اۋىل تۇرعىندارىمەن ۇكىمەت مۇشەلەرى، جەرگىلىكتى بيلىك جانە Jhong ji Mining company قىتاي كومپانياسىنىڭ وكىلدەرى كەزدەستى. ونىڭ قورىتىندىسى بويىنشا كومبينات زيانىن زەرتتەيتىن كوميسسيا قۇرۋ تۋرالى شەشىم قابىلداندى.

Jhong ji Mining company 2012 جىلى سولتون-سارى كەنىن بارلاۋعا جانە وندىرۋگە ليتسەنزيا العان. بيىل بۇل كومپانيا سول جەردە كومبينات سالۋى ءتيىس بولعان. جەرگىلىكتى تۇرعىندار قۇرىلىستى دوعارۋدى تالاپ ەتتى. حالىق قالدىقتاردىڭ وسى ماڭداعى وزەنگە ءتۇسىپ كەتۋىنەن قاۋىپتەنەدى. "قالدىققويما دا دەنساۋلىققا قاۋىپ ءتوندىرۋى مۇمكىن", - دەپ ەسەپتەيدى ەمگەكچيل تۇرعىنى رازبەك تۋكۋەۆ.

قىتاي كومپانياسى ەمگەكچيل اۋىلىنا الەۋمەتتىك كومەك رەتىندە 13 ميلليون سوم (شامامەن 190 مىڭ دوللار) بولەتىنىن حابارلادى. بۇعان دەيىن كانال قۇرىلىسىنا بەس ميلليون سوم اۋدارىلعان. بىراق جەرگىلىكتى تۇرعىندار مۇنداي كومەككە كەلىسپەگەن.

Jhong ji Mining company كومپانياسىنىڭ وكىلى گۇلميرا يبرايموۆا كومبينات قىزمەتىنەن ەكولوگيا زارداپ شەكپەيدى دەدى. ء"بىزدىڭ جوبا جاڭا تەحنولوگيا بويىنشا جۇمىس ىستەيدى. اقپاسۋ كومبينات سىرتىنا شىعارىلمايدى، ول قالدىققويمادا قالادى. قورقۋدىڭ قاجەتى جوق، ەكولوگياعا زيانى جوق", - دەدى ول.

ەمگەكچيل اۋىلىنىڭ تۇرعىندارى التىندى ءوز ەركىمەن ءوندىرىپ جۇرگەنى بەلگىلى. جينالىستا التىن كەنىن ينۆەستورلارعا بەرمەي، جەرگىلىكتى تۇرعىنداردىڭ وزدەرى ءوندىرسىن دەگەن ۇسىنىس تا ايتىلدى.

Abai.kz