سەيسەنبى, 22 قازان 2019
الەۋمەت 4393 4 پىكىر 24 شىلدە, 2017 ساعات 00:25

 زايىرلى ەلدە زاڭ سويلەسىن!

قر باس پروكۋرورى جاقىپ اسانوۆتىڭ نازارىنا

وقىرمانى كىلەڭ اقىن-جازۋشى، جۋرناليستەر مەن زيالى قاۋىم وكىلدەرىنەن قۇرالعان، ۇلى اباي اتامىزدىڭ اتىنداعى «Abai.kz» اقپاراتتىق پورتالى انا تىلىمىزدە اقپارات تاراتاتىن ەلىمىزدەگى بىرەگەي سايت دەسەك ارتىق بولماس. حالقىنا قامقور وسى سايت ارقىلى حالقىنا قامقور تۇلعالارعا جان-ايقايىمىزدى جەتكىزىپ، داتىمىزدى ايتۋ داعدىمىز. سونداي «داتىمىزدىڭ» ءبىرى 2017-جىلدىڭ 1-شىلدەسى كۇنى «توسپا سۋ» تولاسسىز سويلەيدى، سويلەگەندە ءبۇي دەيدى» دەگەن اتپەن باس پروكۋرور ج.اسانوۆ، جوعارى سوت توراعاسى ق.ءمامي مىرزالاردىڭ اتىنا اشىقحات تۇرىندە جارىق كورگەن ەدى. سول اشىق حاتتىڭ ناتيجەسى دە كورىنە باستاعانداي.

الماتى قالاسى بوستاندىق اۋداندىق سوتى 5 شىلدە كۇنى سوت شەشىمىن جاريالاپ، 18-شىلدە كۇنى تۇپكىلىكتى نىساندا شىعارىلدى. سوت شەشىمى مەنىڭ تالاپ-ارىزىمدى قاناعاتتاندىرۋسىز قالدىردى. الايدا، مەملەكەتتىك مەكەمەمىز دەپ مەملەكەتتىڭ اتىن جامىلعان الماتى قالاسى ەنەرگەتيكا جانە كوممۋنالدىق شارۋاشىلىق باسقارماسىنىڭ شارۋاشىلىق جۇرگىزۋ قۇقىنداعى «توسپا سۋ» مەملەكەتتىك   كوممۋنالدىق كاسىپورنىنىڭ ء(ارى قاراي – «توسپا سۋ») ءىس ارەكەتتەرىندە زاڭسىزدىقتىڭ بار ەكەنىن انىقتاعان سوت شەشىممەن بىرگە «جەكە ۇيعارىم» شىعاردى. سوتتىڭ ايتۋى بويىنشا شىعارىلعان «جەكە ۇيعارىم» نەگىزىندە بوستاندىق اۋداندىق پروكۋرورى تەكسەرىس جۇرگىزىپ، تەكسەرىس ناتيجەسىندە ءىس انىقتالسا ءبىزدىڭ تالاپ-ارىزىمىز بويىنشا قايتا شەشىم شىعارىلادى ەكەن. «جەكە ۇيعارىم» جايدان-جاي شىعارىلماعانى بەلگىلى. «توسپا سۋدىڭ» جالعان اكت، جالعان دالەل، ءتىپتى، سوت بارىسىنداعى دالەلدەمەلەردى بۇرمالاۋ فاكتىلەرى ءبىز ۇسىنعان ءىس ماتەريالدارىندا كوزگە كورىنىپ تۇر. تەك تەرگەۋ-تەكسەرۋدى دۇرىس جۇرگىزسە بولعانى ءىستىڭ بەتى اشىلارى انىق. ال وسى ءىستى قاراۋ جۇمىسى ەندى پروكۋراتۋرانىڭ قۇزىرىنا بەرىلدى. ءوز ينجەنەرى سوت بارىسىندا ءوزى جازعانىن مويىنداعان، «توسپا سۋدىڭ» ءمورى باسىلعان اكت-تىڭ ءوزىن «بىزدە ونداي اكت تىركەلمەگەن، وزدەرىڭ جازىپ وتىرسىڭدار» دەپ دالاعا سويلەپ وتىرعان «توسپا سۋدىڭ» قاراپ وتىرماسى انىق. قارسى تاراپ اپەللياتسيالىق شاعىم ءتۇسىرۋى ابدەن مۇمكىن.

قۇرمەتتى باس پروكۋرور! ءوزىڭىز وسى قۇزىرلى ورىننىڭ تىزگىنىن قولىڭىزعا العان كەزدە مەملەكەتتىك مەكەمەلەرمەن سوتتاسقان ازاماتتاردىڭ 80-پايىزى جەڭىلىس تاباتىنىن تىلگە تيەك ەتىپ، سىنعا العان ەدىڭىز. مىنە سونداي مەملەكەتتىك مەكەمەنىڭ ءبىرى بىزبەن بەتپە-بەت بەلدەسىپ جاتقان جايى بار. زايىرلى ەلدە زاڭنىڭ تۇعىرى بەرىك، تۋى بيىك بولۋى كەرەك. ازاماتتىق قوعامدا اقيقاتتان اتتاماعان ادامنىڭ قۇقىن قورعايدى دەپ قۇزىرىڭىزعا حات جولداپ قۇلاعدار قىلىپ وتىرمىن. «جەكە ۇيعارىم» شىعارىلدى. ەندى ول قارسى تاراپتىڭ قارسىلىعىنا قاراماستان كەرى قايتارىلماي ءىستىڭ اقيقاتى اشىلۋى كەرەك. ءۇمىتىمىز وزىڭىزدە. بۇل ءىستى ءتىپتى، ءىىب-نا دا تاپسىرماستان ءوز قۇزىرىڭىزداعى بوستاندىق اۋداندىق پروكۋراتۋراسى جان-جاقتى، ءادىل تەكسەرسە دەگەن ءوتىنىشىمىزدى جەرگە تاستامايدى دەپ سەنەمىز.

بىرلىك توقاي

Abai.kz

 

4 پىكىر