ۋكراينادا پرەزيدەنت سايلاۋىنا داۋىس بەرۋ اياقتالعان كەزدە، قاتىسۋشىلار 63,48 پايىز بولعان. مالىمەتتەر وسك سايتىندا جاريالاندى. بۇل الدىڭعى سايلاۋلارعا قاراعاندا تومەن كورسەتكىش (2014 – 66,04%، 2010 – 66,76%).

داۋىس بەرۋ جەكسەنبى، 31 ناۋرىزدا ءوتتى. سايلاۋ ۋچاسكەلەرى جەرگىلىكتى ۋاقىت بويىنشا تاڭعى 8.00-دە اشىلىپ، كەشكى 20.00-گە دەيىن جۇمىس ىستەدى. ۋكراينا ورتالىق سايلاۋ كوميسسياسى 39 ۇمىتكەردى تىركەدى. ونىڭ ەكەۋى كەيىن سايلاۋعا قاتىسۋدان باس تارتتى.

ەكزيت-پول ناتيجەسى بويىنشا (سايلاۋ ۋچاسكەسىنەن داۋىس بەرىپ شىققانداردان ساۋالناما جۇرگىزۋ), بىردە-ءبىر ۇمىتكەر ءبىرىنشى تۋردا جەڭىسكە جەتپەگەن. ول ءۇشىن ۇمىتكەر كەمىندە 50 پايىز داۋىس جيناۋ كەرەك.

ۇلتتىق ەكزيت-پول ناتيجەسىنە سايكەس، ۋكراينادا سايلاۋعا قاتىسقانداردىڭ 30,4 پايىزى ۆلاديمير زەلەنسكيگە داۋىس بەرگەن.

ودان كەيىنگى ورىندا ەلدىڭ قازىرگى پرەزيدەنتى پەتر پوروشەنكو كەلە جاتىر. ول 17,8 پايىز داۋىس جيناعان. ال ءۇشىنشى ورىنداعى "باتكيۆششينا" پارتياسىنىڭ ليدەرى يۋليا تيموشەنكونىڭ جيناعان داۋىسى - 14,2 پايىز.

سايلاۋ ناتيجەلەرى 10 ساۋىرگە دەيىن جاريالانادى. كانديداتتىڭ ەشبىرى ءبىرىنشى تۋردا 50 پايىزدان كوپ داۋىس جيناي الماسا، 21 ساۋىرگە جوسپارلانعان ەكىنشى تۋر وتەدى. سايلاۋدى اقىرعى ناتيجەسى 1 مامىرعا دەيىن بەلگىلى بولادى.

ۋكراينا پرەزيدەنتى بەس جىلعا سايلانادى.

ەلدىڭ ورتالىق سايلاۋ كوميسسياسى 17 ەل جانە 19 حالىقارالىق ۇيىمنان كەلگەن شامامەن 2400 حالىقارالىق باقىلاۋشىنى تىركەگەن. بىراق ولاردىڭ اراسىندا رەسەي ازاماتتارى جوق. جوعارى رادا بۇعان دەيىن رەسەيدى "اگرەسسور مەملەكەت" رەتىندە تانىپ، سايلاۋدى باقىلاۋ مۇمكىندىگىنەن ايىرعان.

Abai.kz