سارسەنبى, 13 قاراشا 2019
ادەبيەت 3328 0 پىكىر 3 ءساۋىر, 2017 ساعات 11:48

مەن ۇققان ءۇش سىر

قالامگەر، ومىردە ارقاشان وقيعا ءھام ءوزىنىڭ كەيىپكەرىن ىزدەۋ ۇستىندە بولادى... بىردە، كۇندەلىكتى تىرشىلىكپەن تاڭسارىدە ۇيدەن جۇمىسقا قاراي اسىعىپ بارا جاتقان Cامال، ۋاقىتتىڭ تىعىزدىعىنا بايلانىستى تاكسي ۇستاۋىنا تۋرا كەلدى. قولىن كوتەرگەنى سول ەدى، لەزدە العاشقى كولىك تە توقتاي قالدى، جولى بولدى دەگەن وسى شىعار... كولىكتىڭ ىشىندە ەكى جولاۋشى بار ەكەن، شاماسى قۇربىلار... تاڭ ازانىمەن ءبىرى ەكىنشىسىنە بار شەرىن اقتارا اعىل-تەگىل جىلايدى كەپ... سامال، ءدال جاندارىندا وتىرعاندىقتان اڭگىمەلەرى بۇكپەسىز ەستىلىپ وتىردى.

- بىلەسىڭ بە، مەن بۇگىنگى كۇنگە دەيىن بارلىعىنا ءشۇباسىز سەنىپ كەلدىم... ومىرگە، ادامدارعا، دوسقا، ماحابباتقا، جارعا، ءتىپتى بوتەنگە دە. الىسىمدى جاقىن تانىپ، تانىسىمدى تۋعانىمداي كوردىم. بالا كوڭىلدەي كۇمانسىز سەندىم... بىراق، سەنىمنىڭ وسىنشاما قيانات جاسارىن، تاعدىرىما ساباق بولارىن بىلسەمشى؟! ءدال بۇلاي سەنىمنەن دە جاپا شەگەتىنىمدى بىلگەندە بۇكىل الەمگە سەنبەس ەدىم عوي... سەندىم دە ءسۇيدىم، ورتا جولدا بالا-شاعامەن كوز جاسىما قاراماستان وپاسىزدىق جاسارىن ءبىلدىم بە؟! ارلانااام... وكسىك بەيتانىس ايەلدىڭ تاماعىنا كەلىپ تىرەلدى.

بۇل اڭگىمەگە كۋا بولعان سامال ءۇنسىز وي ۇستىندە جۇمىسقا قاراي بەتتەدى. ناعىز شايقاس وي ۇستىندە بولادى ەكەن-اۋ ءسىرا... جۇمىس ۇستەلىنە جايعاسىپ، كەشەگى جازعان ماقالاسىن پىسىقتاپ باسپاعا ۇسىنباق ماقساتتا بولسا دا، بولعان وقيعا ەشتەڭەگە مۇمكىندىك بەرەر ەمەس. وي الەمىندە سۇراق-جاۋاپ شايقاستار... اقيقات ىزدەدى، جارالى ايەل زاتىنىڭ نازىكتىگىنە قورعان بولعىسى كەلدى، سارپ ەتكەن كەزەك-كەزەك ساۋالدارعا جاۋاپ تاپقىسى كەلدى...

– كەيدە قوعامنان اقيقات ىزدەپ شارلايمىز، ادامدار اراسىندا سەنىم جوعالدى دەپ ۇكىم شىعارامىز، سەزىمنەن ادالدىق كۇتەمىز... بۇگىنگى قوعامدا بارلىعى ەسەپپەن دەپ شورت كەسە نۇكتەسىن قويامىز. ماسەلەنى كوتەرىپ سايراۋ وڭاي، بىراق كەز-كەلگەن تاعدىردىڭ تۇپكى تاريحىنا ۇڭىلدىك پە؟  تەكتىلىكتى جالعاستىرعان نامىستى ەر ازامات بولسا، بۇگىندە شاڭىراقتاعى انا ءتىرى جەسىر، ۇل-قىزى ءتىرى جەتىم بولىپ قالار ما ەدى؟! ەر اعالارىمىزدىڭ رۋحى بيىك بولسا شاڭىراقتاعى بيلىكتى ايەلگە بەرىپ، اتا-انالارىن قارتتار ۇيىنە قاڭعىرتپاس ەدى... ازاماتتارىمىزدىڭ نامىسى بەرىك بولسا، كوشە بويىن قازاق قىزدارى جاعالاۋشى ما ەدى؟! تاستاندىلار كوبەيىپ، جەتىمدەر ۇيىنە كۇن سايىن سابيلەر قوسىلماس ەدى... جاقسى قىزدار جوق قوي دوسىم، قىزىل كىتاپقا ەنگەلى قاي زامان دەپ مىرس ەتىپ، كەۋدەمىزدى كەرەمىز... پەرىشتەدەي ادالدىق ىزدەۋ ارلى ادامدى ارلاندىرار مۇمكىن؟! ايتا بەرسەڭ كوپ قوي جىرتىققا جاماۋ ىزدەيتىن ساتتەرىڭ... وسىلاي ىشتەگى الەمىمەن جانتالاسا ىشتەي كۇبىرلەپ، ەرىكسىز تاماعىنا وكسىك، كوزىنە جاس كەلدى.

بۇل وقيعادان ۇققان ءۇش سىر دەپ تۇيىندەدى، سامال. سەنىم – عۇمىرىمىزداعى ءبىر ۇزىن ءجىپ. ادالدىق – ادامنىڭ ساناسىنا عانا ەمەس جۇرەگىنە بايلانىستى ەكەن.  ەر – ەلدىكتىڭ نەگىزى عانا ەمەس، ومىردەگى سەنىمنىڭ وزەگى.

ويىن جيناقتاعانداي بولىپ، ەڭ باستىسى قۇدىرەتى شەكسىز اللاعا دەگەن سەنىم جوعالماسىن دەپ ءتاۋباسىنا كەلدى...

سالتانات ەسەنقۇلوۆا

Abai.kz

0 پىكىر