ماتاەۆتاردىڭ ۇكىمى ءۇشىنشى قازاندا شىعارىلادى
ۇلتتىق ءباسپاسوز كلۋبىنىڭ جەتەكشىسى جانە قازاقستان جۋرناليستەرى وداعىنىڭ توراعاسى سەيىتقازى ماتاەۆقا سوت ۇكىمى 3 قازاندا شىعارىلادى، دەپ حابارلادى استانا قالاسى ەسىل اۋداندىق سوتىنىڭ سۋدياسى اقبولات قۇرمانتاەۆ.
وسى ءىس بويىنشا ونىڭ ۇلى، قازتاگ اگەنتتىگىنىڭ باس ديرەكتورى اسەت ماتاەۆ تا سوتتالۋشى ورىندىعىندا وتىر. ولارعا بيۋدجەت قاراجاتىن جىمقىردى، سالىق تولەۋدەن جالتاردى دەگەن ايىپتار تاعىلدى.
ءسوز جارىستىرۋ كەزىندە پروكۋرار سوتتان سەيىتقازى ماتاەۆتى التى جىل سەگىز ايعا سوتتاۋىن، ال اسەت ماتاەۆتى التى جىلعا سوتتاپ، مۇلكىن تاركىلەۋىن جانە ءۇش جىل كاسىپكەرلىكپەن اينالىسۋعا تىيىم سالۋىن سۇرادى.
سوتتالۋشى سەيىتقازى ماتاەۆ بۇل ايىپتاردى جوققا شىعارىپ، ءىستىڭ دۇرىس تەكسەرىلمەگەنىن مالىمدەدى. اسەت ماتاەۆ بۇگىن سوتتا ءىستى وزدەرىنە جاسالعان "رەيدەرلىك" دەپ اتادى.
