سەيسەنبى, 12 قاراشا 2019
الاڭ 3640 26 پىكىر 30 قاراشا, 2017 ساعات 09:41

جاستاردىڭ 40 پايىزدان استامى قازاقستاننان كەتكىسى كەلەدى

"قازاقستان جاستارىنىڭ 40,4 پايىزى باسقا ەلدەرگە كەتكىسى كەلەدى" دەپ مالىمدەدى سارسەنبىدە استانادا "جاستار" عىلىمي-زەرتتەۋ ورتالىعىنىڭ وكىلدەرى. ورتالىق "قازاقستان جاستارى - 2017" بايانداماسىن دايىنداۋ ءۇشىن زەرتتەۋ جۇرگىزگەن.

ءدىن ىستەرى جانە ازاماتتىق قوعام مينيسترلىگىنە قاراستى ورتالىق قىزمەتكەرلەرى ساۋالناماعا جاۋاپ بەرگەندەردىڭ 59 پايىزدان استامى "قازاقستاننان كوشكىم كەلمەيدى" نەمەسە "قازاقستاننان كەتكىم كەلمەيدى" دەپ جاۋاپ بەرگەن.

"جاستار" ورتالىعىنىڭ اقپاراتى بويىنشا، قازاقستاننىڭ ءتۇرلى ايماقتارىنداعى 14-29 جاس ارالىعىنداعى ەكى مىڭنان استام ادامدى قامتىعان زەرتتەۋ ءبىلىم جانە عىلىم مينيسترلىگىنىڭ تاپسىرىسى بويىنشا جۇرگىزىلگەن. ورتالىق زەرتتەۋ جۇرگىزۋگە جۇمسالعان قارجى كولەمىن ايتپادى، بىراق "جاستار" عىلىمي زەرتتەۋ ورتالىعىنىڭ قىزمەتىنە جىل سايىن 200 ميلليون تەڭگە بولىنەتىنىن حابارلادى.

ورتالىقتىڭ باس ساراپشىسى فاريدا مۇستاەۆا "قازاقستان جاستارى - 2017" بايانداماسىن تانىستىرۋدا جاستار سانى كادىمگىدەي ازايىپ بارا جاتقانىن ايتتى. ونىڭ سوزىنشە، 2014 جىلى قازاقستانداعى جاستار سانى 4 293 353 ادامدى قۇراسا، 2017 جىلى بۇل كورسەتكىش 3 994 464-كە كەمىگەن.

باياندامادا 2017 جىلى جاستار اراسىندا 339 ءوز-وزىنە قول سالۋ وقيعاسى تىركەلگەنى، جول-كولىك وقيعالارىندا 250 جاستىڭ قازا تاپقانى جانە قان اينالىمى جۇيەلەرى اۋرۋلارىنان 141 جاستىڭ قايتىس بولعانى ايتىلدى.

عىلىمي-زەرتتەۋ ورتالىعى قىزمەتكەرلەرىنىڭ سوزىنشە، جاستار تۋرالى بايانداما تۇجىرىم جانە ۇسىنىستارىمەن بىرگە مينيسترلىككە جولدانادى.

Abai.kz

26 پىكىر