جۇما, 29 ناۋرىز 2024
الاڭ 5385 9 پىكىر 26 اقپان, 2019 ساعات 13:00

قارا حالىقتى اشىندىرما، اينالايىن ۇكىمەت!

ءوز باسىم بيلىك پەن ۇكىمەتتىڭ قالاي جۇمىس ىستەپ جاتقانىنا استانادا جۇرگەن ءوزىمنىڭ ەمەس، ەلىمىزدىڭ سوناۋ تۇكپىرىندە، وبلىس ورتالىعى تۇركىستان قالاسىنان 500 شاقىرىم قاشىقتا قالىپ قويعان، جارتى ميلليون حالقى بار ءمىرزاشول وڭىرىندە، قازىرگى زاماناۋي وركەنيەتتەن الىستا تۇرىپ جاتقان جەرلەستەرىم مەن اعايىن-تۋىستارىمنىڭ كۇندەلىكتى كۇيبەڭ تىرشىلىكتەرىنە قاراپ باعا بەرەمىن.

ەلوردامىزدان شىمكەنتكە بارۋ وڭاي، ال شىمكەنتتەن ماقتاارالعا جەتۋ - قيىننىڭ قيىنى. شىمقالادان سارىاعاشقا دەيىن عانا دۇرىستاۋ بولعانىمەن، ارى قاراي سول باياعى تاپ-تار، جاماۋ-جاسقاۋ جول.

تۇركىستان وبلىسىنداعى جەتىساي مەن اتاكەنتتەن ماقتاارال اۋدانىنىڭ ورتالىعى مىرزاكەنت كەنتىنە اپاراتىن، كەڭەس زامانىنان بەرى كۇردەلى جوندەۋ كورمەگەن جولدار بۇرىنعى شۇرق تەسىك قالپىندا.

مىرزاكەنتتەن شاردارا ارقىلى تۇركىستان وبلىسىنىڭ قازىرگى ورتالىعىنا قاراي جۇرەتىن جولداردىڭ دا جاي-كۇيى سونداي.

اتاكەنتتەن ءوزىمىز ءوسىپ-ونگەن، كىندىك قانىمىز تامعان ءبىزدىڭ "تەگىستىك" اۋىلىنا باراتىن جولدىڭ جاي-كۇيى دە سول. اۋىلدىڭ ىشىندەگى كوكتەم مەن جازدا توپىراق پەن شاڭ-توزاڭعا كومىلىپ، كۇز بەن قىستا بالشىق-باتپاققا باتىپ جاتاتىن كوشەلەر تۋرالى ايتپاي-اق قويايىن.

ءمىرزاشول وڭىرىندەگى الىس اۋىلداردىڭ بۇگىنگى احۋالى جونىندە كەيىنگى ەكى-ءۇش جىلدىڭ وزىندە ەلباسىمىز بەن ۇكىمەتكە جۇزدەگەن حات جولداعان شىعارمىن.

ەلباسىمىزدىڭ ءوزى ارنايى تاپسىرما بەرىپ وتىرسا دا، ۇكىمەت باسشىلارى تۇركىستان وبلىسىنىڭ اكىمىنە سىلتەپ، "سەن سالار دا، مەن سالار، اتقا جەمدى كىم سالار" دەگەننىڭ كەيپىن كەلتىرىپ وتىر.

ءبىزدىڭ وسى "تەگىستىك" اۋىلىنىڭ تۇرعىندارى ءوز اۋىلدارىنىڭ اكىمدەرى، اۋداندىق ءماسليحاتتىڭ دەپۋتاتتارى كىم ەكەنىن بىلمەيدى دە.

ال وبلىس، اۋدان اكىمدەرىنىڭ توڭىرەگىنە جاعىمپازداردى جيناپ الىپ وتكىزەتىن جىل سايىنعى ەسەپ بەرۋ جينالىستارىنداعى "قىرىق وتىرىكتەرىنە" قاراپايىم حالىق سەنۋدەن قالعان.

ءىنى-باۋىرلارىم اۋىلدا جۇمىس جوق بولعاندىقتان كەلىنشەكتەرى مەن بالا-شاعاسىن اكە-شەشەلەرىنىڭ قولدارىنا تاستاپ، وزدەرى وتباسىن اسىرايتىن ناندارى مەن ناپاقالارىن باسقا جاقتان ىزدەپ، ەلدەن جىراقتا، جان-جاقتا ءجۇر.

جوعارى ءبىلىمى مەن ديپلومى بار قارىنداستارىمىز بەن كەلىندەرىمىز امالسىز ۇيلەرىندە وتىر.

ءبىزدىڭ اۋىل جاقتاعى مەكتەپتەرگە مۇعالىم بولىپ جۇمىسقا تۇرۋدىڭ اقىسى (پاراسى) ءبىر ميلليون تەڭگەگە جەتىپتى. وندا دا ءوز كەزەگىڭدى كۇتۋىڭ كەرەك ەكەن.

ياعني قارىزدانىپ، بانكتەن نەسيە الىپ، مەكتەپ ديرەكتورىنا ءبىر ميلليون تەڭگەسىن الدىن-الا اپارىپ بەرىپ قويعانداردىڭ ءوزى قىزمەتكە الاتىن "باقىتتى ءساتتى" كۇتىپ، جۇمىس ىستەپ جۇرگەن مۇعالىم قىز-كەلىنشەكتەر قاشان تۇرمىسقا شىعىپ، دەكرەتتىك دەمالىسقا قاشان كەتەدى ەكەن، قاشان ورىندارىن بوساتادى ەكەن دەپ ەكى كوزدەرى ءتورت بولىپ كەزەكتە تۇرعان كورىنەدى.

مەملەكەت بيۋدجەتىنەن "بوس جۇرگەن جاستاردى وقىتامىز، كاسىپتىك ءبىلىم بەرەمىز، جۇمىس ورىندارىن اشىپ، سوعان ورنالاستىرامىز" دەپ ميللياردتاعان قارجى ءبولىنىپ جاتىر.

ءوزىم ءوسىپ-ونگەن "تەگىستىك" اۋىلىنىڭ جاستارى سوناۋ ەسەپسىز قاراجاتتىڭ ءبىر تيىن دا كومەگىن كورگەن ەمەس!

سوناۋ مىرزاشولدەگى الىس اۋىلدار عانا ەمەس، ەلىمىزدىڭ تۇكپىر-تۇكپىرىندەگى بارلىق ەلدى مەكەندەردىڭ قازىرگى جاعدايى وسىنداي دەۋگە بولادى!

"دۇنيەنىڭ تەتىگىن زامانعا ساي بىلىمدىلەر ۇستايدى" دەپ ءوزىمىزدى ءوزىمىز الداپ قويامىز.

الايدا، اۋىلدا جۇمىسسىز جۇرگەن اعايىندارىم مەن كەلىن-قارىنداستارىما كومەكتەسە قويايىن دەسەم، جان-جاعىمىزدى جەمقورلىق جايلاعان مىنا دۇنيەدە مەنىڭ دە قولىمدا تۇرعان ەشقانداي تەتىك جوق.

وكىنىشكە قاراي، ول تەتىكتەر نەگىزىنەن ارام اقشامەن بايىعاندار مەن كيىز قازىقتىڭ ءوزىن جەرگە كىرگىزىپ جىبەرەتىن "توقپاعى مىقتىلاردىڭ" قولىندا تۇر بۇگىندە!

كۇنى كەشە قۇرامى جاڭارعان مىنا ۇكىمەتتەن اڭعال دا، اقكوڭىل قازاق ۇلكەن ءۇمىت كۇتىپ وتىر!

اينالايىن، ۇكىمەت!

شىدامنىڭ دا شەگى بار! قاراپايىم قارا حالىقتى اشىندىرماي، ءوز مىندەتىڭدى ادال اتقار!

قۇرمەتپەن، مىرزانتاي قوجابايۇلى جاقىپ، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى تەلەراديو جانە قوعاممەن بايلانىس كافەدراسىنىڭ دوتسەنتى (of Associate Professor), فيلولوگيا عىلىمدارىنىڭ كانديداتى (PhD), «زەرتتەۋشى» رەسپۋبليكالىق عىلىمي-ءبىلىم بەرۋ ورتالىعى» مەكەمەسىنىڭ ديرەكتورى

Abai.kz

9 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3551