جۇما, 29 ناۋرىز 2024
باسە... 4539 0 پىكىر 29 مامىر, 2017 ساعات 11:15

قاراساي اۋدانىندا كۇنىنە 500 ليتر شىرىن وندىرەدى

قاراساي اۋدانىنا قاراستى ۇشقوڭىر اۋىلىنداعى «كەرۋەن» اگروفيرماسىنىڭ ىرگەتاسى سوناۋ 2009 جىلى قالانىپتى.

اتالمىش اۋىلشارۋاشىلىعى قۇرىلىمى  جەمىس-جيدەك ءوندىرىسىن قالپىنا كەلتىرۋدى ءاۋ باستا ماقسات ەتىپ قويعان. وسىلايشا ولار الدىمەن باقشاعا ارنالعان جەر الىپ، الما مەن المۇرت ءوسىرۋدى قولعا الادى. بۇگىندە اگروفيرماعا تيەسىلى 100 گەكتار القاپتا «گولدەن دەليشەس»، «رەد دەليشەس»، «ايدارەد» جانە ءۇش گەكتار الاپتا «تالعار ارۋى» المۇرت باعى كۇتىمگە الىنىپ وتىر.
الما مەن المۇرت ءوسىرۋدى جولعا قويعاننان كەيىن ءونىمدى ساقتاۋ مەن وڭدەۋ ماسەلەلەرى تۋىندايتىنى بەلگىلى. بۇل ماسەلەگە دە جاۋاپكەرشىلىكپەن كەلگەن ماماندار اۋماعى ءبىر گەكتار بولاتىن جەردە گەرمانيانىڭ «PLATTENHARD & WIRTH GMBH» فيرماسى تەحنولوگياسى نەگىزىندە ءبىر مەزگىلدە 2200 توننا ءونىم ساقتاۋعا قابىلەتتى قويما قۇرىلىسىن جۇرگىزگەن بولاتىن. مۇندا ورناتىلعان 11 توڭازىتقىش كامەراسى سالقىنداتىپ قانا قويماي، ارنايى گازبەن تولتىرىلعان اۋانى ۇستاپ تۇرا الادى. مۇنىڭ ىشىندە ءتورت كامەرا ەرەكشە تەمپەراتۋرالىق رەجيمدى قامتاماسىز ەتۋگە نەگىزدەلگەن. ال، گوللانديالىق «Greefa» كومپانياسىنىڭ قۇرىلعىلارى ساعاتىنا 2 توننا ءونىمدى سالماعىنا، كولەمىنە، تۇسىنە قاراي اۆتوماتتى تۇردە سۇرىپتاپ، قوراپتارعا سالىپ وتىرادى. سول سياقتى، جەمىستى قابىلداپ الۋ، ءتۇسىرۋ مەن تيەۋ جۇمىستارى دا تولىق اۆتوماتتاندىرىلعان.
العاشىندا الما مەن المۇرتتى ءوسىرىپ، تۇتىنۋشىلارعا جەتكىزۋدى جولعا قويعان اگروفيرما 2016 جىلدان باستاپ اۆستريالىق «Kreuzmayr Maschinenbau GmbH» كومپانياسىنىڭ تەحنولوگياسى بويىنشا تىكەلەي سىعىمداۋ ارقىلى جەمىس شىرىنىن شىعارۋ ءوندىرىسىن ىسكە قوسقان. قازىر اتالمىش تسەحتا الما، الما-ءسابىز جانە الما-قىزىلشا قوسىندىسىنىڭ شىرىندارى مەن الما پوۆيدلوسى وندىرىلەدى. كۇنىنە 500 ليتر شىرىن وندىرەتىن تسەح ءبىر جىلدا 500 توننا جەمىستى وڭدەۋگە قابىلەتتى.
– قازىر ءبىزدىڭ باقتىڭ 54 گەكتارى تامشىلاپ سۋارۋ جۇيەسىمەن قامتاماسىز ەتىلگەن. تاياۋ ۋاقىتتا تاعى دا 31 گەكتار باقشالىق وسى ادىسپەن سۋارىلاتىن بولادى، – دەيدى اگروفيرمانىڭ ديرەكتورى ءسابيت نۇرتازين. –  سونىمەن قاتار تومات ءوسىرۋدى دە قولعا الىپ، جىلىجاي قۇرىلىسىن جۇرگىزۋ ءۇشىن اكىمشىلىكتەن قوسىمشا ءتورت گەكتار جەر سۇراپ وتىرمىز. وسىلايشا، وتانداستارىمىزدى ەشقانداي كونسەرۆانتسىز، قانت قوسپاسىنسىز، ەكولوگيالىق جاعىنان تازا الما جانە قىزاناق شىرىندارىمەن قامتۋدى ماقسات ەتىپ قويدىق.
اگروفيرمادا 30-عا جۋىق جەرگىلىكتى تۇرعىندار ەڭبەك ەتەدى. اتالعان جوبالار جۇزەگە اساتىن بولسا، جالاقىسى 100 مىڭ تەڭگەدەن اساتىن جۇمىس ورىندارى  كوبەيە تۇسپەك.  جۇمىسشىلاردى تاسىمالداۋ، تاماقتاندىرۋ ماسەلەسى دە وڭدى شەشىمىن تاپقان. توڭازىتقىشتار ورناتىلعان عيماراتقا جۋىنىپ، ارنايى كيىممەن عانا كىرەتىن قىزمەتكەرلەر تازالىق ماسەلەسىنە اسا جاۋاپكەرشىلىكپەن قارايدى. مۇندا ادامداردىڭ الەۋمەتتىك جاعىنان تولىق قورعالعانىن دا ايتا كەتۋ كەرەك.

قۋات قايرانباەۆ

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1571
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3565