29 مامىردا كۇندىزگى ۋاقىتتا ماسكەۋدە الاپات داۋىل تۇردى. جىلدامدىعى سەكۋندىنا 22 مەترگە جەتكەن جەل 600-دەن اسا اعاشتى قۇلاتىپ، شاتىرلاردى ۇشىرىپ اكەتتى، قاقپالار مەن جارناما قۇراستىرماسىن قيراتتى، - دەپ حابارلايدى kaz.tengrinews.kz.

سوڭعى مالىمەت بويىنشا، تابيعي اپاتتان رەسەي استاناسىندا كەم دەگەندە 11 ادام قازا تاۋىپ، 70-كە جۋىق ادام زارداپ شەككەن. جۇزدەگەن كولىك قيراپ، ەلەكتر جەلىلەرى ۇزىلگەن. بۇل تۋرالى "روسسيا-24" تەلەارناسى حابارلادى.

قازا تاپقانداردىڭ ءبىرى - 26 جاستاعى قىزدىڭ ۇستىنە بۇكىلرەسەيلىك كورمە ورتالىعىنىڭ تەرريتورياسىندا اعاش قۇلاعان. دجاۆاحارلال نەرۋ الاڭىندا تاعى ءبىر ەر ادامدى اعاش باسىپ قالعان. ەكى ادام اندرەەۆ جاعالاۋىندا قيراندى استىندا قالعان. ماسكەۋدە داۋىل تۋرالى ەسكەرتۋ جاريالاندى.

قالادا تاڭعا دەيىن جاڭبىر جاۋىپ، نايزاعاي وينايدى جانە بۇرشاق جاۋادى دەپ بولجانىپ وتىر. الەۋمەتتىك جەلى قولدانۋشىلارى داۋىلدىڭ سالدارىن سۋرەتكە ءتۇسىرىپ، جاريالاپ جاتىر.