سەنبى, 14 جەلتوقسان 2019
ەل ءىشى... 986 0 پىكىر 30 ناۋرىز, 2019 ساعات 15:31

ابدىقالىقوۆا اقمولا وبلىسىنداعى كوپبالالى وتباسىلاردىڭ جاعدايىمەن تانىستى

اقمولا وبلىسىنا جۇمىس ساپارى اياسىندا پرەمەر-ءمينيستردىڭ ورىنباسارى گۇلشارا ابدىقالىقوۆا باستاعان ۇكىمەتتىك توپ تۇرعىنداردى جەكە قابىلداپ، حالىقپەن كەزدەسۋ وتكىزدى، سونداي-اق كوپبالالى وتباسىلاردىڭ ۇيلەرىنە باردى. بۇل تۋرالى primeminister.kz سايتىندا حابارلاندى.

اقمولا وبلىسىنا جۇمىس ساپارى بارىسىندا ششۋچينسك قالاسىنىڭ جوعارى پەداگوگيكالىق كوللەدجىنىڭ جاستارىمەن كەزدەسۋ وتكىزىلدى. ۆيتسە-پرەمەر جاستار جىلىن وتكىزۋ جونىندەگى جول كارتاسى اياسىندا 5 نەگىزگى باعىت بويىنشا 80-نەن استام ءىس-شارا ىسكە اسىرىلىپ جاتقانىنا باسا نازار اۋداردى.

شارالار جاستاردى باسپانامەن قامتۋ، جۇمىسپەن قامتۋ، ءبىلىم بەرۋدى دامىتۋ، ۆولونتەرلىك، عىلىمي گرانتتار بەرۋ، الەۋمەتتىك بەلسەندىلىكتى كەڭەيتۋ، جاس وتباسىلاردى قولداۋ، دەنساۋلىق جانە الەۋمەتتىك ينكليۋزيۆتىلىك ماسەلەلەرىن قامتيدى.

بۇگىندە كوللەدجدە «باستاۋىش ءبىلىم بەرۋ»، «مەكتەپكە دەيىنگى تاربيە مەن وقىتۋ»، «دەنە شىنىقتىرۋ جانە سپورت»، «كاسىپتىك وقىتۋ»، «مۋزىكالىق ءبىلىم بەرۋ»، «نەگىزگى ورتا ءبىلىم» ماماندىقتارى بويىنشا 1 مىڭنان استام ستۋدەنت ءبىلىم الىپ جاتىر. ەڭبەكپەن قامتىلۋ ۇلەسى 97% قۇرايدى. ستۋدەنتتەر مەملەكەتتىك جاستار ساياساتىنا قولداۋ بىلدىرە وتىرىپ، وزدەرىنىڭ كرەاتيۆتى ۇسىنىستارى مەن يدەيالارىن جەتكىزدى.

سونىمەن قاتار، بۋراباي اۋدانىنىڭ كەنەسارى اۋىلىنىڭ، ءبىرجان سال اۋدانىنىڭ ماكينكا اۋىلىنىڭ جانە بۇلاندى اۋدانىنىڭ التىندى اۋىلىنىڭ حالقىمەن كەزدەسۋلەر وتكىزىلدى.

«ءاربىر باعىت ولشەنەتىن كورسەتكىشتەرىمەن، تەتىكتەرىمەن جانە سولارعا ارنايى بولىنگەن قاراجاتتارمەن ناقتى ءارى ايقىن شارالاردان تۇرادى. ولار حالىقتىڭ الەۋمەتتىك وسال توپتارىن قورعاۋدى كۇشەيتۋگە، سونداي-اق ولاردىڭ ءال-اۋقاتىن ارتتىرۋعا مۇمكىندىكتەر مەن جاعدايلار جاساۋعا جول اشادى. ازاماتتاردىڭ ءال-اۋقاتى سولارعا بايلانىستى. قولىنان كەلەتىننىڭ ءبارى ەڭبەك ەتۋگە مىندەتتى. ال دەنە مۇمكىندىكتەرىنە نەمەسە وزگە دە سەبەپتەرگە بايلانىستى جۇمىس ىستەۋگە مۇمكىندىكتەرى جوق ازاماتتارعا مەملەكەت الەۋمەتتىك قولداۋ كورسەتۋدە»، - دەدى گ. ابدىقالىقوۆا.

پرەمەر-ءمينيستردىڭ ورىنباسارى كوپبالالى جانە از قامتىلعان وتباسىلارعا دا باردى. تىلەك تولەگەننىڭ وتباسىندا مەكتەپ جاسىنداعى 4 بالا بار. «ەڭبەك» ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا 2 ملن 200 مىڭ تەڭگە كولەمىندە شاعىن نەسيە العان وتاعاسى 10 ءىرى قارا مال ساتىپ العان. اۋىل بيزنەسمەنى ءوز وتباسىن تولىق قامتاماسىز ەتىپ قانا قويماي، جاڭا جۇمىس ورىندارىن دا اشىپ وتىر. گ. ابدىقالىقوۆا وبلىس باسشىلىعىنا وسىنداي وڭ تاجىريبەلەرگە جان-جاقتى قولداۋ كورسەتۋدى تاپسىردى.

جۇمىس توبىنىڭ مۇشەلەرى اقمولا وبلىسىنىڭ باسقا اۋداندارى مەن اۋىلدارىندا دا بولدى.

ءبىلىم جانە عىلىم ءمينيسترى ك. ءشامشيدينوۆا بىرقاتار ءبىلىم بەرۋ نىسانىن ارالادى. ولاردىڭ اراسىندا  «ايشا» جانە «بالدىرعان» بالاباقشالارى، اT-ليتسەي، ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى، كوكشەتاۋ قالاسىنداعى جوعارعى تەحنيكالىق كوللەدج، زەرەندى اۋدانىنداعى شاعالالى اۋىلى جوعارعى اگروتەحنيكالىق كوللەدجى، زەرەندى اۋىلىنداعى م. عابدۋللين اتىنداعى مەكتەپ-ينتەرنات، اقكول بالالار ءۇيى بار.

2018 جىلى ەلباسى تاپسىرماسى بويىنشا جاڭا اتتەستاتتاۋ جۇيەسىنە سايكەس ساناتتارىن راستاعان جانە جاڭارتىلعان ءبىلىم مازمۇنىمەن جۇمىس  ىستەيتىن مەكتەپ مۇعالىمدەرىنىڭ جالاقىسى 30-50% كوتەرىلگەنى بەلگىلى. ماۋسىم ايىنان باستاپ مەكتەپكە دەيىنگى ءبىلىم بەرۋ ۇيىمدارىنىڭ تاربيەشىلەرى مەن تاربيەشىلەردىڭ كومەكشىلەرى ت. ب. ءۇشىن سارالانعان جالاقى 30% دەيىن ارتادى. سونىمەن قوسا، وبلىستا ءۇش اۋىسىمدىق وقىتۋ ماسەلەسىن شەشۋ ءۇشىن 7 نىساننىڭ جانە وقۋشىلاردىڭ ورىن تاپشىلىعىن جويۋ ءۇشىن ءبىر نىساننىڭ قۇرىلىسى ءجۇرىپ جاتىر. بيىل 280 ورىندىق 1 بالاباقشانى پايدالانۋعا ەنگىزۋ، 1075 ورىندىق 10 مەكتەپكە دەيىنگى ۇيىمدى اشۋ جانە جۇمىس ىستەپ تۇرعان 120 ورىندى كەڭەيتۋ جوسپارلانعان.

رەسپۋبليكالىق بيۋدجەت قاراجاتى ەسەبىنەن 8,2 ملرد تەڭگە سوماسىنا 7 نىسان سالىنىپ جاتىر. ونىڭ ىشىندە 2 نىساندى 2019 جىلى پايدالانۋعا بەرۋ كوزدەلگەن.

دەنساۋلىق ساقتاۋ ءمينيسترى ە. ءبىرتانوۆ جۇمىس ساپارى اياسىندا بۇلاندى، ەڭبەكشىلدەر، ستەپنوگور جانە اقكول اۋرۋحانالارىنىڭ مەديتسينا قاۋىمىمەن كەزدەستى. دەنساۋلىق ساقتاۋ جۇيەسىنىڭ قىزمەتكەرلەرىنە العاشقى مەديتسينالىق-سانيتارلىق كومەكتىڭ ساپاسى مەن قولجەتىمدىلىگىن ارتتىرۋ، ەڭبەكاقىنى كوتەرۋ، سالانى تسيفرلاندىرۋ جانە تاعى باسقا ماسەلەلەر بويىنشا قابىلدانىپ جاتقان شارالار ءتۇسىندىرىلدى.

«Nur Otan» پارتياسىنىڭ حاتشىسى ف. قۋانعانوۆ ەسىل جانە استراحان اۋداندارىنىڭ تۇرعىندارىمەن كەزدەسۋ بارىسىندا ەلباسى ن. ءا. نازارباەۆ «Nur Otan»  پارتياسىنا 4 جاڭا جوبانى ىسكە قوسۋدى تاپسىرعانىن اتاپ ايتتى، ولار: ينجەنەرلىك جانە الەۋمەتتىك ينفراقۇرىلىمدى دامىتۋعا باسىمدىق بەرۋمەن «قۇتتى مەكەن»; اۋىلدى دامىتۋعا باعىتتالعان «اۋىل - ەل بەسىگى»; كوپ بالالى جانە از قامتىلعان وتباسىلاردى قولداۋ بويىنشا «باقىتتى وتباسى»; پارتيانىڭ قوعام قابىلداۋلارى نەگىزىندە حالىقتىڭ الەۋمەتتىك قورعالاتىن توبىن قولداۋعا باعىتتالعان «حالىققا كومەك» بىرىڭعاي الەۋمەتتىك تەرەزەسى.

سونىمەن قاتار، جۇمىس توبىنىڭ ءاربىر مۇشەسى ازاماتتارعا جەكە قابىلداۋلار وتكىزىپ، وبلىستاعى اۋىلدار مەن قالالاردىڭ تۇرعىندارىمەن كەزدەستى.

ەسكە سالا كەتەيىك، قر پرەمەر-ءمينيسترىنىڭ ورىنباسارى گ. ابدىقالىقوۆا باستاعان ۇكىمەتتىڭ جۇمىس توبىنىڭ قۇرامىنا ەڭبەك جانە حالىقتى الەۋمەتتىك قورعاۋ ءمينيسترى ب. ساپارباەۆ، ءبىلىم جانە عىلىم ءمينيسترى ك. ءشامشيدينوۆا، دەنساۋلىق ساقتاۋ ءمينيسترى ە. ءبىرتانوۆ، قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى م. جايىمبەتوۆ، «Nur Otan» پارتياسىنىڭ حاتشىسى ف. قۋانعانوۆ، «اتامەكەن» ۇكپ باسقارما توراعاسىنىڭ ورىنباسارى ل. رامازانوۆا، سونداي-اق باق وكىلدەرى مەن بلوگەرلەر كىردى.

ەلباسىنىڭ «الەۋمەتتىك قامقورلىق» جاڭا الەۋمەتتىك شارالارىن ءتۇسىندىرۋ ماقساتىمەن ەل وڭىرلەرىنە جۇمىس ساپارلارى جالعاساتىن بولادى.

Abai.kz

 

0 پىكىر