بەيسەنبى, 28 ناۋرىز 2024
دەپ جاتىر 10564 0 پىكىر 29 ناۋرىز, 2016 ساعات 10:54

ماسساجيست-جەزوكشەلەر پايدا بولا باستادى

قازاقستاندا جەزوكشەلىك زاڭدى تۇردە رۇقسات ەتىلمەسە دە، باسقا قىزمەت تۇرلەرىنىڭ اتىن جامىلىپ، سول جەزوكشەلىكتىڭ ءدال وزىمەن اينالىسىپ جۇرگەن ادامدار جەتەرلىك. سونداي قىزمەت ءتۇرىنىڭ ءبىرى – ماسساج. «ماسساج جاسايمىن، ءتانىڭىزدى ەرىتىپ، رەلاكس سىيلايمىن» دەگەن سارىنداعى حابارلاندىرۋلار ينتەرنەتتە جەتىپ ارتىلادى.

ەگەر ءسىز كوشەگە شىعىپ، جەزوكشەلىكپەن اينالىسۋعا نامىستانساڭىز جانە ءوزىڭىزدىڭ سۇلۋلىعىڭىزعا سەنىمدى بولساڭىز، ماسساج ۇيرەنىپ، جەزوكشەلىكپەن «بىلدىرمەي» اينالىسا الاسىز. سونداي حابارلاندىرۋ ارقىلى اقشا تاۋىپ جۇرگەن قىزداردىڭ بىرىنە حابارلاسقانىمىزدا ءوز قىزمەتىنىڭ 10 مىڭ تەڭگەدەن باستالاتىنىن ايتتى. ءوزىن نۇرگۇل دەپ تانىستىرعان قىز استاناعا 3 جىل بۇرىن قونىس اۋدارعان ەكەن. ونىڭ جوعارى ءبىلىمى بار. الايدا، استانادا ءبىر جۇمىسپەن كۇن كورۋ قيىن. نۇرگۇل ماسساج تۇگىلى، جالپى مەديتسينادان ەش حابارى بولماعانىن ايتادى. ءبىر تانىسى ماسساجيست ەكەن. اۋەلى سودان ۇيرەنىپ، سوسىن ءبىراز ارىقتاپ، بوي-باسىن كۇتىپ، رەلاكس ماسساجعا كوشكەن. ويتكەنى، بۇل سالادا تابىس مول. 

«بىزگە ماسساجدى كەرەكسىنگەن ناۋقاس ادامدار حابارلاسپايدى. كەيدە شاتاسىپ تۇسەتىندەر بار. ولارعا بارمايمىز. بىزگە كەرەگى – دەمالعىسى كەلەتىن ەر-ازاماتتار. ارينە، ماسساج دا جاسايمىز. دەنەسىن ۋقالاپ، بوساتىپ، سوسىن ەگەر ءوزى قالاسا قوسىمشا اقىعا ينتيمدىك قىزمەتتەر كورسەتەمىز. استانادا مەن سياقتى بويجەتكەندەر وتە كوپ. ەڭ باستىسى – بالا كوتەرىپ قالماۋ كەرەك. ءبىزدىڭ قىزمەت كوشەدەگى جەزوكشەنىڭ قىزمەتىنەن قىمبات بولعاندىقتان كەلەتىن كليەنتتەرىمىزدىڭ دە قالتاسى قالىڭىراق، اۋقاتتى بولادى. ولار ءۇشىن ءبىزدىڭ دەنەمىز تاۋار، سوندىقتان كۇن سايىن شىنىعىپ، ديەتا ۇستاپ، تازا جۇرەمىز. كۇن-ءتۇن دەمەي تاۋلىك بويى قىزمەت كورسەتەمىز»،- دەيدى نۇرگۇل. 

نۇرگۇل سياقتىلار جەكەلەي قىزمەت كورسەتەدى. ولار وزىنە عانا سەنەدى. ال ەندى كادىمگى ماسساج سالوندارى مۇنداي ىسپەن اينالىسپايدى دەيسىز بە؟ قاتەلەسەسىز. استاناداعى سونداي سالوننىڭ ءبىرى – «ەۋفوريا-سپا» سالونى. استانانىڭ قاق ورتاسىندا، اۋماعى 900 شارشى مەتر بولاتىن اتشاپتىرىم عيماراتتا ورنالاسقان. ونىڭ سايتىنداعى كورسەتىلەتىن قىزمەت تۇرلەرىنەن ادام شوشيدى. «مويا گوسپوجا»، «تى منە، يا تەبە»، «قۋىق بەزى ماسساجى»، «لينگاما»، «سوقىر ماسساج»، «موي پوۆەليتەل»، «پاتشالار ماسساجى»، «لەدي دۋش»، «سوبلازن»، «مۇز بەن جالىن»، «سۋشي لەدي»، «رومانتيك»، «لەدي سوپروۆوجدەنيە»، «پريۆات ستريپتيز»، «VIP Exclusive» سياقتى ماسساج تۇرلەرىن ەستىپ كورىپ پە ەدىڭىز؟ اتىنىڭ ءوزى قوزدىرىپ، ءناپسىنىڭ شارپۋىنا شاقىرىپ تۇرعان جوق پا؟!

وسى ماسساج سالونى قىزدارعا مىناداي ماتىندە حابارلاندىرۋ بەرىپتى: «ەگەر ءسىز جاس ءارى سۇلۋ، وزىڭىزگە سەنىمدى، ەشتەڭەدەن ۇيالمايتىن سەكسۋالدى، ەر-ازاماتتى ەسىنەن تاندىرارداي قىلىقتى قىز بولساڭىز، بىزگە حابارلاسىڭىز. ءبىز كامەلەتكە تولعان بارلىق سۇلۋلاردى رەلاكساتسيا شەبەرى جۇمىسىنا شاقىرامىز!». سالون وعان جۇمىسپەن بىرگە تۇراتىن باسپانا بەرىپ، مەديتسينالىق تەكسەرۋدەن وتكىزەدى. مۇنداي ماسساجيستەردىڭ كورسەتەتىن قىزمەتى دە ارزان ەمەس. «لينگاما+قۋىق ماسساجى» – 44 000 تەڭگە، «تى منە، يا تەبە» - 48 000 تەڭگە، «ۆياگرا» - 60 000 تەڭگە، «ۆوزروجدەنيە ستراستي» - 96 000 تەڭگە، «پاتشالار ماسساجى» - 80 000 تەڭگە. سوندا الگى تاجىريبەسىز سەكسۋالدى قىزدىڭ ءبىر ماسساجى – 96 مىڭ تەڭگە بولعانى ما؟ ونىڭ كورسەتەتىن قىزمەتى مۇلدە باسقا ەكەنى ايدان انىق ەمەس پە؟ سالون بارلىق قۇجاتتارىن ادەمىلەپ راسىمدەپ، ءتىپتى كليەنتتەرگە قىزمەت اقىسىن كارتوچكامەن تولەۋگە مۇمكىندىك جاساپ قويعان. بۇكىل الەۋمەتتىك جەلىلەردە پاراقشالارى بار. 

بىلتىر الماتى پوليتسەيلەرى شەتەلدەن كەلگەن ەليتالىق جەزوكشەلەر توبىن قولعا تۇسىرگەن ەدى. ولار دا ماسساج جاسايمىز دەگەن جەلەۋمەن جەرگىلىكتى جىگىتتەردىڭ قالتاسىن قاعىپ كەلگەن. كوبىسى رەسەي، وزبەكستان مەن بەلورۋسسيادان اۋىپ كەلگەندەر بولاتىن. ولار قالانىڭ قاق ورتاسىنداعى قىمبات تۇرعىن ۇيدە پاتەر جالداپ، ونى جىنويناقتىڭ ورداسىنا اينالدىرعان. ەڭ «ارزان» جەزوكشەنىڭ 1 ساعاتتىق قىزمەتى – 25 مىڭ تەڭگە. ال ءبىر تۇنەپ شىعۋ – 85 مىڭعا بارادى. ءتانىن ساتىپ پايدا تاباتىندار ءۇش بولمەلى پاتەردى ايىنا سەگىز ءجۇز مىڭعا جالداپ تۇرعان. مۇندا قوناقتاردى ستريپتيز بيلەپ قارسى الىپ، ماي شامنىڭ تۇبىندە تۇنىمەن كوڭىلىن كوتەرەدى. سول ۇستالعانداردىڭ ءبىرى كيم ەلەنا (وزبەكستان) بىلاي دەيدى: 

«قازاقستانعا كەلگەنىمە 6 ايدان اسىپ كەتتى. ەلىمدە ءبىر جارىم جاستاعى ۇلىم بار. ايىنا 3000 دوللارعا دەيىن تابىس تابامىن. ءبىر مىڭ دوللاردى وزبەكستانداعى بالامدى قاراۋ ءۇشىن اتا-اناما جىبەرسەم، مىڭ دوللارىن پاتەر اقىسىنا جانە جارناماعا بەرەمىن. قالعانىنا كيىم-كەشەك، قاجەتتى زاتتار الامىن. الماتىعا ساتۋشى بولىپ قىزمەت جاسايمىن دەپ كەلدىم. دۇرىس جۇمىس تاپپاعان سوڭ تانىستاردىڭ ايتۋىمەن وسىندا ءتۇستىم. اكە-شەشەم مەنى رەسەيدە مەنەدجەر بولىپ ناپاقا تابادى دەپ ويلايدى». ال ەكىنشى ءبىر «ماسساجيست» ناستيا (رەسەي) «ەلىمدە دۇرىس جۇمىس جوق. ول جاقتا بۇل ىسپەن اينالىسۋعا جاقىندارىمنان قورقام. الماتىعا كەلگەلى قالاعا شىققان ەمەسپىن. كليەنتتىڭ قالاۋىنا قاراي كۇنى-ءتۇنى قوناق كۇتەم. ايىنا ءجۇز ەركەككە دەيىن قىزمەت كورسەتەمىن. قىزمەت اقىسى سۇرانىسقا قاراي 15 مىڭنان 80 مىڭعا دەيىن بارادى. تۇراقتى كليەنتتەرىمىز بار. باسىم كوپشىلىگى قازاق اعاشكالار. ولار جاقسى. كوڭىلىن جاقسى كوتەرسەڭ، كەلىسىلگەن سومادان ارتىق اقشا تاستاپ كەتەدى. ال ۇيىنە شاقىرسا باعا ەكى ەسەگە دەيىن وسەدى» دەگەن بولاتىن. 

الماتىلىق پوليتسەي نۇرلاننىڭ سوزىنشە، الىپ شاھارداعى ەڭ قىمبات جەڭىل جۇرىستىلەردىڭ باعاسى 3 000 اقش دوللارىنا دەيىن جەتەدى. ولاردىڭ بارلىعى ۋكراينا مەن بەلورۋسسيانىڭ “ميسستەرى” ەكەن. 

مۇنداي ەليتتىك ماسساج سالوندارىنىڭ «كرىشاسى» بولماسا، الاڭسىز جۇمىس ىستەۋى مۇمكىن بە؟ «ماسكيروۆكا» جاساپ، جەزوكشەلىكپەن اينالىسۋ، سونىڭ ارقاسىندا ميلليونداعان تابىس تابۋ كاسىپكەرلىككە جاتا ما؟ جۋىردا وسى تاقىرىپتى الەۋمەتتىك جەلىدە دە تالقىلادىق. بىرەۋلەر جەزوكشەلەر زاڭسىز جۇمىس ىستەگەنشە وسىلاي باسقا اتپەن زاڭدى تۇردە جۇمىس ىستەگەنى ءجون دەگەن پىكىردە. «ويتكەنى، سالىعىن تولەپ وتىر، ءوز جۇمىسى ءۇشىن جاۋاپ بەرەدى. جۇمىس ورىندارىن اشىپ وتىر» دەيدى. ەندى بىرەۋلەر «ولاردى تەكسەرگەن كۇندە دە ءبارى زاڭدى بولىپ شىعادى. سولاردى تەكسەرۋشىلەردىڭ ءوزى سول سالوننىڭ ماسساجىنا بارماعانىنا كىم كەپىل؟ سۇرانىس بار جەردە مۇنداي سالوندار بولعان، بولا بەرەدى» دەپ پەسسيميستىك كوزقاراسىن جەتكىزدى. 

ودان قالسا ەلىمىزدەگى جارنامالىق گازەتتەردە «ماسساج جاسايمىن»، «ادەمى، 18 جاستاعى مەتيس قىز تانىڭىزگە ءلاززات سىيلايتىن ماسساج جاسايدى»، «تەك ەركەكتەرگە ارنالعان ەستەن تاندىرارلىق ماسساج» دەيتىن سارىنداعى حابارلاندىرۋلاردان كوز سۇرىنەدى. بۇل بۇل ما، اردان بەزگەن جىگىتتەردىڭ «جىگىتتەرگە عانا ماسساج جاسايمىن» دەيتىن جارنامالارىن دا كوزىمىز تالاي كوردى. جالپى العاندا، گازەت بەتتەرىندەگى، سايتتارداعى ماسساج تۋرالى حابارلاندىرۋدان حالىق ۇرەيلەنەتىن دارەجەگە جەتتى. بارىنە توپىراق شاشۋدان اۋلاقپىز، اراسىندا شىنىمەن ەمدىك ماسساج تۇرلەرىن ۇسىناتىندار دا بار. الايدا، باسىم كوپشىلىگىنىڭ ينتيمدىك ماقساتتا جۇمىس ىستەيتىنى ايتپاسا دا تۇسىنىكتى. 

قانشا دەگەنمەن، ەلىمىزدە جەزوكشەلىكتىڭ زاڭداستىرىلماعانىن، دەمەك بۇنىڭ ءبارى زاڭسىز ارەكەت ەكەنىن باستى نازاردا ۇستاۋعا ءتيىسپىز. ماسساج اتىن جامىلعان بوردەلدەردىڭ جۇمىسىن تەكسەرۋ ارتىقتىق ەتپەيدى. سوسىن وسى سارىنداعى گازەت بەتتەرىندەگى جارنامالار مەن حابارلاندىرۋلاردىڭ ارتىندا كىمدەر تۇرعان زەرتتەپ، جازاعا تارتۋ جاعىن قاراستىرۋ كەرەك سياقتى. وندا كامەلەتكە تولماعان جاس قىزداردىڭ بار-جوعىنا كىم كەپىل؟ سۋتەنەرلىك جۇمىسقا قىلمىستىق-قۇقىقتىق جاۋاپكەرشىلىك قارالعانىن ۇمىتپايىق.

جانات قاپالباەۆا

تۇپنۇسقاداعى تاقىرىپ: "ماسساجعا بارامىن دەپ، ماسقاراڭىز شىقپاسىن..."

korrespondent.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3532