جۇما, 29 ناۋرىز 2024
ماسقارا! 7697 0 پىكىر 28 مامىر, 2015 ساعات 14:09

قازىعۇرت اسۋىنداعى «اكجۋسەلدىڭ» بىلىعى

 

قازاقستان رەسپۋبليكاسىنىڭ پرەزيدەنتى

نۇرسۇلتان ءابىشۇلى نازارباەۆقا

“قازىعۇرت اسۋىنداعى جول قۇرلىسىنىڭ

حالىققا كەلتىرگەن

                                   زالالى جانە قۇرلىستىڭ توقتاپ قالعانى تۋرالى” حات

                                اسا قادىرمەنتى نۇرسۇلتان ءابىشۇلى!

       2014 جىلدىڭ ماۋسىم ايىنان باستاپ رەسپۋبليكالىق ماڭىزى بار شىمكەنت-تاشكەنت اسفالت جولىن قايتا سالۋ باستالدى. بۇل ۇلى جىبەك جولىن جاڭعىرتۋعا ارنالعان قىتاي – باتىس ەۋروپا حالىقارالىق ءدالىزىنىڭ ءبىر تارماعى. جوبانى حالىقارالىق قۇرىلىمدار قارجىلاندىرۋدا.            العاشقى جوسپار بويىنشا ونىڭ قازىعۇرت اسۋىنداعى بولىگىن “اكجۋسەل” جشس-ءى سول جىلدىڭ قاراشا ايىنا دەيىن ىستەپ بىتىرەتىن بولىپتى. بىراق جوسپار “اكجۋسەل” جشس-ءنىڭ كاسىبي سايازدىعىنان، جۇمىستى ۇيىمداستىرا المايتىندىعىنان، باس مەدىگەردىڭ، وبلىستىق «وڭتۇستىكجوللابوراتوريا» باسقارماسىنىڭ نۇسقاۋلارىن تىڭدامايتىعىنان ورىندالمادى. ۇيىمنىڭ ديرەكتورى شوقان سىزدىقوۆ جۇمىس باسىندا ءبىر، نەمەسە بىرنەشە ايدا ءبىر رەت كورىنىپ، باسقا جاقتاعى ونداعان فيرما – كورپوراتسياسىمەن، سايرانداۋمەن اۋرە. “اكجۋسەل” جشس-ءنىڭ بۇرىن جول قۇرلىسىمەن ناتيجەلى اينالىسپاعانى، ماماندارىنىڭ بىلىكسىزدىگى، ش.سىزدىقوۆتىڭ  مامان ەمەستىگى بايقالادى. سوندىقتان جۇمىستىڭ ءجۇرىسى سالعىرت بولىپ، ءوز بەتىمەن كەتىپ، توقتاپ قالعانى.

(قازىعۇرت اسۋىنداعى كورىنىستەر)

ارينە باستاپقى جوبادان العاشىندا-اق كەمشىلىك شىعىپ، جۇمىس كولەمى ۇلعايدى – جول تەرەڭدەتىلىپ، ەكى جاعىنداعى بەتكەي جونىلدى. تەرەڭدەتىلۋى قاجەت بولعانىمەن، ەكى جاعىن جونۋ الدىن الا جان-جاقتى زەرتتەۋ، ساراپتامادان وتكىزىلىپ، زاڭدارعا سايكەس بەكىتۋ ارقىلى ەمەس، تەك اتالعان جشس-ءنىڭ ديرەكتورى ش.سىزدىقوۆتىڭ ەركىمەن باستالىپ، قوشتالىپ ىستەلدى. سوڭىنان زاڭداستىرىلعان بولۋى دا مۇمكىن.                 

وسىلايشا الدىن الا تالقىلانىپ، نەگىزدەلمەگەندىكتەن جۇمىس كولەمى، قارجى شىعىنى دالەلسىز كوبەيىپ، ونى ىستەۋ كەزىندە قورشاعان ورتاعا، سول ماڭداعى شارۋاشىلىقتارعا قىرۋار زيان كەلتىرىلدى. حالقىمىز نۇح پايعامبارعا بايلانىستى قاسيەتتى جەر سانايتىن ايماقتىڭ ويپاڭ-تويپاڭى شىعارىلىپ، بىرنەشە ونداعان گەكتار جايىلىم، شابىندىق، ەگىس ەگەتىن جەر جارامسىزداندىرىلىپ، كۇيزەلىستەن قينالىپ وتىرعان ەل ودان بەتەر قينالا تۇسۋدە:

 

ەگەر بۇل جۇمىس ويلاستىرىلىپ ىستەلگەندە، وتكەن جىلعى كۇزگە دەيىن جولدىڭ تىم بولماسا ەكى قاتار كولىك جۇرەتىن ءبىر تىلكەمىن ۋاقىتشا پايدالانۋعا بەرىپ، قىس ايلارىندا كولىكتىڭ ءبىر باعىتتاعىسىن بۇل جولعا بۇرۋعا بولار ەدى. ءسويتىپ ەسكى جولداعى شىمكەنت-اقتاس-رابات-ق.مامبەت مارشرۋتىندا كولىك ازايىپ، ولاردىڭ وپاتقا ۇشىراپ، ادامداردىڭ قازا تابۋى سيرەر ەدى. الايدا سىقاقشى اقىن اسقار توقماعامبەتوۆ ايتقانداي “باسسىز باستىق” ولاي ەتە المادى. ول ءوزىنىڭ وسى اسۋداعى جول جاعاسىنداعى “قاناعات” كافەسىنە زاقىم كەلتىرگىسى كەلمەستەن جۇمىستى شىعىس جاقتان باستاپ، باتىس جاعىن ەكىنشى كەزەكتە، كۇزدە ىستەدى (بۇل ۋاقىتقا دەيىن ءوز كافەسىنە زيان كەلتىرمەۋدىڭ جولىن تاپقان بولسا كەرەك.). باتىس جاقتىڭ توپىراعىن تاسۋشى ونداعان، بىرىنەن سوڭ ءبىرى ءتىزىلىپ كەلە جاتقان كولىكتەر، جولدىڭ شىعىس جاقتاعى ۋاقىتشا پايدالانۋعا بولاتىن تىلكەمىن كەسىپ ءوتىپ وتىردى. سوندىقتان بۇل دايىن تىلكەمىارقىلى كولىك جۇرگىزۋگە بولمادى. ەگەر الدىمەن جولدىڭ باتىس جاعى ىستەلگەندە، قازان ايىنا دەيىن ءبىتىپ، ول ارقىلى ۋاقىتشا كولىك جۇرگىزۋىگە بولار ەدى. سوندا جولدىڭ شىعىس جاعىندا ىستەپ جاتقان كولىكتەر، توپىراقتى شىعىس جاقتا ورنالاسقان قويماعا كەدەرگىسىز تاسي بەرەر ەدى. ءسويتىپ ءبىر-ءبىرىنىڭ جولىن كەسپەي شىمكەنت–تاشكەنت باعىتىندا جولدىڭ باتىس جاعىنداعى تىلكەمىمەن ءوتىپ جاتقان كولىكتەر بۇلارعا، بۇلار ولارعا كەدەرگى بولماس ەدى. جولدىڭ ەكى جاعىنداعى جوتالاردىڭ شىعىس جاعىن قىرناۋ تامىز ايىندا، قارسى بەتى جەلتوقسان ايىندا تامامدالدى. قىرناۋ بىتكەن سوڭ، قىرتىسى بۇلىنگەن توبەلەردەن جاڭبىر، قار سۋى بەيتاراپ جاققا اعىپ كەتەتىن ناۋالار قويىلىپ، اعاش ەگىلۋى ءتيىس ەدى. الايدا بۇل جاسالمادى. سوندىقتان اتالعان سۋلار جالاڭاشتالعان توبەلەردىڭ توپىراعىن شايىپ، ەروزيالاندىرۋدا. بۇل ەكولوگيالىق اپاتقا جەتەلەۋدە:

قوسىمشا جۇمىس كولەمى شىلدە ايىنىڭ باسىندا انىق بولدى. دەمەك “اكجۋسەل” جشس-ءنىڭ بۇل جەرگە قاجەتىنشە كۇش جيناپ، كەستە بويىنشا جولدى بىتىرۋگە ۇمتىلۋى ءتيىس ەدى. بىراق ونى ويلاۋعا رەسپۋبليكا بويىنشا ونداعان كاسىپورىنى بار ش.سىزدىقوۆتىڭ قولى تيمەدى. ويتكەنى ول ءتيىستى قارجىسىن ونسىزدا الادى، جاۋاپكەرشىلىكتەن قورعايتىن “كوكەسى” بار. ال، وسىنداي دۇمشە باستىقتىڭ تىرىلىگىنەن سورلاپ، قينالىپ جاتقان دا، وپاتقا ۇشىراپ، مەرت بولىپ جاتقان دا حالىق.

باياندالعان كەلەڭسىزدىكتىڭ سالدارىنان جول وقيعاسى كۇرت كوبەيىپ،   ادامدار مەن كولىكتەر وپات بولدى. ويتكەنى نەگىزگى جول وسىلايشا ىستەن شىعارىلعاندىقتان، شىمكەنت-تاشكەنت-اشحاباد باعىتىنداعى كولىكتەردىڭ بارلىعى ەسكى جولمەن،  شىمكەنت-اقتاس-رابات-ق.مامبەت ە..م. ارقىلى جۇرۋگە ماجبۇرلەندى. ال بۇل ەسكى جول وتكەن عاسىردىڭ جەتپىسىنشى جىلدارىنىڭ وزىندە تار، قاۋىپتى بولعاندىقتان جاڭا جول سالىنىپ، كولىكتەر نەگىزىنەن سەكسەنىنشى جىلداردان باستاپ جاڭا، قازىر قايتا جاسالىنىپ جاتقان جولمەن جۇرەتىن; كولىكتەر قايتا قۇرىلۋعا تۇسكەن جولدا ساعاتىنا 110 شاقىرىمعا دەيىن جىلدامدىقپەن ءجۇرىپ، تەز وتەتىن. ال ەسكى جولدا جىلدامدىعى 40-60 بولىپ، ۋاقىت پەن جانار-جاعار مايعا كوبىرەك شىعىندالىپ، ەكونوميكامىزعا، بۇل جول حالىقارالىق ءدالىز بولعاندىقتان، ەلىمىزدىڭ ابىرويىنا دا ايتارلىقتاي نۇقسان كەلتىردى.         ق.مامبەت اۋىلىنىڭ جول بويىنداعى ءانۋار دەگەن كاسىپكەردىڭ جانار ماي بەكەتى مەن بەتون بلوگىن شىعاراتىن تسەحى دا جول قۇرلىسىنا بايلانىستى توقتاپ، ادامدار جۇمىسسىز قالدى.       جولدىڭ باتىس جاعىنداعى ەگىستىك جەردى، كىشى بازاردىڭ ماڭىن “اكجۋسەل” جشس-ءى ءوز بەتىمەن قازىپ تاستاپتى. بۇل نىسانداردىڭ يەسى سايرامبايدىڭ جەسىرى نە جەرىن، بازارىن پايدالانا الماي، نە زيان شەككەنى ءۇشىن تولەم الا الماي جىلاپ ءجۇر. ول كىسى بۇل جونىندە بىرنەشە رەت حابارلاسقان ەكەن ش.سىزدىقوۆپەن، “شوقان بىدىر-بىدىر ەتىپ بىرنارسەلەردى ايتتى، ەشنەرسە تۇسىنبەدىم، ماسەلەم شەشىلمەدى” دەيدى. بۇل جشس سول ماڭداعى حالىقارالىق تەلەكوممۋنيكاتسيا جۇيەسىن دە ىستەن شىعارعان كورىنەدى.

جولدى قازىپ، جانىنداعى قىراتتى جونىپ، توپىراقتى تاسىعان كەزدە شىققان شاڭ جولعا قاپتارلاس سالىنىپ جاتقان تۇران قالاشىعىن، ونىڭ اعاشتارىن كۇنى-ءتۇنى باستى. “اكجۋسەل” جشس-ءى سمەتا بويىنشا قارجى قاراستىرىلعان بولسا دا، شاڭدى باسۋ ءۇشىن جولعا سۋ شاشپادى. قارجى قايدا كەتتى ەكەن؟ بۇل جۇمىستى شاماسى كەلگەنشە تۇراندىقتاردىڭ وزدەرى اتقاردى:

بىراق قويۋ شاڭدى باسۋعا قاۋقارى جەتپەدى. اۋانى شاڭ باسقانى سونشالىق، جۇمىسشىلار دەم الا الماستان، ءتىپتى تۇندە دە كوزدەرىنە شاڭ كىرىپ، اۋىرىپ، جوتەلىپ، تىنىعا الماستان قۇرلىس جۇمىسى توقتادى. ال جاپىراقتارى شاڭ باسقان وسىمدىك، اعاشتار زاقىمداندى، قۇرادى. ش.سىزدىقوۆ ونىڭ ۇيىمى جول قۇرلىسىن باستاعاندا ءبىزدىڭ مەنشىگىمىزدەگى جەرگە زيان تيگىزىپ، ءبىز ەككەن اعاشتاردى كوشىرەتىن بولعاندىقتان ول زيانداردىڭ ورنىن تولتىرىپ بەرەمىن دەپ ۋادە بەرگەن ەدى.    الايدا، ءوز جۇمىسىن بىتىرگەننەن كەيىن، ياعني “ەسەگى لايدان  وتكەن سوڭ” ۋادىسىندە تۇرماي، الاياقتىق جاسادى. «شاعىمدانساڭ شاعىمدانا بەر، مەن ەشكىمنەن قورىقپايمىن» دەپ قىر كورسەتىپ، زورلىق جاساي باستادى; نىساندارىن تۇراننىڭ ەلەكتر جۇيەسىنە ءوز بەتىمەن جالعاپ، وزبىرلىقپەن ەلەكتر قۋاتىن تولەمسىز پايدالاندى.       تۇرانداعى اعاشتاردى، گۇلدەردى سۋارۋعا، قۇرلىسقا، تۇرمىسقا قاجەت سۋ تراكتورمەن تاسىلاتىن. جولدى “اكجۋسەل” جشس-ءى بۇزىپ تاستاپ، تىم بولماسا ۋاقىتشا جۇرۋگە بولاتىن جول ءىزىن دە قالپىنا كەلتىرۋدەن باس تارتتى. سوندىقتان سۋارۋسىز، شاڭ استىندا قالعان جاسىل جەلەك ودان بەتەر السىرەپ، قۋراي ءتۇسىپ، قىسقا قاۋقارسىز تۇسكەندىكتەن بيىلعى كوكتەمدە كوپتەگەن وسىمدىك، اعاشتاردىڭ  ءبىرازى ويانباي قالدى. ءسويتىپ سىرتقى دۇنيەمەن بايلانىس جاساۋ، “تۇرىك حالىقتارىنىڭ دۇنيەجۇزىلىك اسسامبلەياسى” حالىقارالىق ۇيىمىنىڭ باس-شتاب كۆارتيراسىنا قايراتكەرلەردىڭ كەلىپ-كەتۋى دوعارالىپ،  قاجەتتى زاتتاردى، ازىق-تۇلىكتى باتپاققا باتىپ، جاياۋ تاسىپ، تۇران بلوكاداعا ءتۇستى. وسىلايشا تۇرىك حالىقتارىنىڭ تاريحي-مادەني ورتالىعى تۇران قالاشىعىنىڭ قۇرلىسىنا، ونىڭ تۇرعىندارىنا ۇلكەن زيان تيگىزىپ، قاسىرەت اكەلدى. ال تۇران قالاشىعىن سالۋ 2007 جىلدىڭ 19 قىركۇيەگىندە اق وردادا قۇپتالىپ، ءبىرىنشى كەزەكتە جۇزەگە اسىرىلۋى ءتيىس تۋريستىك نىساندار تىزىمىنە كىرگىزىلگەن ەدى. تەك مينيسترلىكتىڭ، «وڭتۇستىكجوللابوراتوريا» مم-ءنىڭ ارلاسۋىمەن باس مەدىگەر بك «تodini – Impregilo – Akkord» بۇل جاعدايعا تۇسىنىستىكپەن قاراپ جاڭا جىلدىڭ قارساڭىندا تۇرانعا كىرىپ، شىعار جول سالا باستاعان ەدى، بىراق ول دا اياقسىز قالدى.        قازىردىڭ وزىندە اسۋداعى، جول سالۋشىلار مەن باسقا دا كولىكتەر ءوتىپ جاتقان جولدىڭ ۇستىڭگى ەرنەۋىندە جاتقان اۋىر بەتون ەرنەۋلەر كەز-كەلگەن ۋاقىتتا كولىكتەردىڭ ۇستىنەن قۇلاپ، اپات بولۋى مۇمكىن. ولاردىڭ بىرنەشەۋى ابىروي بولعاندا، وتۋشىلەر جوق كەزدە ....قۇلاپتى:

ال كۇزدىڭ سوڭىنان باستاپ بۇگىنگە، ياعني مامىر ايىنىڭ جيىرما بەسىنە دەيىن اسۋداعى جول سالۋ جۇمىسى توقتاپ تۇر. جولدىڭ بيىل بىتپەيتىنى كورىنىپ تۇر. “اكجۋسەل” جشس-ءىنىڭ بۇلايشا ەسىرۋى ونىڭ ديرەكتورى ش.سىزدىقوۆتىڭ ەلىمىزدىڭ باس پروكۋرورى ا.داۋىلباەۆتىڭ اسىعى ورگە ورمەلەگەن تۋىستارىمەن “امپەي-جامپەيلىگىندە” دەگەن قاۋەسەت بار. ءتارتىپ بويىنشا باسمەردىگەر سۋبمەدىگەرلەرد ءوزى تاڭدايدى. ال بىراق “اكجۋسەل” جشس-ءى اقشا كوپ بولىنەتىن قازىعۇرت اسۋىنداعى جولدى قايتا سالۋ جۇمىسىن ورىنداۋدى باس مەردىگەر انىقتالماي تۇرىپ-اق، ءوزىنىڭ “كوكەلەرى” ارقىلى يەمدەنگەن ەكەن. بۇل جونىندە اۆتور باس پروكۋرور ا.داۋىلباەۆقا حات جولداعان بولاتىن جولدى سالۋدى جانداندىرۋعا ىقپال ەتىڭىز دەپ. الايدا بۇل مەكەمە ءوزىنىڭ بيۋروكراتيالىق ادىسىمەن، ول حاتتى وبلىس پروكۋرورىنا، ول، وقو ىشكى ىستەر دەپارتامەنتىنە جولداپتى. مۇمكىن ش.سىزدىقوۆتىڭ تىرەگى داۋىلباەۆتار اۋلەتى ەمەس شىعار. وندا ونى تايراڭداتىپ قويعان كىم؟ مۇنى انىقتاۋ باس پروكۋروردىڭ مىندەتى، ماسەلە ونىڭ اتىنا بايلانىستى بولعاندىقتان دا. ىزدەنىستى وقو ءىىب-نە يتەرە سالۋ، جۇمساق ايتقاننىڭ وزىندە كۇماندى قادام. ويتكەنى قولداۋىش تىرەك تە، سۋبمەردىگەرگە دە كەلىسىم بەرەتىن سوڭعى ينستانتسيا – ءتيىستى مينيسترلىك تە استانادا، ال وقو ءىىب-ءنىڭ بىلىعىپ بىتكەنىن، ماسەلەنىڭ شىنايى انىق-قانىعىنا جەتپەيتىنىن بىلەدى. سول حاتىمىزدان ناتيجە شىقپاسا، وندا ەلباسىدان جاردەم سۇراۋعا ءماجبۇر بولامىز دەگەن ەدىك. بايقاپ وتىرعانىمىزداي، باس پروكۋرور بۇعان ءمان بەرمەپتى. سوندا قالاي بولعانى؟

...باس مەدىگەر «تodini – Impregilo – Akkord» بىرلەسكەن كاسىپورنىنىڭ ديرەكتورى دجاۆيد گاراەۆ مىرزا بۇل جولدى ءوز كۇشىممەن بولسا دا بيىل بىتىرەمىن دەپ وتىر. ونىڭ ءوزى باسقا ەلدىڭ ازاماتى جانە ۇيىمىدا جەرگىلىكتى بولماعاندىقتان “كوكەسى” تىرەپ تۇرعان  ش.سىزدىقوۆتى قىسپاققا الۋعا، ول تۋرالى جوعارعى جاققا شاعىمدانۋعا ءداتى بارمايتىنى تۇسىنىكتى. بىراق دج. گاراەۆ نە ءۇشىن الاياقتاردىڭ جۇمىسىن اتقارۋى كەرەك، وعان مۇمكىندىگى بار ما؟ ش.سىزدىقوۆتىڭ كومپانياسىنان ءۇمىت جوق. دەمەك ودان بۇل جۇمىستى رەسمي تۇردە الىپ، «تodini – Impregilo – Akkord» بىرلەسكەن كاسىپورنىنا جۇكتەپ، ءتيىستى دەڭگەيدە قارجىلاندىرۋ كەرەك. بۇل ماسەلەنى تەز شەشۋ قاجەت. ال بىراق  ش.سىزدىقوۆتىڭ قۇدىرەتتى كوكەلەرىنەن ەشكىم اسىپ كەتە المايدى. سوندىقتاندا بۇعان ەلباسىمىز تىكەلەي ارالاسپاسا، باسقا لاج قالمادى. وسىلايشا بۇل ماڭايعا قاسىرەت اكەلگەن “اكجۋسەل” جشس-ءنىڭ ديرەكتورى ش.سىزدىقوۆ تومەندەگى سۋرەتتەگىدەي قىزدارمەن شامپانداسىپ، جالعاندى جالپاعىنان باسىپ ءجۇرىپ جاتىر:

وسى باياندالعان جايلارعا نەگىزدەلە وتىرىپ، وتىنەمىز سىزدەن، ءتيىستى ورگاندار ارقىلى:

  1. قازىعۇرت اسۋىنداعى جولدى قايتا قۇرۋ جۇمىسىنىڭ ۇدەسىنە شىعا الماعان “اكجۋسەل” جشس-نەن بۇل جۇمىستى تاۋەلسىز كوميسسيا ارقىلى قابىلداپ، باس مەردىگەردىڭ وزىنە جۇكتەپ، جول جۇمىسىن بيىلعى كۇزگە دەيىن اياقتاتىپ، پايدالانۋعا بەرگىزۋىڭىزدى;
  2. “اكجۋسەل” جشس-ءنىڭ قازىعۇرت اسۋىنداعى جولدى قايتا قۇرۋ جۇمىسىن زاڭسىز يەمدەنگەنىن انىقتاتۋىڭىزدى (مۇنى قازىر دالەلدەۋ وڭاي       ەمەس، ويتكەنى قاعازدا ءبارىن تىگىسىن بىلدىرمەي جاتىستىرىپ قويعان شىعار مۇددەلىلەر);
  3. اسۋداعى جولدىڭ ەكى جاعىن قىرناۋ، ماڭايداعى جەرلەردى جارامسىزداندىرۋ قانشالىقتى قاجەت بولعانىن، ونىڭ زاڭدىلىعىن تەكسەرتۋىڭىزدى;
  4. ەروزيالانا باستاعان، جانە بۇلدىرىلگەن جەرلەردى ءارى قاراي بۇلىنۋدەن قورعايتىن، قالپىنا كەلتىرەتىن كەشەندى شارالاردى جاقىن ارادا جاساتۋىڭىزدى;
  5. “اكجۋسەل” جشس-ءىنىڭ جاۋاپكەرسىزدىگىنەن، زورلىعىنان زيان شەككەندەردىڭ زيانىن وتەتۋىڭىزدى، اتاپ ايتقاندا:

-          قىدىر مامبەت اۋىلىنىڭ بۇلىنگەن شابىندىق، جايىلىمدارىنىڭ كولەمىنە ساي مالىنا ءجوپ ساتىپ الىپ كەلىپ بەرگىزۋىڭىزدى،

-          سايرامبايدىڭ جەسىرىنە، سول ماڭداعى شارۋاشىلىقتارعا، ءانۋاردىڭ جۇمىس ىستەي الماي قالعان جانار ماي بەكەتى مەن بەتون بلوك شىعاراتىن تسەحىنىڭ، تۇران قالاشىعىنىڭ جانە باسقالاردىڭ،  

-          اسۋدىڭ قىس ايلارىندا پايدالانۋعا بەرىلمەگەندىگىنەن كوبەيگەن كولىك اپاتىنان زارداپ شەككەندەردىڭ.

  1. 6.     ش.سىزدىقوۆتىڭ، جانە ونىڭ قاتىسى بار كوممەرتسيالىق سۋبەكتىلەردىڭ جۇمىسىن، قارجىلاندىرۋىن، جۇمىس وبەكتىلەرىن قالاي الىپ جۇرگەنىن، “قاناعات” كافەسى، سول ماڭداعى جانار ماي بەكەتىن، باسقا دا مەنشىگىندەگى نىسانداردى ساتىپ العاندا وزىنە ءتيىستى ۇيىمداردىڭ قارجىسىن ماقساتسىز قولدانعان، قولدانباعانىن انىقتاتۋىڭىزدى، جالپى ونىڭ قىزمەتىن جان-جاقتى تالداپ، ءتيىستى شارا قولداندىرۋىڭىزدى;
  2. 7.    تەكسەرۋلەردى ناتيجەسىنە بايلانىستى لاۋازىمدى تۇلعالاردىڭ جاۋاپكەرشىلىگىن ويلاستىرۋىڭىزدى.

                                        اسا قادىرمەنتى نۇرسۇلتان اعا!

مەنىڭ قازاق ەلى تۇرىك حالىقتارىنىڭ قاۋىمداستىعىمەن، پىكىرى وڭدى كورشىلەرمەن بىرگە دامىپ، الەمدە ءوزىنىڭ تياناقتى ورنىن السىن دەپ ۇلەس قوسىپ، كەيدە ۇكىمەتتىڭ نازارىنان تىس قالعان ماسەلەلەردى دە شەشىپ  جۇرگەنىمنەن حاباردارسىز. ء  سوز بولىپ وتىرعان كەلەڭسىز جايتتەردىڭ شەكتەن شىققاندىعىنان ەلدىڭ قامى ءۇشىن، مۇنىمەن اينالىسۋعا امالسىزدان ءماجبۇر بولىپ، سىزگە جۇگىنىپ وتىرمىن. كەزىندە كەڭەس وداعىنىڭ مەملەكەتتىك سىيلىعىنا ۇسىنىلعان قۇرلىس ۇيىمداستىرۋشى رەتىندە جولدىڭ بۇل بولىگىن ءۇش-ءتورت ايدا بىتىرۋگە بولاتىنىن بىلەمىن. الايدا جول ەكى جىلدا دا بىتەتىن ءتۇرى جوق. حالقىمىز “ادامىن تاۋىپ ويناس بول” دەگەن. بۇل تايىنسىز الاياق پەن ونىڭ كومپانيالارىن قولداۋشىلار تىم بولماسا كىممەن جاقىنداسۋدى بىلمەسە كەرەك. مۇمكىن وزدەرى دە “ساۋ-سيىردىڭ سيراعى” ەمەس شىعار. بىراق مۇمكىندىكتەرى بايتەرەكتەي ەكەن. كوتەرىلگەن ماسەلەگە باس پروكۋرور دا ءمان بەرمەي، “جابۋلى قازان جابۋىل قالسىن” دەگەن سىڭاي تانىتقان سياقتى. كۇن وتكەن سايىن الاياقتار كوپتەگەن سالالارىمىزدى ەروزيالاندىرىپ بارا جاتىر. سىزبەن مۇنىڭ بارىمەن قايعىرا ءبولىسىپ وتىرعانىما تۇسىنىستىكپەن قاراپ،   باتىل قادام جاسارسىز دەگەن نيەتپەن، 

 اكادەميك ە.سۇلتانمۇرات،

“تۇرىك حالىقتارىنىڭ دۇنيەجۇزىلىك اسسامبلەياسى”

حالىقارالىق قوعامدىق ۇيىمىنىڭ توراعاسى,

مەكەن-جايىم:

 160301, تۇران-1, ك.مءامبەت, قازىعۇرت. اۋد, وقو, تەل.+77071255550,                      

 email: esultanmurat@gmail.com

Abai.kz

 

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3551