فۋتزالدان قازاقستان ۇلتتىق قۇراماسى حورۆاتيامەن جولداستىق ماتچ وتكىزەدى.

29 قاڭتاردان 3 اقپانعا دەيىن قازاقستان قۇراماسى الماتىدا وقۋ-جاتتىعۋ جيىنى وتكىزەدى. وسى جاتتىعۋ جيىنى اياسىندا قۇراما حورۆاتياعا قارسى قوس بىردەي جولداستىق كەزدەسۋ وتكىزەدى. بۇنىڭ ءبىرى 1 اقپان كۇنى بالۋان شولاق اتىنداعى سپورت سارايىندا، ال ەكىنشى ويىن 2 اقپان كۇنى «زەنيت» سپورت كەشەنىندە («باعاناشىل») وتەدى.

سونداي-اق، 1 اقپان كۇنگى العاشقى كەزدەسۋ كەزىندە UEFA چەمپيوندار ليگاسى تورتتىك فينالىنىڭ جەرەبە تارتۋ ءراسىمى وتەدى (كەزدەسۋ 19:30-دا باستالادى).

ايتا كەتەيىك، بيىل ءساۋىر ايىندا «الماتى ارەنادا» فۋتزالدان چەمپيوندار ليگاسى تورتتىك فينالى وتەدى. وندا «سپورتينگ» (پورتۋگاليا), «ينتەر» (يسپانيا), «بارسەلونا» (يسپانيا) جانە جەرگىلىكتى «قايرات» (قازاقستان) تورتتىگى باق سىنايدى.

فۋتزال - وتكەن عاسىردىڭ 30 جىلدارى فۋتبولدىڭ قاراشاڭىراعىنان وتاۋ بولىپ ءبولىنىپ شىققان بولاتىن. العاش ۋرۋگۆايدا پايدا بولىپ، كەيىن كورشى برازيليا جەرىنە كوشكەن كىشى تەڭبىل دوپ ونەرىندە كۇنى بۇگىنگە دەيىن لاتىن امەريكالىقتار مىقتى سانالىپ كەلەدى.

فۋتزال ويىنى ەلىمىزدە دە اسا قارقىندى دامىپ كەلەدى. ميللياردتاپ قارجى قۇيسا دا ميمىرت ءجۇرىسىن جاقسارتا الماعان فۋتبولعا قاراعاندا فۋتزال سپورتى قازاققا الدەقايدا جاقىن. قۇرامادا دوپ تەۋىپ جۇرگەن ءوز جىگىتتەرىمىز جەتەرلىك. لەگيونەرلەر جوق دەي المايمىز. بىراق فۋتبولداعىداي ساپاسىز ەمەس. برازيليادان كەلگەن لەگيونەرلەردىڭ ارقاسىندا جەرلىك جاستاردىڭ فۋتزالعا بەيىمى تەز ارتىپ كەلەدى. بۇعان دالەل وسى جولى ۇلتتىق قۇراماعا شاقىرتۋ العان ويىنشىلاردىڭ ءتىزىمى:

قاقپاشىلار: يگيتا («قايرات») مەن سالاۋات بايراليەۆ («اقتوبە»);

الاڭداعى ويىنشىلار: دىنمۇحامبەت سۇلەيمەنوۆ، داۋرەن نۇرعوجين، شىڭعىس ەسەنامانوۆ، ءبىرجان ورازوۆ، داۋرەن تۇرساعۇلوۆ، دۋگلاس، سەرىك جامانقۇلوۆ، تاينان ء(بارى - «قايرات»), البەرت اقبالىقوۆ، نۇربەك قاراعۇلوۆ، قايرات يمانالين ء(بارى - «اقتوبە»), ازات ۆاليۋللين («ايات»), نۇرسۇلتان پيالى («جەتىسۋ»);

باپكەرلىك شتاب: باس باپكەر – پاۋلۋ ريكاردو فيگەيرا سيلۆا، باس باپكەردىڭ كومەكشىسى – سەرگەي كوريدزە، فيزيكالىق دايىندىق باپكەرى – دە سوۋزا كارريلو لۋيز كرۋز، دارىگەر – حوسيلبەك تاعاەۆ، ماسساجشى – ايبەك ەسالينوۆ، اكىمشى – جاندوس كەڭەسوۆ.

فۋتزالدان قازاقستان ۇلتتىق قۇراماسىنىڭ جەتىستىكتەرى: 2016 جىلى سەربيادا وتكەن ەۋروپا چەمپيوناتىنىڭ قولا جۇلدەگەرى. ءبىزدىڭ فۋتزالشىلار قارت قۇرلىق بىرىنشىلىگىنە العاش رەت قاتىسقانىنا قاراماستان ۇزدىك ۇشتىككە ەندى.

اراعا ەكى جىل سالىپ سلوۆەنيانىڭ ليۋبليانا قالاسىندا وتكەن كەزەكتى ەۋروپا چەمپيوناتىندا قازاقستان قۇراماسى تاعى دا جاقسى ناتيجەگە كورسەتتى. ەكى ەۋروپا بىرىنشىلىگىنەن بولەك، الەم چەمپيوناتىندا دا كاكاۋ شاكىرتتەرى جانكۇيەرلەردى شىن قۋانتقان.

بيىل جازدا الماتى قالاسىندا وتكەن ستۋدەنتتەر اراسىندا فۋتزالدان الەم چەمپيوناتىندا جاس فۋتزالشىلارىمىز كۇمىس جۇلدەگەر اتاندى.

ءادىلىن ايتقاندا، «قايرات» كومانداسى قازاق فۋتزالىنىڭ دامۋىنا ولشەۋسىز ۇلەس قوسىپ وتىر. بۇگىنگى تاڭدا الماتىلىق كلۋب ەۋروپانىڭ ەڭ ۇزدىك كوماندالارىنىڭ ءبىرى سانالادى. قۇرلىقتىڭ باستى ءتۋرنيرى UEFA كۋبوگىن ەكى مارتە جەڭىپ العان.

قۋانىش قاپپاس

Abai.kz