» شەرۋىن وتكىزۋگە رۇقسات بەرگەن باقىت سۇلتانوۆ «الاشقا تاعزىم جاساۋشىلارعا» توسقاۋىل قويماق. بۇل ءۇشىن تاعى باقىت مىرزانى جازعىرا المايمىز. ول بۇيرىقتى ورىنداۋشى عانا. مىنەزى، امبيتسياسى جوق، تاپسىرمانى ورىنداۋشى – كادىمگى روبوت. ويتپەسە، «الاشقا تاعزىم» شەرۋىنە رۇقسات بەرەر ەدى عوي... ءجا، وسى جەردەن قايىرايىق...

ال 31 مامىر كۇنى ءاربىر قازاقستاندىق، ءاربىر قازاق الاش ارىستارىنىڭ رۋحىنا، ساياسي قۋعىن-سۇرگىن مەن اشتىق قۇرباندارىنىڭ رۋحىنا تاعزىم جاساۋعا مىندەتتى ءام قۇقىلى! ول ءۇشىن سۇلتانوۆ تا، باسقاسى دا ءبىزدى جاۋاپقا تارتا المايدى!

نۇرگەلدى ابدىعانيۇلى

Abai.kz

14 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3513