سەيسەنبى, 10 جەلتوقسان 2019
جاڭالىقتار 1626 1 پىكىر 5 ءساۋىر, 2017 ساعات 16:42

قازاقستاندا «تابليعي جاماعات» «مۇشەلەرى» سوتتالدى

وڭتۇستىك قازاقستان وبلىستىق سوتى ەلدە تىيىم سالىنعان «تابليعي جاماعات» ءدىني ۇيىمىنىڭ يدەياسىن ناسيحاتتادى دەگەن ايىپپەن جەرگىلىكتى جەتى تۇرعىندى ءارتۇرلى مەرزىمگە باس بوستاندىقتارىنان ايىردى.

توپتىڭ ليدەرى جانە ونىڭ جاقتاستارى دەلىنگەن ءتورت ادام ءتورت جىلعا تۇرمە جازاسىنا كەسىلسە، قالعاندارىن ءبىر جىلعا جالپى قونىستانۋ مەكەمەسىنە جىبەرۋ تۋرالى شەشىم شىعارعان. جەتەۋى دە سوت زالىندا قاماۋعا الىنعان.

توپ وتكەن جىلدىڭ قاراشا ايىندا ۇلتتىق قاۋىپسىزدىك كوميتەتى تاراپىنان ۇستالعان.

تەرگەۋ ءىسىنىڭ مالىمەتىنە قاراعاندا، توپتىڭ ەكى بەلسەندىسى «تابليعي جاماعات» ۇيىمىنا 2000 جىلدىڭ باسىندا كىرىپ، شەتەلدە ءدارىس الىپ قايتقان. سوت ماتەريالدارى بويىنشا، ولار قارابۇلاق جانە قاراسۋ اۋىلدارىنداعى مەشىتتەر مەن ۇيلەردە ۇگىت-ناسيحات جۇمىستارىن جۇرگىزگەن. سوت بارىسىندا ولار وزدەرىنە تاعىلعان ايىپتاردى مويىنداماعان.

«تابليعي جاماعات» ۇيىمىنا قازاقستاندا 2013 جىلدىڭ اقپان ايىنان بەرى تىيىم سالىنىپ، ەكسترەميستىك ۇيىمداردىڭ قاتارىنا ەندى. سوت شەشىمىنە سايكەس، ۇيىمنىڭ ماقساتى ايماقتاردا يسلام حاليفاتىن قۇرۋ.

اباي-اقپارات

1 پىكىر