جۇما, 29 ناۋرىز 2024
بۇ نە مازاق؟ 8077 4 پىكىر 24 مامىر, 2017 ساعات 13:33

قازاقتىڭ ءانىن، ۇلتتىق كيىمىن مازاق ەتكەندەرگە استانا ءتورىن بەرمەك

ورىس تەلەەفيرىنىڭ "قوقىسحاناسى" سانالاتىن "تنت" ارناسى قازاق ءانىن مازاق ەتتى. اسىرا ايتىپ، بالە قۋعانىمىز ەمەس. جاقىندا رەسەيلىك "تنت" ارناسىنداعى "Comedy Club" باعدارلاماسى قازاق ءانىن ءاجۋالاپ، ۇلتتىق كيىمدى قورلايتىن ءازىل كورسەتتى.

بوقاۋىز سوزدەردى بەيپىل ايتىپ، بەيادەپ اندەر ورىندايتىن "USB" دەيتىن توپ (پسەۆدو-انشىلەر توبى) "تنت" ساحناسىندا قازاق ءانى دە ايتىلۋى كەرەك دەگەندى سىلتاۋراتىپ، ۇلتارالىق ارازدىقتى تۋدىراتىن ساياسي پروپاگاندا جاسايدى.

ءسويتىپ، ەسىم-سويى قازاققا جات "سىڭىلدىق تارانباەۆ" دەيتىن "قازاق" جىگىتىن ساحناعا شىعارىپ، تۇسىنىكسىز تىلدە ءان ايتقىزادى. بۇل ۋاقتا وزدەرى قازاقتىڭ ۇلتتىق كيىمىن كيىپ، ەكىنشى پلاندا ەربەڭدەپ جۇرەدى.

"Comedy Club" ماقامىنداعى بۇل ءازىلدىڭ اراسىندا قىزتەكەلىكتى اشىق ناسيحاتتايتىن "USB" توبى: "سىڭىلدىق ەسكى قازاق تىلىنەن اۋدارعاندا تارانباەۆ دەيتىڭ باي مۇنايشىنىڭ ۇلى دەگەندى بىلدىرەدى. پاشا، "Comedy Club"-تى قازاقستاندا دا جاقسى كورەدى. ال مىنا ساحنادا تەك ورىس انشىلەرى عانا ونەر كورسەتەدى. سوندىقتان ءبىز وزىمىزگە تيەسىلى ەفير ۋاقىتىن قازاقستان-رەسەي قارىم-قاتىناسى جولىندا قۇربان ەتتىك" دەيدى.

وتكەن جىلى ناتو-نىڭ جانىنان قۇرىلعان "Stratcom Center of Excellence" زەرتتەۋ ورتالىعى ورىس تەلەەفيرىندەگى ويىن-ساۋىق باعدارلامالارىنا تالداۋ جاساپتى. زەرتتەۋ ناتيجەسىندە، رەسەيلىك ءبىرسىپىرا  تەلە باعدارلامالارداعى (ويىن-ساۋىق) باتىس ەدەرى باسشىلارىن، ناتو مەن ۋكرايناداعى، تۇركياداعى، قىتاي مەن قازاقستانداعى ساياسي جاعدايلاردى سىنايتىن، كەلەمەجدەيتىن ساياسي ازىلدەرگە تولى بولىپ شىققان.

وعان قوسا، "فوربس" جۇرگىزگەن زەرتتەۋ بويىنشا، رەسەيلىك "كۆن" باعدارلاماسى كرەملدىڭ نەگىزگى ساياسي پروپاگانديسى بولىپ شىقتى. كوبىنە كوپ دەزينفورماتورلىقپەن اينالىساتىن ورىس تەلەەفيرى قاتاڭ باقىلاۋدا ەكەنى بەلگىلى. ال كوپشىلىك ءسۇيسىنىپ كورەتىن "كۆن" ويىندارى كگب ارنايى جوباسى نەگىزىندە قايتا اشىلعانى بەلگىلى بولدى.

ءبىز نەگە "كۆن" تۋرالى ءسوز قوزعادىق. ويتكەنى رەسەيلىك "كۆن"-ءنىڭ جازعى كۋبوگىن ساراپقا سالاتىن فەستيۆال استانادا وتەدى.

كەرەك دەرەك، سوڭعى ونشاقتى جىلدىڭ شەگىندە قازاقستان قۇراماسى الەكساندر ماسلياكوۆتىڭ ويىنىنا تۇراقتى قاتىسقانىمەن، بىردە-ءبىر رەت جەڭىمپاز اتانعان جوق. كۆن ويىندارى تاريحىنا كوز جۇگىرتسەك، فەستيۆالدىڭ باس جۇلدەسى كرەمل اۋا-رايىنا قاراي تاراتىلىپ وتىرادى. ال باس قازى كونستانتين ەرنەست دەيتىن تمد-داعى ءنومىرى ءبىرىنشى دەزينفورماتور.

ءبىر قىزىعى استانالىق شەندىلەر وزگە ەمەس، ءدال وسى پرو-كرەملدىڭ پروپاگانديستەرىنىڭ ارزانقول ازىلدەرىنە اۋەس بولىپ شىقتى. ولاي دەيتىنىمىز، جاڭاعى "Comedy Club" استانادا كەش وتكىزبەك. ارنايى شاقىرتۋ الىپ، "ەنەرگيا حولل" سارايىندا ءازىل وينايتىن رەسەيلىك سايقىمازاقتار بۇعان دەيىن دە حالىقارالىق ساياساتتاعى وزگەرىستەردى كەلەمەجدەيتىن ازىلدەر كورسەتىپ، باتىس ەلدەرى ليدەرلەرىن اشىق اجۋالاعان-تىن.

ال ءبىزدىڭ كەيبىر شۇيكەباس شەندىلەر شاتاققۇمار ارنانىڭ "شالبارسىز" ارتىستەرىن اسپەتتەمەك.

وسىعان دەيىن استاناعا جالاڭ اياق، جالاڭ بۇت ءجۇرىپ ءان سالاتىن باربادوستىڭ بادەندى بيكەشى رياننا كەلەدى دەپ كۇتكەن.

وتكەن جولى ورىس تەلەەفيرىنىڭ توسەكتەگى تەورەتيگى ۆلاديمير سولوۆەۆ كەلىپ كەتتى.

بۇلاردىڭ بارلىعى دەرلىك تەگىن كەلىپ، قازاقتى جارىلقاپ جاتقان جوق. ارنايى الدىرتقاندىقتان، قىرۋار قارجى الىپ قايتادى.

ءبىزدىڭ جالقى سۇراق: قازاقتىڭ ءانىن، ۇلتتىق كيىمىن مازاق ەتكەندەرگە استانا ءتورىن بەرمەك پە؟ قر مادەنيەت جانە سپورت ءمينيسترى باس بولىپ، بوقاۋىز سوزدەردى بەيپىل ايتاتىن "Comedy Club" پەن گوموسەكۋاليزمدى اشىق دارىپتەيتىن "USB" توبىنا ءتيىستى شارا قولدانۋ كەرەك!

نۇرگەلدى ابدىعانيۇلى

Abai.kz

4 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3551