ولار قولىنا قامالعان ءاسيا تولەسوۆا مەن بەيبارىس تولىمبەكوۆتىڭ، سوت ايىپپۇل سالعان سۇيىنبيكە سۇلەيمەنوۆا، ايدوس نۇربولاتوۆ پەن ايگۇل نۇربولاتوۆانىڭ سۋرەتتەرى مەن "ناشي گەروي" (قاھارماندارىمىز) دەگەن جازۋى بار پلاكات ۇستاپ تۇردى. اكتسياعا قاتىسۋشىلاردىڭ ءبىرى "شىندىقتان قۇتىلا المايسىڭ. مەنىڭ تاڭداۋىم بار" دەگەن جازۋى جازىلعان جەيدە كيىپ العان.

"دوستارىمىز 21 ساۋىردە الماتىداعى مارافوندا باننەر ىلگەنى ءۇشىن قامالىپ وتىر. ادۆوكات ولاردىڭ كىناسىزدىگىن دالەلدەسە دە، پوليتسيا باننەردە "ۇلت ليدەرى - ۇلت ماسقاراسى" دەگەن جازۋ بار دەپ" جالا جابىلعان حاتتاما تولتىرعان. پوليتسيامىز ءوزىنىڭ شىنايى بەينەسىن كورسەتتى. بىزدەگى سوت جۇيەسى ادىلەتسىز" دەپ ايقايلادى ولار.

اكتسياعا قاتىسقان ەكاتەرينا تسحايدىڭ ازاتتىققا ايتۋىنشا، قولداۋ بىلدىرۋگە كەلگەندەر ءبىرىن-ءبىرى تانىمايدى، تەك Facebook-تە كەلىسىپ، اركىم ءوز قالاۋىمەن كەلگەن.

- ەل بەتىنە ۇيالماي قاراۋ ءۇشىن دوستارىمىزدى قولداۋعا كەلدىك. كوپ تۇرا المادىق. ءبىزدى دە الىپ كەتە مە دەپ تەز كەتىپ قالدىق، - دەدى ول.

الماتىدا قامالعان جاستاردى قولداۋ اكتسياسىن وتكەن اپتادا چەحيا، فرانتسيا، ۇلىبريتانيا، يتاليا مەن گرۋزيادا وقيتىن قازاقستاندىق ستۋدەنتتەر دە وتكىزگەن.

الماتى اكىمشىلىك سوتى 21 ساۋىردە قالاداعى مارافون كەزىندە جول بويىنا "شىندىقتان قاشىپ قۇتىلمايسىڭ" دەگەن جازۋى بار باننەر ىلگەنى ءۇشىن جەرگىلىكتى بەلسەندىلەر ءاسيا تولەسوۆا مەن بەيبارىس تولىمبەكوۆتى 15 تاۋلىككە قاماعان. سوتتا ولار بۇل باننەردى 9 ماۋسىمدا وتەتىن كەزەكتەن تىس پرەزيدەنت سايلاۋىنا جۇرتتىڭ نازارىن اۋدارىپ، سايلاۋدى ءادىل وتكىزۋگە شاقىرۋ ماقساتىندا ىلگەندەرىن ايتقان ەدى. سوت وسى اكتسيانى تۇسىرگەن تاعى ءۇش بەلسەندىنى - سۇيىنبيكە سۇلەيمەنوۆا، ايدوس نۇربولاتوۆ جانە ايگۇل نۇربولاتوۆانى دا "ميتينگ وتكىزۋ ءتارتىبىن بۇزدى" دەپ، 50 500 تەڭگە (130 دوللاردان استام) ايىپپۇل سالعان.

قاماۋدا وتىرعان ءاسيا تولەسوۆانىڭ ادۆوكاتى 23 ساۋىردەن بەرى بەلسەندىنىڭ اشتىق جاريالاپ وتىرعانىن حابارلادى.

حالىقارالىق قۇقىق قورعاۋ ۇيىمدارى - Freedom House, Amnesty International جانە بۇۇ-نىڭ ادام قۇقىعى بويىنشا ورتالىق ازياداعى كەڭسەسى قازاقستان بيلىگىن ءاسيا تولەسوۆا مەن بەيبارىس تولىمبەكوۆتى بوساتۋعا شاقىرعان.

Abai.kz