جۇما, 29 ناۋرىز 2024
ساڭلاق 4578 4 پىكىر 15 تامىز, 2018 ساعات 11:37

«استانا» ەل ءۇمىتىن اقتاي المادى

UEFA چەمپيوندار ليگاسى ءۇشىنشى ىرىكتەۋ كەزەڭىنىڭ قارىمتا ماتچىندا «استانا» حورۆاتيادا جەرگىلىكتى «دينامو» كومانداسىنا 1:0 ەسەبىمەن جول بەردى. وسىلايشا، قوس ويىننىڭ قورىتىندىسىندا زاگرەبتىك كوماندادان 3:0 ەسەبىمەن جەڭىلگەن ەلوردالىقتار كەلەسى كەزەڭ جولداماسىنان قاعىلدى.

قوس كوماندانىڭ كەزدەسۋى باستالماي تۇرىپ ساراپشىلار مەن جانكۇيەرلەر «استانانىڭ» پلەي-وفف كەزەڭىنە وتۋگە مۇمكىندىگى بار ەكەنىن ايتقان. الايدا، تەكە-تىرەستىڭ ناتيجەسى قازاقستاندىقتاردى قۋانتا قويمادى. ءوز الاڭىندا اناۋ-مىناۋ كومانداعا ەسە جىبەرە قويمايتىن ەلوردالىق ۇجىم العاشقى ويىندا «استانا ارەنا» تورىندە 0:2 ەسەبىمەن ۇتىلعاندا-اق جانكۇيەر جۇزىنەن ءۇمىت وتى سونە باستاعان.

سوندا دا ۋكراينالىق مامان رومان گريگورچۋك باستاعان جىگىتتەر حورۆاتيا جەرىنە قولدان كەلگەننىڭ ءبارىن جاسايمىز دەپ اتتاندى. جانكۇيەرلەردىڭ كوڭىل تۇكپىرىندە دە كۇتپەگەن جەردەن كامبەك ورىن الا ما دەگەن كۇڭگىرت ءۇمىت بولعان. بىراق، «ماكسيمير»  ستاديونىندا وتكەن ماتچ زاگرەبتىك كوماندانىڭ بىزگە قاراعاندا ءبىر باس جوعارى تۇرعانىن كورسەتىپ بەردى.

ارينە، «دينامو» زاگرەب قازاقستاندىق كوماندا ءۇشىن قالپاقپەن ۇرىپ الاتىن قارسىلاس ەمەس ەدى. ەۋروپانىڭ ەڭ ەجەلگى كوماندالارىنىڭ ءبىرى. گەرمانيانىڭ اتاقتى transfermarkt سايتىنىڭ مالىمەتىنە سۇيەنسەك، كوماندا ساپىنداعى ويىنشىلاردىڭ ترانسفەر نارىعىنداعى جالپى قۇنى 42,5 ملن ەۋرونى قۇرايدى. ەڭ قىمبات ويىنشىسى — قورعاۋشى كەۆين تەوفيل-كاترەن (4 ملن). ال «استانانىڭ» جالپى قۇنى 24,15 ملن تۇراتىنىن ەسكەرسەك، ەكى ورتاداعى پارىق اناۋ ايتقانداي الشاق ەمەس. دەمەك، حورۆاتيالىق كوماندا ءبىز ءۇشىن الىنباس قامال دا ەمەس ەدى.

بىراق، قالاي ايتساق تا، بولارى بولدى. ەل ءۇمىتىن ارقالاعان ەلوردالىق كوماندا بيىل دا چەمپيوندار ليگاسىنىڭ توپتىق كەزەڭىنە شىعۋ مۇمكىندىگىنەن ايرىلدى. بيىل قارت قۇرلىقتىڭ ەڭ ءباسى بيىك تۋرنيرىندە كوماندامىز بوي كورسەتەر دەگەن كوپشىلىك ءۇمىتى جەلگە ۇشتى. ەندى «استانا» كومانداسىنا ەۋروپا ليگاسىنىڭ پلەي-وفف كەزەڭىندە ساتتىلىك تىلەۋ عانا قالدى. ءبارىمىز بىلەتىندەي، «استانا» ەۋروپا ليگاسىنىڭ توپتىق كەزەڭىنە ءوتۋ ءۇشىن «حاپوەل» بەەر-شەۆا (يزرايل) — اپوەل (كيپر) (بىرىنشى ويىن 2-2) جۇبىنىڭ جەڭىمپازىمەن كەزدەسەدى.

تاعى ءبىر ايتا كەتەرلىگى، حورۆاتيا جەرىندە وتكەن ويىندا «استانا» ساپىندا بىردە-ءبىر قازاق ويىنشى نەگىزگى قۇرامدا الاڭعا شىققان جوق. قازاق فۋتبولشى دەيمىز اۋ، ماتچتى ءبىرىنشى مينۋتتان باستاعان 11 ويىنشىنىڭ اراسىنداعى تازا قازاقستاندىق جالعىز شومكو عانا. ال قازاقستاننىڭ پاسپورتى بار وزگە ءۇش ويىنشى – ەريچ، مالىي، پوستنيكوۆتار وزگە ەلدە تۋعان «جاڭا قازاقتار».

«دينامو زاگرەب» - «استانا» 1:0 (0:0)

العاشقى ويىن: 2:0

گول: گاۆرينوۆيچ 74 (1:0)

ەسكەرتۋ: پوستنيكوۆ 44, مالىي 55

«دينامو» زاگرەب: زاگوراتس، ادەمي، ولمو، حايروۆيچ، بۋديمير (گاۆرانوۆيچ 56), گوياك (شۋنيچ 70), لەوۆاتس، تەوفيل-كاترەن، ستويانوۆيچ، ديلاۆەر، ورشيچ (پەريچ 83)

«استانا»: ەريچ، رۋكاۆينا، كلياينحايسلەر (ششەتكين 78), پەدرو ەنريكە، توماسوۆ، ماەۆسكي، المەيدا (مۋجيكوۆ 78), مالىي، يانگا (كابانانگا 78), پوستنيكوۆ، شومكو

باس تورەشى: گەديميناس ماجەيكا (ليتۆا)

14 تامىز. زاگرەب. «ماكسيمير». 

 Abai.kz

4 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2279
عيبىرات

قايسار رۋحتى عازيز جان

مۇحتار قۇل-مۇحاممەد 3596