جۇما, 15 قاراشا 2019
46 - ءسوز 2242 2 پىكىر 26 قازان, 2017 ساعات 10:28

"انتيرەكلاما - توجە رەكلاما" نەمەسە قازاق قىزىن قورلاۋدى دوعارىڭدار!

ءتۇرلى توپتار مەن جەكەلەگەن كەي ادامداردىڭ پاراقشالارىنان سوڭعى ۋاقىتتا شىلىم شەگىپ تۇرعان نە قىسقا كيىم كيگەن قازاق قىزىن سالىپ، مىنا سارىنداعى سوزدەردى: "وڭباعان قىز، اتا-اناسى نە قاراپ وتىر" دەپ جازىپ قوياتىنداردى ءجيى بايقايمىن. ونىڭ استىنا ءجۇز ادام لايك باسىپ، بەس ءجۇز ادام پىكىر ءبىلدىرىپ، قىزىل كەڭىردەك بولىپ جاتقانى.

سونداعى ماقساتى نە؟ انا قىزدى تاربيەلەۋ مە؟ كۇلكىلى. سونشالىقتى جانى اشىپ بارا جاتسا، جاڭاعى قىزدىڭ جەكەسىنە شىعىپ، "قارىنداسىم، قارلىعاشىم، مۇنىڭ دۇرىس ەمەس، بۇلاي ەتپە" دەپ اقىلىن ايتسا دا بولادى عوي. جوق، باس سالىپ توپقا سالۋ كەرەك، نە پوست جازۋ كەرەك. ال سودان ەتەگى ۇزارىپ، شىلىمى جەرگە تۇسكەن قىز بار ما؟! ارينە، مەندە قازاق قىزىنىڭ ارىن ويلايمىن. جاڭاعىداي كورىنىستى كورگەندە مەنىڭ دە جۇرەگىم اۋىرادى. بىراق تاربيەلەۋ دەگەنىمىز قاتەلىگىن جۇرتتىڭ كوزىنشە بەتىنە باسۋ دەگەن ءسوز ەمەس.

تاربيەلەۋ - تابالاۋ ەمەس! جانى اشىعان ادام جالپاق جۇرتقا جار سالماي-اق، ەشكىمگە بىلدىرمەستەن قاتەلىگىن ادامنىڭ وزىنە جەكە ايتىپ، اقىل-كەڭەسىن بەرەر. ال ادامدى ونىڭ رۇقساتىنسىز جەردەن الىپ، جەرگە سالۋ بىرىنشىدەن مادەنيەتسىزدىك، ەكىنشىدەن زاڭعا قايشى. قىسقاسى وسى ماسەلەدە "انتيرەكلاما - توجە رەكلاما" بولىپ كەتپەسىن. بۇل ارەكەتتىڭ ءوزى قازاق قىزىنىڭ ارىن قورعاۋ ەمەس، قورلاۋ!

اسحات قاسەنعالي

Facebook-تەگى پاراقشاسىنان

2 پىكىر