اقتوبەدەگى قاندى قىرعىنعا قاتىسى بار تەرروريستەردىڭ تىزىمىنەن قاتە كەتكەنىن ىشكى ىستەر ءمينيسترىنىڭ ءوزى مويىندادى. قالمۇحامبەت قاسىموۆ جاقىندا سودىرلاردىڭ اتى-ءجونىن قايتا جاريالايمىز دەدى.

باس پوليتسەيدىڭ ايتۋىنشا، مينيسترلىك تاراتقان رەسمي اقپارتقا ينتەرنەتتە جۇرگەن لاڭكەستەردىڭ ءتىزىمى ساي كەلمەيدى ەكەن. قازىر اقتوبەدەگى قاندى وقيعانى ۇلتتىق قاۋىپسىزدىك كوميتەتى تەرگەپ جاتىر.

قورىتىندىسى شىققان سوڭ سودىرلاردىڭ اتى-ءجونى قايتا جاريالانباق. ويتكەنى، تۇسىنىكسىز جاعدايدا تەرروريستەردىڭ تىزىمىنە  بايناساي اۋىلىنداعى مەكتەپتىڭ 11-شى سىنىپ وقۋشىسى ساعىنعان سەيىتقالي دە ەنىپ كەتكەن. ال، اقتوبە قالاسىنىڭ تۇرعىنى دانيار ۋايسوۆ بولسا، ءوزىن پوليتسەيلەردىڭ قولىنان قازا بولعان  لاڭكەستەردىڭ قاتارىنان كورىپ، تالىپ قالا جازداپتى.

5-ماۋسىم كۇنى ءبىر توپ قاسكوي اقتوبەدەگى قارۋ ساتاتىن ەكى دۇكەنگە جانە اسكەري بولىمگە شابۋىل جاساعان. سودىرلاردىڭ قولىنان سەگىز ادام قازا تاپتى، ولاردىڭ ۇشەۋى اسكەريلەر. 18  لاڭكەستىڭ كوزى جويىلدى. ال،  9-ى  تىرىدەي ۇستالعان بولاتىن.

ءبىزدىڭ تۇسىنبەيتىنىمىز، مۇنداي اسا جاۋاپتى ماسەلەدە مينيستر مىرزا مەن مينيسترلىك نەگە قاتەلەسەدى؟ادامنىڭ اتى-ءجونىن انىقتاۋعا شاماسى كەلمەيتىن ورگان سودىرلارمەن قالاي كۇرەسپەك؟ بۇل قاتەلىك بولعالى بىرنەشە كۇن سىرعىدى. سودان بەرى مينيسترلىك سودىرلاردىڭ اتى-ءجونىن انىقتاماعان با؟ انىقتاسا، نەگە ناقتى اقپاراتتى جۇرتقا جەتكىزبەي وتىر. 

جەر ماسەلەسىنە قاتىستى ميتينگتەر كەزىندە ءبىز ءىىم-نە، ياعني مينيستر قالمۇحامبەت قاسىموۆ مىرزانىڭ اتىنا قوعامدى تولعانتقان بىرقاتار سۇراقتاردى جولداپ، ماردىمدى جاۋاپ الا الماعان ەدىك.  سول تۇستا ءمينيسترىمىز ماجىلىس دەپۋتاتى گەننادي ششيپوۆسكيحتىڭ تالابىن ەسكەرمەي، مەملەكەتتىك تىلگە تىكسىنگەنىنە دە ەسىمىزدە.

قاسىموۆ مىرزا بۇيتە بەرسە، حالىقتى وزىنە قارسى قويىپ الارى حاق. سوندىقتان، ول كىسىگە قاتەلەسۋگە بولمايتىنىن ەسكەرتكىمىز كەلەدى. 

ءشارىپحان قايسار

Abai.kz