قازاق ءتىلىن، مارتەبەسى اتا زاڭدا ايشىقتالىپ تۇرىپ جازىلعان مەملەكەتتىك ءتىلدى كەمسىتەتىن، كەمسىتۋ بىلاي تۇرىپتى، كۇللى دەپۋتتاردىڭ كوزىنشە اشىقتان-اشىق قورلايتىنداردىڭ قاتارىنا تاعى ءبىر پەندە قوسىلدى. ەسىمى – ءانۋار، سويى – تۇگەل. قىزمەتى - رەسپۋبليكالىق ادۆوكاتتار القاسىندا. لاۋازىمى - رەسپۋبليكالىق ادۆوكاتتار القاسىنىڭ توراعاسى. «وۆ»-تى فاميلياسىنان «وتاپ» تاستاعانىنا قاراپ وسى ءبىر ازاماتقا ءىشىمىز جىلىپ، بۇيرەگىمىز بۇرىپ ءجۇرۋشى ەدى. سويتسەك، انەكەڭنىڭ مەملەكەتشىلىدىگى انشەيىن عانا بىردەڭە كورىنەدى. ەگەر ول شىن پاتريوت، وتانشىل، حالىقشىل ازامات بولسا، پارلامەنتتىڭ ماجىلىسىندە «نوتاريات جانە ادۆوكاتۋرا ينستيتۋتتارىن ودان ءارى دامىتۋ جانە رەفورمالاۋ» تاقىرىبىندا وتكەن ۇكىمەت ساعاتىندا دەپۋتاتتىڭ سۇراعىنا جاۋاپ قايتارا وتىرىپ  «پروشۋ وتۆەتي نا رۋسكوم يازىكە. تاك بۋدەت دوستۋپنەي» دەمەس ەدى. الايدا ول دەدى. دەگەندە، دەپۋتات ساۋىتبەك ابدىراحمانوۆقا سولاي ايتتى. ادۆوكاتتار القاسىنىڭ توراعاسى الگىندەي دەپ شالقايعان سوڭ وعان دەپۋتات بىلاي دەپ كەيىستىگىن ءبىلدىردى:

«مەنىڭ سۇراعىم تىلەك تۇرىندە بولادى. رەسپۋبليكالىق ادۆوكاتتار القاسىنىڭ توراعاسى ءانۋار تۇگەلگە. دەپۋتاتتىڭ سۇراعىنا جاۋاپ قايتارا وتىرىپ ءسىز «پروشۋ وتۆەتي نا رۋسكوم يازىكە. تاك بۋدەت دوستۋپنەي» دەدىڭىز. بۇل ءسوزىڭىزدى قالاي تۇسىنۋگە بولادى؟ دەپۋتات ماگەرراموۆتىڭ سۇراعىنا جاۋاپ قايتارعان كەزدە دە سولاي سويلەدىڭىز. سوندا ءسىزدىڭ پىكىرىڭىزشە، جاۋاپتى قازاق تىلىندە قايتارعاندا ويدى «دوستۋپنو» جەتكىزۋدىڭ مۇمكىندىگى جوق پا؟ قازاق ءتىلىن كەمسىتىپ سويلەمەۋدى سۇرايمىن».

قىسقاسى، تۇگەلدەن تۇڭىلدىك. ءانۋارلاردىڭ ءالى كۇنگە قازاق ءتىلىن «جەتىمسىز ءتىل» دەپ تۇسىنەتىن جەتەسىز ويلارى مەن تۇنەك باسقان سانالارىنىڭ شەگىنە جەتە الماي شارشادىق. حالقىم-اۋ، ايتىڭدارشى، بۇلارعا ەندى نە دەۋگە بولادى؟

ءادىلجان قىرىمجان

Abai.kz