جۇما, 29 ناۋرىز 2024
ساڭلاق 6987 8 پىكىر 4 مامىر, 2019 ساعات 13:39

پرەزيدەنتتىك سايلاۋ جانە گولوۆكين، ەلەۋسىنوۆ، احمەدوۆتاردىڭ جەكپە-جەگى

8 ماۋسىمدا نيۋ-يوركتەگى Madison Square Garden ارەناسىندا وتەتىن بوكس كەشىندە ءۇش بىردەي قازاقستاندىق بوكسشى ونەر كورسەتەدى.

بۇل كەشتىڭ باستى جەكپە-جەگىندە ورتا سالماقتا WBC, WBA (Super), IBF جانە IBO تۇجىرىمدارى بويىنشا بۇرىنعى الەم چەمپيونى گەننادي گولوۆكين (38-1-1, 34 كو) جۇدىرىقتاسادى. ونىڭ قارسىلاسى كانادالىق بوكسشى ستيۆ روللس (19-0, 10كو). جەكپە-جەك 12 راۋندقا جوسپارلانعان.

وتكەن جىلى 16 قىركۇيەك لاس-ۆەگاستا مەكسيكالىق ساۋل الۆارەستەن (49-1-2, 34 كو) جەڭىلىپ، WBC, WBA (Super) جانە IBO تۇجىرىمدارى بويىنشا چەمپيوندىق بەلدىكتەرىنەن ايىرىلعان (ودان ءسال بۇرىن، ماۋسىم ايىنىڭ باسىندا حالىقارالىق بوكس فەدەراتسياسىنىڭ (IBF) بەلدىگىن قايتارىپ بەرگەن بولاتىن) وتانداسىمىز اراعا توعىز اي سالىپ، كاسىپقوي بوكستاعى 41-ءشى جەكپە-جەگىن وتكىزگەلى وتىر.

بۇل قازاقستاندىق بوكسشىنىڭ DAZN پلاتفورماسىمەن كەلىسىمشارتقا وتىرعاننان كەيىنگى العاشقى جەكپە-جەگى بولعالى تۇر.

ايتا كەتەيىك، GGG ناۋرىز ايىنىڭ باسىندا اتاقتى DAZN كومپانياسىمەن كەلىسىمشارت جاساسقان بولاتىن. گولوۆكين اتالعان ءىرى جوبامەن بىرگە التى كەزدەسۋ وتكىزۋدى جوسپارلاپ وتىر. اقپارات قۇرالدارىندا جازىلۋىنشا، گەننادي ءار جەكپە-جەگى ءۇشىن سەگىز ساندى كولەمدە گونورار الادى.

گولوۆكين — روللس جەكپە-جەگىنىڭ اندەركاتىندا تاعى ەكى بوكسشىمىز - ءالي احمەدوۆ پەن دانيار ەلەۋسىنوۆ شارشى الاڭعا شىعادى.

جارتىلاي اۋىر سالماقتا ونەر كورسەتەتىن ءالي احمەدوۆتىڭ (14-0, 10كو) قارسىلاسى قازىرشە بەلگىسىز. بىراق 10 راۋندتىق جەكپە-جەك وتەدى دەپ جوسپارلانىپ وتىر.

ال اۋەسقوي بوكستا تولاعاي تابىسقا جەتىپ، وليمپيدا چەمپيونى (2016 جىل) اتانعان دانيار ەلەۋسىنوۆ (6-0, 3 كو) كەزەكتى كەزدەسۋىن 25 مامىردا ۋسيك - تاكاما جەكپە-جەگىنىڭ اندەركارتىندا وتكىزۋى كەرەك بولاتىن. الايدا ءوزارا كەلىسىم نەگىزىندە كەزدەسۋدى ءسال كەشىكتىرىپ، گولوۆكينمەن ءبىر كۇندە جۇدىرقتاسۋدى ءجون دەپ تاۋىپتى. دانيار دا 10 راۋندتىق جەكپە-جەك وتكىزەدى. قارسىلاسىنىڭ اتى جاقىندا اتالادى.

باستا ايتقانىمىزداي، بوكس كەشى 8 ماۋسىم كۇنى نيۋ-يوركتەگى Madison Square Garden ارەناسىندا وتەدى. بۇل ءبىزدىڭ ۋاقىت بويىنشا 9 ماۋسىم تاڭعا تۋرا كەلەدى. ءبارىمىز بىلەتىندەي، بۇل كۇنى ەلىمىزدە كەزەكتەن تىس پرەزيدەنتتىك سايلاۋ وتەدى.

قۋانىش قاپپاس

Abai.kz

8 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2264
عيبىرات

قايسار رۋحتى عازيز جان

مۇحتار قۇل-مۇحاممەد 3558