مۇنداي ويدى قر پاتريوتتار پارتياسىنىڭ جەتەكشىسى عاني قاسىموۆ كوتەرىپ وتىر.

ەكس-سەناتوردىڭ پىكىرىنشە، قۇرىلاتىن بولاشاق ۇيىم تاپ وسىلاي – ياعني، «مەملەكەتتىك كوشى-قون قىزمەتى» دەپ اتالعانى ءجون. «بۇل ۇيىم تەك قانا مەملەكەت باسشىسىنا باعىناتىن بولسا جانە قازاقستاننىڭ شەكاراسىنان بەرى وتكەن ادام مەن ءارى وتكەن ادامنىڭ ءاربىرىن ءجىتى قاداعالاپ، باقىلاپ وتىرسا!» دەيدى ساياساتكەر.

ع.قاسىموۆ كوشى-قون ساياساتىن ۇلتتىق قاۋىپسىزدىگىمىزدىڭ ەڭ نەگىزگى ماسەلەسى دەپ قاراستىرعاندى قۇپ كورەدى. ونىڭ ايتۋىنشا، ەگەر الگى ۇيىم قۇرىلىپ، ءتارتىپ كۇشەيەتىن بولسا، ەلىمىزگە كورشى ەلدەردەن كوپتەپ كەلىپ جاتقان كەلىمسەك-گاستاربايتەرلەر تاسقىنىنا دا ەداۋىر توسقاۋىل بولار ەدى. قازىر الەم ەلدەرىنىڭ كوپشىلىگى سىرتتان كەلەتىن جۇمىس كۇشىنىڭ شامادان تىس كوبەيىپ كەتۋىنەن زارداپ شەگىپ وتىر. بۇل قاتارعا «مەيماندارى» مەيلىنشە ارتىپ كەتكەن رەسەي دە كىرەدى.

«بىزدە قازىر شەتەلدىكتەردى كىم كورىنگەن شاقىرا بەرەتىن بولدى: تۋريستىك ۇيىمدار، جەرگىلىكتى اتقارۋ ورگاندارى، مينيسترلىكتەر... سوسىن ول كەلىمسەكتەر قايدا كەتەدى، جالپى ولار كىمدەر وزدەرى – ءبىز مۇلدە قاداعالامايمىز. كەشەگى فرانتسياداعى جاعداي ءبارىمىزدى دە ويلاندىرۋعا ءتيىس. كوشى-قون ساياساتى جۇيەلى جۇرگىزىلمەگەن جەردە ونداي ماسەلە تۋىنداماي تۇرمايدى. سوندىقتان ءبىزدىڭ ەلدە دە كوشى-قون ساياساتى ەشقانداي ۆەدوموستۆونىڭ، ءتىپتى ىشكى ىستەر مينيسترلىگىنىڭ دە قۇزىرىندا قالماۋى كەرەك! بۇل سالا تىكەلەي ەلباسىنىڭ ءوز باقىلاۋىندا بولعانى ءجون» دەيدى عاني قاسىموۆ.

ەلدەگى كوشى-قون قىزمەتىنىڭ قازىرگى جاي-كۇيى مەن باعىت-باعدارى شەتتەگى مىڭ-ميلليونداعان قانداستارىمىزدى اتاجۇرتىنا ورالتۋدان گورى سول الگى كەلىمسەكتەر مەن گاستاربايتەرلەرگە جولدى كەڭىرەك اشىپ تۇرعانىن ەسكەرسەك، بۇل سالاعا قۇرىلىمدىق تۇرعىدان دا، ماقساتتى ءھام جۇيەلى جۇمىس جونىنەن دە ۇلكەن وزگەرىستەر كەرەك ەكەنى انىق.

Abai.kz