بەيسەنبى, 12 جەلتوقسان 2019
«سوقىر» فەميدا 4615 4 پىكىر 26 ءساۋىر, 2019 ساعات 09:32

ارداگەر اعامىز وزبەك مەملەكەتىنە تىلەۋلەس بولىپ ءجۇر

قازاقستاندا تۇراتىن، بالاسى تۇركىستان وبلىسىنىڭ جەتىساي اۋدانىنداعى اسىقاتا كەنتىنىڭ اكىمى بولىپ قىزمەت ىستەيتىن ارداگەر اعامىز: "وزبەكستان مىقتى ەل بولاتىنىنا سەنەمىز!", - دەپ قوڭسىلارىمىزعا ەرەكشە تىلەكتەس ەكەنىن جەتكىزدى.

بۇل بەينەجازبا بىزگە ۇيالى بايلانىس جۇيەسى ارقىلى كەلدى.

وندا وزبەكستان رەسپۋبليكاسىنىڭ پرەزيدەنتى شاۆكات ميرومونوۆيچ ميرزيوەۆتىڭ اعا ۇرپاق وكىلدەرىمەن وتكىزگەن كەزدەسۋىندە ءبىر كىسى ورىسشا، قازاقشا، وزبەكشە ارالاستىرىپ سويلەپ تۇر.

الدىمەن بەينەجازبادا باياندالعان سوزدەردى سول قالپىندا كەلتىرەيىك:

"ۋ مەنيا وچەن منوگو درۋزەي، وچەن منوگو رەبيات يز-زا رۋبەجا، كوتورىە زدەس ۆ گاگارينە جيلي، يح دەتي، ۆ گەرماني، ۆ روسسي، ۆ كازاحستانە، منوگو-منوگو، وني ۆسە سموتريات نا گاگارين، پو ۆاتساپۋ، تەلەۆيدەنيۋ، ينتەرنەتۋ، ي ۋديۆليايۋتسيا، سپراشيۆايۋت ۋ مەنيا، يا گوۆوريۋ: "پوۆەرتە، ەتو ۆوت تاك، پوۆەرتە، نا ساموم دەلە، ۆى پوەزجايتە، پريەزجايتە، پوسموتريتە نا گاگارين، ۆى منوگو پوتەريالي ۋجە، ۆى پريەزجايتە" دەيمىن دا.

مانا شۋنۋڭ ءوزى دولان بۋلياپتى. ۆيدنو، چتو دەلاەتسيا، ي دەلاەتسيا دليا ليۋدەي. شۋنۋڭ ۋچۋن ءبىز تولىق يشوناميز، قۇداي قالاسا، وزبەكستان بۋيۋك داۆلوت بولادى".

ەندى بەينەجازباداعى ارداگەردىڭ وزبەكستان پرەزيدەنتىنە ايتقان سوزدەرىنىڭ مازمۇنىن قازاقشا قىسقاشا بايانداپ شىعايىق.

بەينەجازبادا سويلەپ تۇرعان كىسى ءوزىنىڭ كەزىندە گاگاريندە تۇرعان، قازىر گەرمانياعا، رەسەيگە، قازاقستانعا كوشىپ كەتكەن دوستارى، ولاردىڭ بالالارى وتە كوپ ەكەنىن ايتادى.

ولار ۆاتساپ، تەلەۆيدەنيە، ينتەرنەت ارقىلى بۇل جەردىڭ قازىر قانداي ەكەنىن كورىپ، ەرەكشە تاڭداناتىن كورىنەدى، وزىنەن "شىنىمەن دە سونداي ما؟" دەپ سۇرايتىن كورىنەدى.

بۇل كىسى ولارعا: "سەندەر كوپ نارسەنى جوعالتتىڭدار، وسىندا قايتا كوشىپ كەلىڭدەر", - دەپ شاقىرادى ەكەن.

كورشى ەل - وزبەكستاننىڭ باسشىسىنا قاراتىپ ايتقان سوزدەرىنىڭ سوڭىندا بەينەجازبادا بەينەلەنگەن اعامىز:

"جۇزەگە اسىرىلىپ جاتقان جۇمىستار، مۇنىڭ بارلىعى ادامدار ءۇشىن جاسالىپ جاتقانى كورىنىپ تۇر. قۇداي قالاسا، وزبەكستان مىقتى مەملەكەت بولاتىنىنا سەنەمىز!", - دەپ ويىن تۇيىندەپتى.

كورشى ەل - وزبەكستان رەسپۋبليكاسىنىڭ پرەزيدەنتى شاۆكات ميرزيوەۆپەن بولعان كەزدەسۋدە سويلەپ تۇرعان بۇل كىسى - بەگىم سەرىكۇلى سەرىكوۆ اعامىز دەيدى جاقسى تانيتىن كىسىلەر.

جوعارىداعى بەينەجازبادا ءسوز بولعان گاگارين دەگەن ەلدى مەكەن - حح عاسىردىڭ 50-70-ءشى جىلدارى سول تۇستاعى سولاقاي ساياساتتىڭ سالدارىنان قازاقستاننىڭ وزبەكستانعا ءوتىپ كەتكەن جەرلەرىنىڭ ەسەبىنەن قۇرىلعان، ال قازىر كورشى ەلدىڭ جىزاق وبلىسىنا قارايتىن ءمىرزاشول اۋدانىنىڭ ورتالىعى گاگارين قالاسى.

ينتەرنەت جەلىسىندەگى مالىمەتتەر بويىنشا بەگىم سەرىكوۆ تۇركىستان وبلىسىنىڭ جەتىساي اۋدانىنا قاراستى اسىقاتا كەنتىندە تۇرادى ەكەن.

جەتىساي قالاسىنداعى "سىرداريا" ۋنيۆەرسيتەتىنىڭ رەسمي سايتىنداعى اقپاراتتارعا سۇيەنسەك، وسى جوعارى وقۋ ورنىندا "قۇقىق جانە ەكونوميكا" كافەدراسىنىڭ مەڭگەرۋشىسى بولىپ قىزمەت ىستەيدى، ەكونوميكا عىلىمدارىنىڭ دوكتورى، پروفەسسور.

بىلەتىن ادامداردىڭ ايتۋىنشا، بۇگىندە ەڭبەك ارداگەرى بولسا دا، قوعامدىق جانە ءبىلىم-عىلىم سالالارىنداعى قىزمەتتەردەن قول ۇزبەگەن بەگىم سەرىكوۆ اعامىزدىڭ ۇلى باقىت بەگىمۇلى سەرىكوۆ سوناۋ 1940 جىلى قۇرىلىپ، 1997 جىلى جابىلىپ قالعان، 2018 جىلى قايتا اشىلايىن دەپ تۇرعان جەرىنەن تۇركىستان وبلىسىنىڭ بۇعان دەيىنگى باسشىلارىنىڭ تىكەلەي كىناسىنەن اشىلماي قالعان قازاقتىڭ ءمىرزاشول وڭىرىندەگى اسىقاتا اۋدانىنىڭ بۇرىنعى ورتالىعى اسىقاتا كەنتىنىڭ اكىمى ەكەن.

كەڭەس وداعى كەزىندە وزبەك كسر اۋماعىندا ءارتۇرلى باسشىلىق قىزمەتتەر اتقارعان اعامىزدىڭ وزبەكستاننىڭ قازىرگى پرەزيدەنتىمەن كەزدەسىپ، وسىنداي وي-پىكىرلەرىن ورتاعا سالۋىن وتە قۇپتارلىق دەپ ەسەپتەيمىز.

ويتكەنى بىلتىر ءبىزدىڭ ەلىمىزدە وزبەكستاننىڭ قازاقستانداعى جىلى وتكىزىلدى.

ال 2019 جىلدىڭ 14-15 ساۋىرىندە ءبىزدىڭ قازىرگى پرەزيدەنتىمىز قاسىم-جومارت كەمەلۇلى توقاەۆ وزبەكستان رەسپۋبليكاسىنا العاشقى مەملەكەتتىك ساپارمەن بارىپ، وزبەكستانداعى قازاقستان جىلىنىڭ اشىلۋ راسىمىنە ارنايى قاتىسىپ قايتتى.

قىسقاسى، بۇل بەينەجازبادان الدەقانداي استار ىزدەۋدەن مۇلدەم اۋلاقپىز.

بەتپە-بەت جۇزدەسپەسەك تە، بەگىم سەرىكوۆ اعامىزدى سىرتتاي ايرىقشا قۇرمەتتەيمىز.

ايتسە دە، كەزىندە ءىرى-ءىرى مەملەكەتتىك جانە ساياسي قىزمەتتەردىڭ تۇتقاسىن ۇستاعان، كورشى ەلدىڭ مىقتى مەملەكەتكە اينالۋىنا تىلەكتەس-تىلەۋلەس بولىپ جۇرگەن ارداگەر اعالارىمىز قوعام الدىنداعى بارلىق ابىروي-بەدەلدەرىن ورتاعا سالىپ، ەلباسىمىز نۇرسۇلتان ءابىشۇلى نازارباەۆپەن نەمەسە قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆپەن دە ءدال وسىلاي ارنايى كەزدەسىپ، بۇگىندە تۇركىستان وبلىسىنىڭ ورتالىعىنان 400-500 شاقىرىمداي تۇكپىردە قالىپ قويعان، شىمكەنت جانە تۇركىستان قالالارىنا اپاراتىن جولدارى شۇرق تەسىك بولىپ جاتقان، قازاقتىڭ ءمىرزاشول وڭىرىندە تۇراتىن جەرگىلىكتى حالىقتىڭ الەۋمەتتىك جاعدايىنا، ءوزىمىزدىڭ قازاق ەلىنە دە مىناۋ بەينەجازباداعىداي ايرىقشا قامقورلىق مەن جاناشىرلىق تانىتسا ەكەن دەگەن تىلەگىمىز بار.

مىرزانتاي جاقىپ

Abai.kz

 

4 پىكىر