رەسپۋبليكالىق تەلەارنادان ءانشى، كۇيشى، تەرمەشىلەردىڭ «مەن قازاقپىن» كونكۋرسىن قاراپ وتىرعانمىن. ءبىر كەزدە ساحناعا باۋىرجان دەگەن جاس جىگىت شىعىپ، دومبىرامەن ماناربەك ەرجانوۆتىڭ «پاراۆوز» ءانىن مانەرىنە كەلتىرىپ، كەرەمەت ورىنداپ شىقتى.

باۋىرجاننىڭ تالانتىن جيۋري توراعاسى مىرزاتاي جولداسبەكوۆ مويىنداي وتىرىپ، ۇلكەن ساياسي قىراعىلىق تانىتتى. قىراعىلىعى سول – الگى اندە «باستاعان كومپارتيا ەلىمىزدى» دەگەن ءسوز بار ەكەن. سونداي ءسوزى بار ءاندى ورىنداعان ساياسي ساۋاتسىزدىعى ءۇشىن باۋىرجاننىڭ كەلەسى تۋرعا وتە المايتىندىعىن «سىپايىلاپ» جەتكىزدى. شىنىندا دا وتپەدى.

ماسقارا! وسى كەزدە مەنىڭ كوز الدىما تالاي ايتىلىپ، جازىلىپ جۇرگەن 37-جىل ەلەستەدى. سول كەزدە دە وسىلاي تىرناق استىنان كىر ىزدەمەيتىن بە ەدى؟ ايتپەسە مىرزەكەڭنىڭ ءوزى سول پارتيانىڭ ۇلتتىق ساياساتىنىڭ ارقاسىندا تەگىن ءبىلىم الىپ، «ادام» بولعان جوق پا؟ ەشكىمگە پارا بەرمەي-اق ۇلكەن لاۋازىمدى قىزمەتتەرگە قول جەتكىزدى. ءتىپتى ەلباسىمىزدىڭ ءوزى قازاقستان كومپارتياسىن باسقارىپ تۇرعانىنىڭ ارقاسىندا پرەزيدەنتىككە قول جەتكىزدى عوي. ەندەشە مىرزەكەڭ كومپارتيا دەگەن سوزدەن نەگە سونشالىقتى شوشىندى؟ونىڭ ۇستىنە، ماناربەك ەرجانوۆتىڭ «پاراۆوز» انىنە ءانشىنىڭ وزگەرىس ەنگىزۋگە قاقى جوق. سولاي ەكەن دەپ ءبىر سوزگە بولا كەرەمەت ءاندى كۇرەسىنگە لاقتىرا سالماقپىز با؟ ولاي بولسا، كەڭەستىك كەزدە جازىلعان مىرزەكەڭنىڭ بارلىق شىعارمالارىن قاجەتسىز دەپ، ىسىرا سالايىق. كەڭەستىك جۇيە كەزىندە جازىلعان، سول كەزدىڭ يدەولوگياسىن ناسيحاتتاعان بارلىق تۋىندىلاردىڭ كوزىن قۇرتايىق، وندا...

ءبىر سوزگە بولا ساياسي استار بەرىپ، تالانتتى جىگىتتىڭ جولىن بايلاۋدىڭ قاجەتى قانشا ەدى؟ ءانشىنىڭ انشىلىگى، ونەرى باعالانباي، ساياسات ونەرگە ارالاسسا، كوسەگەمىز كوگەرگەن ەكەن. ءاي، مىرزەكەم-اي، اتا ساقالىڭ اۋزىڭا تۇسكەندە جيۋري توراعالىعىنا تالاسپاي-اق، ۇيىڭدە تىنىش جاتساڭ قايتەر ەدى؟..

ت. قويشىعۇلوۆ

Abai.kz