الماتىدا 28-ءشى حالىقارالىق قىسقى ۋنيەرسيادانىڭ وتۋىنە ۇيىمداستىرىلعان ەستافەتا الاۋى تۇتاندى، - دەپ حابارلايدى Vesti.kz. 

الاۋ ەستافەتاسى ءال فارابي اتىنداعى قازۇۋ-دان باستاۋ الدى، ال جالپى جولدىڭ باعدارى مىناداي: ءال فارابي اتىنداعى قازۇۋ - تيميريازەۆ كوشەسى - ماناس كوشەسى - اباي داڭعىلى - سەيفۋللين داڭعىلى - گوگول كوشەسى - سەيفۋللين داڭعىلى - تولە بي كوشەسى - دوستىق داڭعىلى - اباي داڭعىلى - بايتۇرسىنوۆ كوشەسى - ساتپاەۆ كوشەسى - دوستىق داڭعىلى - رەسپۋبليكا سارايى. 

الاۋ ەستافەتاسىنا الماتى قالاسى اكىمى باۋىرجان بايبەك، ءبىلىم جانە عىلىم ءمينيسترى ەرلان ساعاديەۆ، تانىمال ارداگەر سپورتشىلار جاقسىلىق ۇشكەمپىروۆ پەن ەرماحان يبرايىموۆ باستاعان الاۋ ۇستاۋشىلار قاتىستى. جينالعان قاۋىم كوتەرىڭكى كوڭىل-كۇيدە بولىپ، ءوز قولداۋلارىن ءبىلدىردى. ال ءوز كەزەگىندە الماتى قالاسى اكىمى ۋنيۆەرسيادانىڭ باستالۋىمەن بارشا قازاقستاندىقتاردى قۇتتىقتادى.

- ارداقتى الماتىلىقتار، قادىرلى جاستار، سپورتسۇيەر قاۋىم! سىزدەرمەن وسى جۇلدىزدى ساتتە بىرگە بولعانىما وتە قۋانىشتىمىن. قازاقتىڭ ەجەلگى تۇسىنىگىندەگى وتتىڭ يەسى، وت كيەسى، وت – انا، بارشا ىزگىلىكتەر مەن جاقسىلىقتاردىڭ باستاۋى. حالقىمىز ءۇشىن ەڭ قاستەرلى وتان، وتباسى دەگەن سوزدەردىڭ ءتۇبىرى وسى وت سوزىنەن شىققان. ۋنيۆەرسيادا ويىندارى تەك ستۋدەنت جاستاردىڭ عانا سايىسى ەمەس، بۇل الەم حالىقتارىنىڭ دوستىق پەيىلى مەن كوتەرىڭكى كوڭىل-كۇيىنىڭ جارقىن كورىنىسى. دۇنيە جۇزىندەگى اۋقىمدى دودا ەلباسىنىڭ قولداۋىمەن قاسيەتتى قازاق جەرىندە تۇڭعىش رەت ءوتىپ وتىر. بۇل الەم جۇرتشىلىعىنىڭ قازاقستان رەسپۋبليكاسى مەن ونىڭ جاسامپاز حالقىنا، ەلباسى نۇرسۇلتان ءابىشۇلى نازارباەۆقا دەگەن ەرەكشە سەنىمى جانە لايىقتى قۇرمەتى. ۋنيۆەرسيادا الاۋىنىڭ تۇتاتۋ ءراسىمى ەلىمىزدىڭ بارلىق وڭىرلەرىندە ءوتىپ، وعان 100-دەن استام جوو-نىڭ ستۋدەنتتەرى قاتىستى. استاناداعى الاۋدى ەلباسىنىڭ ءوزى تۇتاتتى. مىنە، ۋنيۆەرسيادا الاۋى الماتى تورىنە دە كەلىپ جەتتى. بارشاڭىزدى بۇگىنگى قۋانىشتارىڭىزبەن شىن جۇرەكتەن قۇتتىقتايمىز. ۋنيۆەرسيادا، قاناتىڭدى كەڭ سەرپى!  - دەدى. 

ايتا كەتەيىك، ۋنيۆەرسيادانىڭ رەسمي تۇردە اشىلۋ سالتاناتى 29 قاڭتاردا ساعات 19:00-دە باستالادى. قازاقستاننىڭ اتىنان سپورتتىڭ 12 تۇرىنەن 171 سپورتشى قاتىسادى.

Abai.kz