قازاقستاندىق بوكسشى جانىبەك ءالىمحانۇلى (2-0, 1 كو) كاسىپقوي بوكسقا ءبىرجولا بەت بۇرعاننان كەيىنگى العاشقى جەكپە-جەگىن قاشان وتكىزەتىنى بەلگىلى بولدى.

بۇل تۋرالى بوكسشىنىڭ باسپاسوز حاتشىسى بەرىك سۇلتان ءوزىنىڭ Facebook-دەگى پاراقشاسىندا مالىمدەدى.

- كوپتەن كۇتكەن جاڭالىق! جانىبەك ءالىمحانۇلىنىڭ امەريكاداعى العاشقى جەكپە-جەگىنىڭ ۋاقىتى بەلگىلى بولدى. بۇيىرتسا، كاسىپقوي بوكس جانكۇيەرلەرى قازاق بوكس ءستيلىن 28 قىركۇيەك كۇنى كورەدى. جانىبەك باتىر تاس ءتۇيىن دايىن! قارسىلاسى جاقىندا بەلگىلى بولادى، - دەپ جازدى بەرىك سۇلتان.

ەستەرىڭىزدە بولسا، جانىبەك ءالىمحانۇلى بيىل ماۋسىم ايىندا الەمگە ايگىلى پروموۋتەر بوب ارۋممەن كەلىسىمشارتقا قول قويعان بولاتىن. 28 قىركۇيەك وكلەندتەگى (كاليفورنيا شتاتى، اقش) بوكس كەشىندە وتەتىن جەكپە-جەك جانىبەكتىڭ بوب ارۋم باسقاراتىن Top Rank پروموۋتەرلىك كومپانياسى قاتارىنا قوسىلعاننان كەيىنگى اقش-تاعى العاشقى جەكپە-جەگى بولماق.

اقش تورىندە ونەر كورسەتىپ جۇرگەن قازاقستاندىق كاسىپقوي بوكسشىلار از ەمەس. الايدا، جانكۇيەرلەر ءالى دە گەننادي گولوۆكيننىڭ ورنىن باساتىن بىلعارى قولعاپ شەبەرىن بايقاي العان جوق. قانات يسلامنان كۇدەر ۇزگەن كوپشىلىك جاڭا ەسىم ىزدەي باستادى. كاسىپقوي بوكستاعى جولىن جاڭا باستاپ جاتقان جاستاردى ايتپاعاندا، اۋەسقوي بوكستا ءتاپ-ءتاۋىر جەتىستىككە جەتكەن جانىبەك ءالىمحانۇلى قازاق جانكۇيەرلەرىنىڭ ءۇمىتىن اقتاۋعا ءبىر تابان جاقىن دەپ ەسەپتەيمىز.

قۋانىش قاپپاس

Abai.kz