فوتو ازاتتىق سايتىنان الىندى

بۇگىن ەلوردا مەن الماتى قالالارىندا زاڭسىز شەرۋگە شىققان 80 ادام ۇستالدى. بۇل جايىندا قر ىشكى ىستەر مينيسترلىگىنىڭ ءباسپاسوز قىزمەتى ءمالىم ەتتى، - دەپ حابارلايدى اباي-اقپارات.

«باس پروكۋراتۋرانىڭ رەسمي مالىمدەمەسىنە قاراماستان 1 مامىردا نۇر-سۇلتان، الماتى، سەمەي، قاراعاندى جانە اقتوبە قالالارىندا ازاماتتار زاڭسىز شەرۋگە شىقتى. اكتسياعا قاتىسۋشىلارعا وزدەرىنىڭ قوعامدىق ۇستانىمدارى مەن الەۋمەتتىك جانە وزگە دە ماسەلەلەرگە قاتىستى پىكىرلەرىن ەركىن جانە اشىق ايتۋعا مۇمكىندىك بەرىلدى»، - دەپ اتاپ وتەدى ۆەدومستۆو مالىمدەمەسىندە.

دەگەنمەن، مينيسترلىكتىڭ مالىمەتىنە قاراعاندا، نۇر-سۇلتان مەن الماتى قالالارىندا جينالعانداردىڭ اراسىنان كەيبىر ادامدار وزدەرىن تىم دورەكى ۇستاپ، ەلىمىزدە تىيىم سالىنعان «دۆك» ۇيىمىنىڭ ۇراندارىن كوتەرىپ، قوعامدىق ءتارتىپتى بۇزعان. وسىعان بايلانىستى اكىمدىكتەر پەن پروكۋراتۋرا وكىلدەرى  بەيبىت جيىن، شەرۋ وتكىزۋ ءتارتىبى تۋرالى زاڭناما ەرەجەلەرىن تۇسىندىرگەن.

«كەيبىر ازاماتتار زاڭسىز ارەكەتتى تىيۋ تۋرالى تالاپقا باعىنبادى. وسىدان كەيىن پوليتسيا  كۇشىمەن قوعامدىق ءتارتىپتى رەتكە كەلتىرۋ شارالارى قابىلدانىپ، قۇقىق بۇزۋشىلار ۇستالدى. ناتيجەسىندە ەلوردا مەن الماتى قالاسىندا پوليتسيا بولىمشەلەرىنە 80 ازامات جەتكىزىلدى. ولاردىڭ ارەكەتتەرىنە زاڭ تارتىبىمەن قۇقىقتىق باعا بەرىلەدى. ىشكى ىستەر مينيسترلىگى ارانداتۋشىلىققا بوي الدىرماۋعا جانە قر زاڭناماسىنىڭ تالاپتارىن ساقتاۋعا كەڭەس بەرەدى»، - دەلىنگەن تاراتىلعان اقپاراتتا.

Abai.kz