جەكسەنبى, 17 قاراشا 2019
841 0 پىكىر 27 اقپان, 2019 ساعات 10:35

قىرعىز ءجۋرناليسى ۇلىقبەك باباكۋلوۆ فرانتسيادان ساياسي باسپانا الدى

ۇلت ارازدىعىن تۋدىرعان دەگەن كۇدىككە ءىلىنىپ، ەكى جىل بۇرىن قىرعىزستاننان كەتكەن جۋرناليست ۇلىقبەك باباكۋلوۆ فرانتسيادان ساياسي باسپانا الدى.

ءجۋرناليستىڭ "فەرگانە.رۋ" سايتىنا حابالاۋىنشا، 25 اقپاندا ول فرانتسيانىڭ بوسقىندار ءىسى جانە ازاماتتىعى جوق ادامدار جونىندەگى باسقارماسىنان (OFPRA) حابار العان. وندا: ء"سىز باسقارمانىڭ قۇقىقتىق جانە اكىمشىلىك قورعاۋىنا الىندىڭىز" دەلىنگەن.

باباكۋلوۆتىڭ ايتۋىنشا، جۋرناليست ون جىل كولەمىندە وتانىنا قايتىپ ورالا المايدى. "ەل بيلىگى ماعان قارسى جالعان قىلمىستىق ءىس قوزعاپ، بيلىككە باعىنىشتى اقپارات قۇرالدارى ارقىلى مەنى قارالادى. فرانتسيا بيلىگى ماعان جانە وتباسىما بوسقىن مارتەبەسىن بەرىپ، وسىندا ورنىعۋىما جاعداي جاساپ وتىر", - دەدى جۋرناليست.

قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى باباكۋلوۆقا قارسى قىلمىستىق ءىستى 2017 جىلى 9 ماۋسىمدا قوزعاعان. وعان Fergananews.com جانە باسقا دا سايتتاردا "ارانداتۋشىلىق سيپاتقا يە ماتەريالدار جاريالادى" دەگەن ايىپ تاعىلعان.

ءجۋرناليستىڭ ءوزى بۇل ايىپتاردى جوققا شىعارىپ، ءوزىن ەكس-پرەزيدەنت المازبەك اتامباەۆ قۋدالادى دەپ مالىمدەگەن.

Abai.kz

0 پىكىر