جۇما, 29 ناۋرىز 2024
ءبىزدىڭ شەنەۋنىك 6387 4 پىكىر 14 ماۋسىم, 2017 ساعات 15:14

پاۆلودار وبلىسى باس يدەولوگىنىڭ ءىسىن قالاي تۇسىنەمىز؟

 

الماتىداعى جازۋشىلار وداعى  ۇيىندە   بەلگىلى اقىن،  قازاقستان جازۋشىلار وداعى  باسقارماسىنىڭ توراعاسى نۇرلان ءورازاليننىڭ  70 جىلدىق مەرەيتويىنىڭ سالتاناتتى كەشىنە   پاۆلودار وبلىسى اكىمدىگىنىڭ  جاۋاپتى قىزمەتكەرلەرىنىڭ ءبىرى يا  جەرگىلىكتى اقىن-جازۋشىلاردىڭ وكىلدەرى  ەمەس،   بۇلارعا  ەش قاتىسى جوق مۇحيت وماروۆ (سۋرەتتە) دەگەن بىرەۋ باردى!..

وبلىس اكىمىنىڭ يدەولوگيا سالاسىنا جاۋاپتى ورىنباسارى مەيرام بەگەنتاەۆقا (سۋرەتتە) قوڭىراۋ شالىپ ءمانىسىن سۇراعانىمدا  م. وماروۆتى  قازاقستان جۋرناليستەر وداعى وبلىستىق فيليالىنىڭ توراعاسى سياقتاندىرىپ  ماداقتاي جونەلدى!  وبلىستىڭ باس يدەولوگىنىڭ جۋرناليستەر فيليالىنىڭ باسشىسى ول  ەمەس، باسقا كىسى ەكەنىن بىلمەيتىنى، جۋرناليستيكا مەن كوركەم ادەبيەتتى ايىرا المايتىنى  زىعىردانىمدى قايناتتى! ال مادەنيەت، ارحيۆتەر جانە قۇجاتتاما باسقارماسى باسشىسىنىڭ  مىندەتىن اتقارىپ جۇرگەن گۇلزيرا باشيروۆا بولسا:  «مۇحيت وماروۆ «ەگەمەن قازاقستان» گازەتىنىڭ باس رەداكتورى بولىپ ىستەگەن جوق پا؟..»  – دەپ وزىمە سۇراق قويدى...

اۋ، اينالايىندار، «ەگەمەن» قايدا، مۇحاڭ قايدا؟!.. مۇحاڭ قايدا، كوركەم ادەبيەت قايدا؟!..

كەڭەستىك كەزەڭدە كومسومول مەن كومپارتيا ۇيىمدارىندا   قىزمەت  ىستەگەن مۇحيت وماروۆتىڭ 1989 جىلى وبلىس مادەنيەت باسقارماسىنىڭ باستىعى قىزمەتىنە كەلگەنىن بىلەمىز.  سونىڭ باسشىلىعى كەزىندە  ايگىلى جەرلەسىمىز، ءانشى-كومپوزيتور مايرا ۋاليقىزى تۇرعان تاريحي  ءۇيدى كۇردەلى جوندەۋدەن وتكىزۋ ءۇشىن بولىنگەن  قوماقتى  قارجىنىڭ ءىز-ءتۇسسىز جوعالىپ كەتكەنى ەسىمىزدە.  وبلىستىق  «سارىارقا سامالى» گازەتىنىڭ  باس رەداكتورى بولىپ ىستەگەن  جىلدارى «نار تۇلعا» قوعامدىق ۇيىمىنا بىرىككەن سوعىس جانە ەڭبەك ارداگەرلەرىنىڭ  ار-ۇجدانىنا تيەتىن ماتەريالداردى جاريالاعانى جادىمىزدا. بۇل ىستەردىڭ جاي-جاپسارى  باق-تا بىرنەشە مارتە ايتىلدى، ءتىپتى قر پرەزيدەنتىنىڭ اپپاراتىنا شاعىم ءتۇسىرىلدى!  وبلىستاعى باس قازاق باسىلىمىن باسقارىپ وتىرعان ادامنىڭ قازاقشا جازعانى قارىن اشتىراتىنى  جانە  شىعارماشىلىق ۇجىمدى اكىمشىلدىك-امىرشىلدىك ادىسپەن باسقاراتىنى تۋرالى دا ايتىلدى،  جازىلدى.

اقىرى، م. وماروۆ زەينەتكە شىققان سوڭ  داۋ-داماي باسىلعان سياقتاندى. سولاي دەسەك تە،  ىشكى ساياسات باسقارماسىنىڭ سول كەزدەگى باستىعى باۋىرجان كاپەنوۆتىڭ قولداۋىمەن 2012 جىلى  جاڭادان اشىلعان «نايزاتاس» جۋرنالىنىڭ باس رەداكتورى قىزمەتىنە بەكىتىلىپ كەتە جازدادى!  ايتەۋىر،  جەرگىلىكتى  اقىن-جازۋشىلار  وبلىس    اكىمىنە ادەبيەتكە ەش قاتىسى جوق ادامنىڭ ادەبي-كوركەم باسىلىمنىڭ باسشىسى بولۋىنا قارسى ەكەندىگىن ايتىپ، نارازىلىعىن بىلدىرگەن سوڭ   كانديداتۋراسى وتپەي قالدى.

مۇحيت وماروۆ قازىرگى كەزدە ج. ايماۋىتوۆ اتىنداعى تەاتردا قىزمەت ەتەتىن كورىنەدى.  شامالاۋىمشا، ءارتىس ەمەس. سونسىن،  باس رەداكتورلىق قىزمەتپەن الدەقاشان قوش ايتىسقانىنا قاراماستان، «باس رەداكتورلار كلۋبى» اتالاتىن قوعامدىق ۇيىمدى باسقارادى...

دەگەنمەن، مۇحاڭا رەنجيتىن ءجونىمىز جوق سياقتى. كەڭەستىك قوعامدا ات ۇستىندە ءجۇرىپ، كەيىن زەينەتكە شىققانىنشا تاق ۇستىندە وتىرعان اعامىز سول شاقتارىن كوكسەيتىن  بولار.  ەندى  جازۋشىلار وداعىندا ءسوز سويلەپ،  ءوزىن جازۋشى كەيپىندە كورسەتۋدەن دە كەت ءارى ەمەس شىعار...  بىراق تورىندە ۇلى مۇحتار اۋەزوۆتىڭ  ىزدەرى قالعان  قازاق ادەبيەتىنىڭ قاسيەتتى قارا شاڭىراعىنا وبلىس اكىمىنىڭ اتىنان  الدەكىمدى  جىبەرگەن مەيرام بەگەنتاەۆتىڭ ءىسىن قالاي تۇسىنەمىز؟

ءوز باسىم ءار جىلدارداعى  وبلىس  باسشىلارىنىڭ  يدەولوگيا سالاسىنا جاۋاپتى ورىنباسارلارى: رىستى جۇمابەكوۆا، ءاليا عالىموۆا،  ارىن ورساريەۆ،  عاني سادىبەكوۆپەن اۋىزبا-اۋىز سويلەسىپ، ءوزارا ءتىل تابىسىپ ءتۇرلى ماسەلەلەردىڭ شەشىمىن تاۋىپ جۇردىك.  راس، كەيبىر ماسەلە بويىنشا ءتىپتى قىزۋ پىكىرتالاسقا بارعان  كەزدەرىمىز دە بولدى. بىراق  ءدال وسىنداي   وتە ىڭعايسىز  جايتتى باستان وتكەرگەن ەمەسپىن.

PS: وبلىس اكىمى بولات باقاۋوۆ مىرزا ءوز ورىنباسارىنىڭ ىسىنە تۇسىنىكتەمە بەرەتىن شىعار دەگەن ۇمىتتەمىز.

 

ارمان قاني،

قازاقستان جازۋشىلار وداعى

پاۆلودار وبلىستىق فيليالىنىڭ ديرەكتورى،

حالىقارالىق «الاش» ادەبي سىيلىعىنىڭ يەگەرى.

Abai.kz

 

4 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3616