بەيسەنبى, 28 ناۋرىز 2024
الاڭ 8345 31 پىكىر 1 قاراشا, 2017 ساعات 12:10

الەم قازاقتارىنا حات

تورتكۇل دۇنيەگە تارىداي شاشىلعان، ءاي قازاق بالاسى! قىتايداعى قانداسىڭنىڭ جايى سەنى ويلاندىرماي ما؟ ەشبىر كىناسى جوق قازاعىڭ تەمىر تورعا توعىتىلىپ، كەيبىرى "وزىنە-ءوزى قول جۇمسادى" دەگەن سىلتاۋمەن ومىرىمەن قوشتاسىپ جاتىر. شەكارادان بەرى وتە المايتىنىن ءبىلىپ، قانشاما قانداسىڭ اح ۇرىپ، وكىنىشپەن وزەگىن ورتەۋدە. بۇكىل الەمدەگى قازاقتىڭ ارقاسۇيەرى سانالاتىن قازاق بيلىگىنىڭ ءوزى قىتايدىڭ ىشكى ساياساتىنا ارالاسا الماي تىعىرىققا تىرەلىپ تۇر. "مۇنداي جاي باسقا ەلدە بولمايدى" دەپ ايتا الاسىڭ با؟

ەي، قازاق بالاسى! ەسىڭدى جي! سەن بالكىم موڭعول ەلىندە تۇرىپ جاتقان بولارسىڭ! التاي اتا مەكەنىڭ ەكەنىنە ءشۇبا كەلتىرمەيمىن. كەشەگى وسپان، زۋقالار قانىمەن دە، جانىمەن دە قورعاعان سول ءبىر قاسيەتتى ولكەنى تاستاپ، قازىرگى قازاق ەلىنە قوسىلار كۇنىڭ تۋدى. بۇل كۇن قانشا ۇزاققا سوزىلارى ءبىر اللاعا ايان. موڭعول بيلىگىنە قاپەلىمدە ءبىر زۇلىم باسشى كەلسە، بۇگىنگى قىتايداعى قازاقتىڭ تاعدىرى سەنىڭ باسىڭا تۋماسىنا كىم كەپىل؟ ارينە، تۋعان جەردى، بۇكىل ءومىرىڭنىڭ ىستىق ەستەلىكتەرىن قيىپ تاستاۋ - قيىن. وسى ءبىر قيىندىقتى ەر بوپ كوتەرىپ، ءوز ۇيىرىڭە قوسىلماساڭ، ءبىر تال ءدانىڭدى بولسىن، قازاق جەرىنە ەگە الماساڭ، سەنىڭ قازاقتىعىڭنان قايىر جوق. موڭعولدى بىلاي قويىپ، ەرتەڭ ورىس ساياساتى بەتىن تەرىس بەرسە، قازاق ەلىنە ۇشىپ جەتەر قاناتىڭ بولماي زار ەڭىرەۋىڭ ابدەن مۇمكىن.

ەي، ومبى مەن ورىنبوردا، ياكي رەسەيدىڭ تۇپكىر-تۇپكىرىندە جۇرگەن قازاق بالاسى! سەنىڭ ءتىلىڭ ورىس بولعانىڭمەن، جانىڭ قازاق! سەندەردىڭ دە ءتۇپ قوتارىلا ەلگە قوسىلار، قازاقتىڭ ءتىلى مەن ءدىنىن بويىڭا سىڭىرەر كەزىڭ جەتتى. بۇ تۇرلاۋى جوق عۇمىردا كوك كوز اعايىننان جاقسىلىق كەلمەسى باياعىدا بەلگىلى بولمادى ما؟ قازاقتىڭ ەلىن وتارلاۋ ءۇشىن بابالارىڭدى قىناداي قىرعان ەلدەن ىرگە سۋىتىپ، قازاق بولۋعا قادام جاسا. ورىس بيلىگى سىرتىن بەرسە، سەنىڭ ۇرپاعىڭ مۇلدەم قازاقتىقتان كەتۋى مۇمكىن. قىتايداعى جاعداي باسىڭا تونسە، قارۋلى ورىس ەلىنە قارسى تۇرىپ، قازاق ساعان پانا بولا المايدى. پانا قاجەت بولسا، قازىر تاپ!

ەي، تاشكەنت پەن نۇكىستەگى اعايىن! وزبەك ءوز اعام! ءوز اعام بولسا دا، شاڭىراعى بولەك، ۇستانىمى وزگە مەملەكەت. قۇدايعا شۇكىر، تاۋەلسىزدىك العالى ەڭ كوپ قانداسىمىز وزبەكستاننان كەلدى. سول ءبىر كوشتى توقتاتپاي، سەندەر دە اعىلىڭدار! ەندى ارتقا قارايلايتىن ەشتەڭە قالعان جوق. ەرتەڭ ساياسات قالاي بولارىن بولجاۋ قيىن. بۇگىن مۇمكىندىك بار ما، قازاق بولعىڭ كەلە مە، ۇرپاقتارىڭنىڭ جۇرەگى قازاق دەپ سوقسىن دەيسىڭ بە، توقتاما! ءبىز ءۇشىن نۇكىستىڭ قاراقالپاعى دا - قازاق! قاراقالپاق اعايىن سەن دە بەتىڭدى قازاق ەلىنە بۇر... شەكارادان بەرى ءوت. از قازاعىڭنىڭ سانىن كوبەيت. ءوس، ءون!

ەي، ەۋروپا قازاقتارى! ءتىلىڭ مەن سالت-ساناڭ وزگەرگەن بولار، بالكىم! جاعدايىڭ جاقسى، قالتاڭ توق شىعار! سوندا دا ءبىر بالاڭ بولسا دا، تاريحي وتانىڭا جىبەر! ەرتەڭ جۇتىلىپ جوق بولىپ كەتكىڭ كەلمەسە، قازىر ويلان! بۇل ءجۇز جىلدا ءبىر بۇيىرار جىلىمىق كەزەڭ. وسى كەزەڭدە كوشىپ كەلە الماساڭ، سەن قازاق ەمەسسىڭ. قازاق بولىپ قالا المايسىڭ!

قىتاي ساياساتىنا قاراپ، جۇرەگىمىز اۋىرار. قىتايدا جازىقسىز قامالعان قانداستارعا قول ۇشىن سوزا المايتىنىمىزعا وكىنىپ، زار جىلاپ جاتقان بولارمىز. ول جىلاعان جۇرەكتى جۇباتاتىن جالعىز قادام الەم قازاقتارىن ەلگە شاقىرۋ دەپ بىلەمىن. ءبىزدىڭ تاۋەلسىزدىك العالى بەرى حانزۋ ەلىندەگى بار قازاقتى ەلگە كوشىرىپ الار مۇمكىندىگىمىز بولدى. سول مۇمكىندىكتى مەملەكەت تە، قىتايداعى قازاقتار دا ۋىسىنان شىعارىپ الدى.

ەندى وسىنداي وكىنىش بولماۋى ءۇشىن جەر شارىنداعى ءار قازاق بۇگىننەن باستاپ اتقا قونۋى قاجەت!

ءسىز نە دەيسىز؟

قانات بىرلىكۇلى

Abai.kz 

 

31 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3522