«ارقادان الاتاۋعا سالەم!» (فوتو)

ەلوردانىڭ 20 جىلدىعى مەن «رۋحاني جاڭعىرۋ» باعدارلاماسىنىڭ اياسىندا «Astana Musical» تەاترى الماتى قالاسىنا «ەلوردادان الاتاۋعا سالەم» اتتى گاسترولدىك تۋرنە وتكىزىپ جاتىر.

تەاتردىڭ كوركەمدىك جەتەكشىسى - قازاقستاننىڭ ەڭبەك سىڭىرگەن قايراتكەرى، PhD دوكتورى اسحات ماەميروۆ. رەجيسسەر - امان گۋماروۆ جانە ميۋزيكل قويىلىمدارىندا باستى رولدەردى سومداۋشى ارتىستەر، رەسپۋبليكالىق جانە حالىقارالىق بايقاۋلاردىڭ لاۋرەاتتارى شالقاروۆا جارقىناي، مۇقاشەۆ سالامات، ريزابەكوۆا ينابات، يگىلىك ورازالى، ۋسمانوۆ راسۋل.

ەلوردالىق تەاتر 23,24,27 ناۋرىز كۇندەرى العاش رەت قازاق تىلىندە ءۇن قاتقان دۇنيەجۇزىنە بەلگىلى ميۋزيكل – «رومەو جانە دجۋلەتتا» قويىلىمىن ساحنالادى. ناۋرىزدىڭ 25 جۇلدىزى كۇنى «دوستار سەرتى» ميۋزيكلى ۇسىنىلدى. ال 26 ناۋرىز كۇنى تەاتر ارتىستەرى ەلىمىزدىڭ رۋحاني قۇندىلىقتارىنا اينالعان حالىق اندەرى مەن كومپوزيتورلارىنىڭ شىعارمالارى، ۇلتتىق وپەرامىز بەن كلاسسيكالىق مۋزىكامىزدىڭ ءىنجۋ-مارجاندارى نەگىزىندە جاسالعان «قىز جىبەك» ەتنو-فولكلورلىق ميۋزيكلىن قالىڭ جۇرتشىلىق نازارىنا ۇسىندى. اتالعان ميۋزيكل «جاھانداعى زاماناۋي قازاقستاندىق مادەنيەت» جوباسى شەڭبەرىندە 2017 جىلعى جەلتوقسان ايىندا فرانتسيا، بەلگيا، اۆستريا، رەسەي مەملەكەتتەرىندە ساحنالانىپ، ەۋروپانى ءدۇر سىلكىندىرىپ قايتقان.

سونىمەن قوسا، 26 ناۋرىز كۇنى مۇقاعالي ماقاتاەۆتىڭ شىعارمالارىنا نەگىزدەلگەن – «جىرلايدى جۇرەك» اتتى مۋزىكالىق-پوەتيكالىق سپەكتاكلى دە قويىلدى.

ولجاس يبراەۆ «Astana Musical» تەاترىنىڭ اكىمشىلىك ديرەكتورى:

-ءبىز وسىدان 2 جىل بۇرىن قۇرىلعان ەلىمىزدەگى ەڭ جاس تەاترمىز. قازاقستان رەسپۋبليكاسىنىڭ مادەنيەت جانە سپورت مينسترلىگىنىڭ قولداۋىمەن جانە تەاترىمىزدىڭ جەتەكشىسى - قازاقستاننىڭ ەڭبەك سىڭىرگەن قايراتكەرى، اسحات ماەميروۆتىڭ كوركەمدىك جەتەكشىلىگىمەن قۇرىلعان تەاتر.

ءبىز گاسترولدىك ساپارىمىزدى الماتىدان باستاعان سەبەبىمىز، الماتى ونەر- استاناسى. بۇل جەردە قازاق تەاتر ونەرىنىڭ قارا شاڭىراعى اۋەزوۆ تەاترىنىڭ ساحناسىنا شىعىپ، باتاسىن الۋدى دۇرىس دەپ سانادىق. وسىدان كەيىن شىمكەنت، تاراز، اتىراۋ قالالارىنا تۋرنە جوسپارلانىپ جاتىر. بۇعان دەيىن ەۋروپانىڭ 5 قالاسىندا بولىپ قايتىق.

«Astana Musical» - ەلىمىزدەگى جانە ورتالىق ازياداعى تۇڭعىش ماماندىرىلعان ميۋزيكل تەاترى. ميۋزيكل – ۇلتىمىزعا ءالى دە تاڭسىقتاۋ جانر بولعاندىقتان دا الماتى تورىنە اياق باسقان جاس تەاتردىڭ ونەرىن تاماشالاپ، قولداۋ ءبىلدىرىپ جاتقان حالىقتىڭ قاراسى دا كوپ.

اسحات ماەميروۆ، م.اۋەزوۆ اتىنداعى قازاق مەملەكەتتىك اكادەميالىق دراما تەاترى ديرەكتورى:

جاس كورەرمەندەردىڭ سۇرانىسىنان، ۋاقىت تالابىنان تۋىنداعان «Astana Musical» تەاترى. بۇل تەاتردىڭ دۇنيەگە كەلۋىنە سەبەپكەر بولعان ەلباسىمىز – ن.ءا.نازارباەۆ. ونەر كەڭىستىگىندە جاس ارتىستەردىڭ باسىن بىرىكتىرەتىن ونەر ۇجىمىن جاساۋ كەرەك بولدى. ارينە، ونى ءوز كەزەگىندە ناقتى ىسكە اسىرعان مادەنيەت جانە سپورت ءمينسترى ارىستانبەك مۇحامەديۇلى. الاتاۋعا وسى جولى كەلۋى جاس ۇجىم ءۇشىن ءبىر جاعىنان سىزدەرگە ەسەپ بەرۋ، كيەلى ونەر ورداسىنىڭ باتاسىن الۋ. سوندىقتان سونداي ۇلكەن جاۋاپكەرشىلىكپەن كەلىپ جاتىر.