جۇما, 6 جەلتوقسان 2019
بىلگەنگە مارجان 3129 0 پىكىر 31 قاڭتار, 2017 ساعات 20:37

ديماش قۇدايبەرگەنوۆتىڭ داۋىسى- الەمدە سيرەك كەزدەسەتىن "كونترالتو"

ايەل داۋىسىندا ءان ايتاتىن ەركەك انشىلەر بولادى. بۇل داۋىس ءتۇرى الەم بويىنشا سيرەك كەزدەسەدى. تابيعات بەرگەن دارىنىنىڭ ارقاسىندا جىڭىشكە، جۋان داۋىستا بىردەي ءان ايتا الاتىن انشىلەردى كونتراتەنور دەپ اتايدى. ول – ءان ايتۋدىڭ دامىعان تەحنيكاسىن مەڭگەرگەن ءانشى. 

 

سوپرانو داۋىستى ءانشى مايرا مۇحامەدقىزى ديماش قۇدايبەرگەنوۆكە ارنالعان وتاندىق باعدارلامالاردىڭ بىرىندە بىلاي دەيدى: - "ەر بالانىڭ ايەل ادامنىڭ كونترالتو، سوپرانو داۋىسىمەن ءان ايتۋى قازاقتىڭ تابيعاتىندا بار ما؟" دەپ مەنەن سۇراپ جاتادى. نەگە قازاقتا ونداي داۋىس جوق؟ ەرىك قۇرمانعاليەۆ دەگەن كونترالتو بولعان قازاقتا، ەگەر ونداي كەرەمەت داۋىس شىعىپ جاتسا، بۇل – قازاق ونەرىنىڭ قازىناسىنا قۇيىلعان ۇلكەن بايلىق. 

 مايرا مۇحامەدقىزى باعدارلاما بارىسىندا ديماشتىڭ داۋىسىنا كونترالتو دەگەن باعا بەرەدى. ديماش ەر ادامنىڭ باريتون، كونتراتەنور داۋىستارىندا دا، ايەل ادامنىڭ كونترالتو داۋىسىندا دا ايتا الادى. بۇنداي داۋىس ەرەكشەلىگى ۆوكال ونەرىندەگى قۇبىلىس بولىپ ەسەپتەلەدى. جەر جۇزىندە سيرەك كەزدەسەتىن داۋىس كەڭدىگى بۇكىل الەمنىڭ اسىل قازىناسىنا جاتادى. بۇنداي بىرەگەي داۋىس – مۋزىكا ونەرىنىڭ بەلگىلى ءبىر زاڭدىلىعىنا باعىنبايتىن وزگەشە ونەر. ەركەكتىڭ داۋىسىنان جوعارى، ايەلدىڭ داۋىسىنان تومەن داۋىستى كونترالتو دەپ ايتۋعا بولادى.  مۋزىكالىق ءبىلىمى بار، كاسىبي ءانشىنىڭ داۋىسى – 2 وكتاۆا. ال ديماشتىڭ داۋىسى – 4 وكتاۆا.

ءوزىنىڭ ايتۋىنشا، 4,5-5 وكتاۆاعا دەيىن جەتەدى. قىتاي ەلىندە ءوتىپ جاتقان "I am a singer" ءان بايقاۋىنىڭ ەكىنشى كەزەڭىندە ديماش "وپەرا – 2" ءانىن ورىندادى. بۇل ءاندى ورىنداۋ بارىسىندا ءانشى ءتوس جانە باس رەگيسترىن قولدانعان. تاجىريبەلى ۆوكاليستەردىڭ ءوزى قينالىپ قالۋى مۇمكىن نوتالارعا ديماشتىڭ داۋىسى ەركىن جەتتى. ءان ءۇش مودۋلياتسيادان تۇردى. سوڭعى بيىك نوتا تۇپنۇسقاسىنان 2 تون جوعارى ورىندالدى.  بۇگىندە ديماش قۇدايبەرگەنوۆتىڭ داۋىسىن قاراپايىم كورەرمەن: "پەرىشتەنىڭ داۋىسى", "بوگدە عالامشارلىقتىڭ داۋىسى", "ادامنىڭ داۋىسى ەمەس", "مىڭ جىلدا ءبىر رەت كەزدەسەتىن داۋىس" دەپ باعالاپ جاتىر.

سايتقا ازىرلەگەن نۇرسۇلۋ نايمانوۆا.

Abai.kz

0 پىكىر