جۇما, 13 جەلتوقسان 2019
قوعام 3871 0 پىكىر 31 قاڭتار, 2017 ساعات 13:15

قازاقتىڭ ەلباسىعا دەگەن ىقىلاسى

كۇنى كەشە عانا «الماتى ارەنا» سپورت كەشەنىندە بۇكىلالەمدىك 28-قىسقى ۋنيۆەرسيادا ويىندارىنىڭ اشىلۋ ءراسىمى ءوتتى. وعان مەملەكەت باسشىسى نۇرسۇلتان نازارباەۆتىڭ ءوزى ارنايى كەلىپ قاتىستى. سالتتاناتتى اشىلۋ راسىمىندە FISU توراعاسىمەن بىرگە، پرەزيەنتتىڭ ارنايى قوناعى بىرىككەن اراب امىرلىگى كورولىنىڭ ورىنباسارى، الماتى اكىمى، ۆيتسە-پرەمەر جانە پرەزيدەنت اكىمشىلىگىنىڭ جەتەكشىسى دە بولدى.

ءتۇرلى ساحنالىق قويىلىمداردى، كونتسەرتتىك باعدارلامالار مەن جيىننىڭ رەسمي ءبولىمىن ساراي ىشىندەگى 12 مىڭنان استام اداممەن بىرگە كۇللى جاھانداعى 1 ميللياردقا جۋىق ادام تاماشالادى.

كۇللى الەم كوز تىككەن جيىندى پرەزيدەنت نۇرسۇلتان نازارباەۆتىڭ ءوزى اشتى.

ەلباسىمىز وسى ءبىر دودالى جارىستىڭ اشىلۋىندا بار بولعانى 9 مينۋت سويلەدى.  پرەزيدەنت نۇرسۇلتان نازارباەۆتىڭ وسى 9 مينۋتتىق بايانداماسى كەزىندە «الماتى ارەنا» ىشىنە جيىلعان جۇرت تۇپ-تۋرا 36 رەت قول شاپالاقتاپتى. پرەزيدەنتتىڭ ءار سويلەمى ءدۇرسىن-ءدۇرسىن قوشەمەتپەن جالعاسىپ وتىردى. بۇنىڭ سىرتىندا نازارباەۆ مىرزانىڭ مىنبەگە كەلگەن ءام كەتكەن ساتىندە ساراي ىشىندە «قازاقستان، قازاقستان» دەگەن ۇران جاڭعىرىپ تۇردى. جۇرتتىڭ «ەرەكشە ىقىلاسىنا» كەتكەن ۋاقىتتا ەسەپتەمەسەك، ەلباسىنىڭ بايانداماسى بار بولعانى 6-7 مينۋتتىڭ شەگىنە سىياتىن ەدى.

مۇنداي حالىقارالىق اۋقىمداعى شارا ءۇشىن 6-7 مينۋتتىق العىسوز لايىقتى مولشەر. بىراق، حالىقتىڭ ىقىلاس-پەيىلى ول مولشەرگە باعىنباي جاتسا، وعان رەنجۋگە بولمايدى. بۇل ىلتيپاتقا نۇرسۇلتان ءابىشۇلىنىڭ دا ريزا بولعانىن، رەسمي سوزىنە ءازىل ارالاستىرعان كەزدە  تولقىپ تۇرعانىن انىق بايقادىق.

بۇل ءساتتى الەمنىڭ 80 ەلىندەگى ميللياردقا جۋىق ادام تاماشالاپ وتىردى (بۇل پوتەنتسيالدى ەسەپ).

بۇل نەنى بىلدىرەدى؟ بۇل قازاقستان حالقىنىڭ، سونىڭ ىشىندە الماتى جۇرتىنىڭ حالىقارالىق سپورت دوداسىن ەرەكشە ىقىلاسپەن قارسى العانىن... راس، ءبىزدىڭ ۋنيۆەرسيادانى وتكىزۋگە قۇلشىنىسىمىز – ەلباسىنىڭ ءار ءسوزىن جالعاعان ءدۇر قوشەمەتتەن-اق اڭعارىلعانداي بولدى. كەرەك دەسەڭىز، بۇل بولاشاقتا وليمپيادا ويىندارىن وتكىزۋگە دە دايار ەكەندىگىمىزدى ءبىر ميلليارد جۇرتتىڭ ساناسىنا ءسىڭىردى. 

قازاقتىڭ وسى ىقىلاس-پەيىلى تارىلماسىن دەپ تىلەيمىز!

نۇرزات توعجان

Abai.kz

0 پىكىر