سەنات دەپۋتاتتارىنىڭ سايلاۋى اياقتالدى. بۇگىن تاڭەرتەڭگىسىن باستالعان سايلاۋ قورىتىندىسى ءتۇس اۋا بەلگىلى بولدى. دوداعا "دوپۋسك" العاندار اراسىنان 16 سەناتور وق بويى وزىپ شىعىپ، دەپۋتاتتىق مانداتقا يە بولدى..

سايلاۋ ۋ-شۋسىز وتكەن ەكەن. ورتالىق سايلاۋ كوميسسياسىنىڭ جاۋاپتى حاتشىسى باقىت مەلدەشوۆ سولاي دەپتى. ەشقانداي ارىز-شاعىم تۇسپەگەن.

16 وڭىردەگى سەنات سايلاۋىنىڭ الدىن-الا قورىتىندىسى بويىنشا تومەندەگى كىسىلەر دەپۋتات بولدى:

اقمولا وبلىسى - داۋرەن ابىلبەكوۆ;

اقتوبە وبلىسى - مۇحتار جۇماعازيەۆ;

الماتى وبلىسى - نۇرلان قىلىشباەۆ;

اتىراۋ وبلىسى - عۇمار دۇيسەمباەۆ;

شىعىس قازاقستان وبلىسى - دۇسەنعازى مۋسين;

جامبىل وبلىسى -  ابدالى نۇراليەۆ;

باتىس قازاقستان وبلىسى - ناريمان تورەعاليەۆ;

قاراعاندى وبلىسى - رىسقالى ابديكەروۆ;

قىزىلوردا وبلىسى - مۇرات باقتيارۇلى;

قوستاناي وبلىسى - جەڭىس نۇرعاليەۆ;

ماڭعىستاۋ وبلىسى - باقتىباي شەلپەكوۆ;

پاۆلودار وبلىسى - نۇرجان نۇرسيپاتوۆ;

سولتۇستىك قازاقستان وبلىسىندا - ەرىك سۇلتانوۆ;

وڭتۇستىك قازاقستان وبلىسىندا - ءالىمجان كۇرتاەۆ;

استانا قالاسى - ەدىل مامىتبەكوۆ;

الماتى قالاسى - دينار نۇكەتاەۆا دەپۋتات بولىپ سايلاندى. ء(تىزىمدى BAQ.kz سايتى جاريالادى)

رەسمي دەرەك: سايلاۋعا قاتىسۋعا قۇقىلى 3291 تاڭداۋشىنىڭ 3165-ءى قاتىسقان. بۇل ورتاشا 96,2%-دى قۇرايدى. سايلاۋدى 172 حالىقارالىق بايقاۋشى قاداعالاپتى. شەتەلدىڭ 116 باق وكىلى اقپار تاراتقان جانە.

جوعارىداعى ءتىزىم بويىنشا 16 دەپۋتات انىقتالدى. سەناتتاعى كرەسلولار سانى - 47. ولاردىڭ 15-ءىن پرەزيدەنت ءوزى تاعايىندايدى دەسەك، قالعان 16 دەپۋتاتتىڭ كىم ەكەنى ءالى بەلگىسىز.

سەناتتىڭ سۋ جاڭا قۇرامىنا شاقىرتۋ العان سەناتور مۇرات باقتيارۇلى وتكەن شاقىرىلىمدا دا دەپۋتات بولعان ەدى. ول كەزدە "اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ" مۇشەسى بولدى. قىزىلوردا وبلىسىنان دوداعا تۇسكەن-ءدى. مۇرات باقتيارۇلى قازاقستاننىڭ زاڭ شىعارۋشى ورگانىنىڭ جوعارعى پالاتاسىندا قاجىرلى ەڭبەك ەتىپ كەلە جاتقانىن اتاپ ءوتۋدى ءجون كوردىك.

ەسكى سەناتتان قايتا سايلانعان دەپۋتاتتىڭ ءبىرى - ماڭڭىستاۋ وبلىسىنىڭ ۇمىتكەرى - باقىتاي شەلپەكوۆ.

ايتپاقشى، سولتۇستىك قازاقستان وبلىسىنىڭ ەكس-اكىمى ەرىك سۇلتانوۆ مىرزا ەندى دەپۋتات. راس، ەرىك مىرزا اكىمدىك قىزمەتتەن - پارلامەنتكە اۋىسقان العاشقى شەنەۋنىك ەمەس.

الماتى وبلىسىنىڭ اكىمى بولعان اڭسار مۇساحانوۆ دا ەسكى شاقىرىمدى سەناتتا وتكىزدى.  ەكس-اكىمدەر ماجىلىستە دە جوق ەمەس.

سەناتتىڭ وزىندە اۋدان باسشىلارى بولعان ازاماتتار قانشاما.  ەرىك مىرزا دا سولاردىڭ سانىن ەسەلەي جۇرەر.

الداعى ۋاقىتتا سەناتتىڭ 47 ورىنىنا وتىراتىنداردىڭ تولىق ءتىزىمىن جاريا ەتەمىز.

Abai.kz