اۆستريالىق اقپارات اگەنتتىكتەرى ۆەنادا “نۇربانك” توپ-مەنەدجەرلەرىنىڭ ولىمىنە قاتىستى سوت پروتسەسى باستالعانىن حابارلاپ جاتىر.  

سونىمەن، قازاقستاندىق بانكيرلەر جولداس تەمىراليەۆ پەن ايبار حاسەنوۆتى ۇرلاۋ جانە ءولتىرۋ فاكتى بويىنشا ايىپتالعاندار اۆستريالىق القا بيلەردىڭ الدىندا وتىر. ولار: ءالنۇر مۇساەۆ پەن ۆاديم كوشلياك.

اتىشۋلى ءىس بويىنشا باستى كۇدىكتى راحات اليەۆ قايتىس بولعاننان كەيىن ەندى بارلىعىنا اتالعان ەكەۋى جاۋاپ بەرمەك.

“ينتەرفاكستىڭ” دەرەگىنە سۇيەنسەك، سوت توراعاسى اندرەاس بەموم سوت پروتسەسىنە 16 القا ءبيىن تاعايىنداعان. باق نازارىنداعى پروتسەستە قاۋىپسىزدىك شارالارى بارىنشا كۇشەيتىلگەن كورىنەدى. سوت زالىنا كىرمەس بۇرىن قاتىسۋشىلار جىلجىمالى قاۋىپسىزدىك شليۋزدەرى ارقىلى وتۋدە. سونداي-اق، سوت كۇزەتى قىزمەتكەرلەرىنىڭ سانى دا ۇلعايتىلعان.

بىلەسىزدەر، 24 اقپاندا قازاقستاننىڭ اۆسترياداعى بۇرىنعى ەلشىسى راحات اليەۆتىڭ اۆستريا اباقتىسىندا ءولى دەنەسى تابىلعان. تەرگەۋشىلەر بۇرىنعى ديپلوماتتىڭ ءوز-وزىنە قول جۇمساعانىن مالىمدەدى.

اۆستريالىق قۇقىق قورعاۋ ورگاندارى ەكس-ديپلوماتتى وتكەن جىلى 5 ماۋسىمدا قۇرىقتاعان-دى. اقپارات اگەنتتىكتەرىنىڭ حابارلاۋىنشا، مۇساەۆ پەن كوشلياكقا قاتىستى سوت پروتسەسى ءبىر ايعا جالعاسادى. وسى ۋاقىتتا ءۇش ەكسپەرت پەن الپىستان استام كۋاگەر تىڭدالماق.

ءالنۇر ءالجاپپارۇلى مۇساەۆ – راحات اليەۆتىڭ سەرىكتەسى. ول 1989 – 94 ج. قر ۇلتتىق قاۋىپسىزدىك كوميتەتى ءبولىم باستىعىنىڭ ورىنباسارى، ءبولىم باستىعى، باسقارما باستىعى، 1994 – 95 ج. قر ءىىم-ءنىڭ ۇيىمداسقان قىلمىس پەن سىبايلاس جەمقورلىقپەن كۇرەس باس باسقارماسىنىڭ باستىعى، 1995 – 97 ج. قر پرەزيدەنتىنىڭ كومەكشىسى، قر پرەزيدەنتىنىڭ كۇزەت قىزمەتى باستىعىنىڭ ورىنباسارى، 1997 – 99 ج. قر ۇلتتىق قاۋىپسىزدىك كوميتەتى توراعاسىنىڭ ورىنباسارى، توراعاسى قىزمەتىن اتقاردى. «ۇلتتىق قاۋىپسىزدىك ورگاندارىنىڭ قۇرمەتتى قىزمەتكەرى» بەلگىسىمەن ماراپاتتالعان. گەنەرال-مايور. ال، ۆاديم كوشلياك راحات اليەۆتىڭ جەكە وققاعارى بولعان.

Abai.kz