جۇما, 18 قازان 2019
46 - ءسوز 3469 0 پىكىر 30 قىركۇيەك, 2015 ساعات 12:43

كۋندۋز ءھام تاليبان

2003 جىلى شىلدەدە كۋندۋز اۋعانستان ۇكىمەتىنىڭ قولىنا ەندى ءوتىپ، ەس جيا باستاعان كەزدە كومەندانت ساعاتى جاريالانعان قالاعا دەرەكتى فيلم ءتۇسىرۋ توبى ءتۇن ورتاسىندا جەتىپ، جولىمىزدى كەس-كەستەگەن ساقشىلاردىڭ وعى استىندا قالا جازداپ، توبەسى ءبۇتىن قوناق ءۇي تابا الماي، UNICEF-ءتىڭ كەڭسەسىنە كىرە الماي، ورتالىق مەشىتتىڭ قۇلىپتاۋلى قاقپاسىنان قايتىپ، ەڭ سوڭىندا سولتۇستىك اليانستىڭ شتاب-پاتەرىن تاۋىپ جان شاقىرىپ ەدىك.

قاپىرىق ىستىقتا الگى ۇيشىكتىڭ ىشىنە سىيماي، يىستەنگەن توسەنىشتەرىنەن جيىركەنىپ، اۋلاسىنا شىعىپ، تاقىر جەرگە جاتا كەتكەنبىز. كوردەي قاراڭعى قالانىڭ ءبىر شەتىندە باداناداي جۇلدىزدارى سامساعان بارقىت قارا اسپانعا قاراپ جاتىپ ۇيىقتاعان سول ءتۇن ەسىمنەن شىقپايدى. بەس ساعاتتان سوڭ الاگەۋىمدە قاتتى ۇيقىدان شوشىپ وياندىم. سويتسەم اۋزىما ءبىر كىشكەنتاي جاندىك كىرىپ كەتىپتى. قارعىپ تۇرىپ تۇكىرىنىپ، سوڭعى بوتەلكە تازا سۋمەن قايتا-قايتا شايىنىپ، قالعان سەرىكتەرىمدى وياتتىم. بالحتا دۋستۋم مەن مۋحامماد اتتانىڭ سوعىسى قايتا باستالىپ كەتكەنىن، كابۋلعا قايتار جولدىڭ جابىق ەكەنىن بىلەمىز. ونىڭ ۇستىنە سالانگ تۋننەلىن ەندى ءبىر كەسىپ وتسەك، وكپەمىز ءوشىپ قالاتىنىن دا سەزەمىز. جول بويى باعلان مەن پۋل-ە ءحۋمريدىڭ كاناليزاتسيا ارىعىنىڭ ۇستىنە سالىنعان شايحانالارى مەن ەكىنشى قاباتتاعى "تۋالەت-تەسىك" ارقىلى تولاتىن ءبىرىنشى قاباتتاعى "تىڭايتقىش" تولى بىتەۋ بولمەلەرى بار "رەستوراندارىنىڭ" تاماعىنان قايتا ۇشىنعىمىز كەلمەيدى. سول سەبەپتى كۋندۋزدان پياندج وزەنى ارقىلى تاجىكستانعا پاروممەن وتۋگە بەل بايلادىق. ءبىر ايداي ىستىق سۋ، جۇمساق توسەك پەن ءدامدى اس كورمەگەن پاقىرلارعا سول كەزدە تاجىكستاننىڭ ءوزى جۇماق كورىنىپ ەدى. ال پاروم ۇستىندە قايىرشىلىق پەن سوعىستان قاشىپ تاجىكستانعا جۇمىس ىزدەپ بارا جاتقان اۋعان جاستارىن كورىپ جۇرەگىم قاتتى اۋىرعان. ءبارىنىڭ ۇستىندە باتىس ەلدەرىنەن كەلگەن اتام زامانعى "secondhand" كيىم. اتام زامانعى ەكەنى ديزاينىنان كورىنىپ تۇر - اكەلەرىمىز كيگەن "كولوكولا" شالبارلار مەن جاعاسى يىعىنا جەتەتىن كوستيۋمدەر. كەيبىرى كوستيۋمدى كويلەك ورنىنداعى اق مايكانىڭ سىرتىنان كيگەن. سول كۋندۋز قالاسى دۇيسەنبى تۇستەن كەيىن 14 جىلعا عانا سوزىلعان تىنىشتىقتان سوڭ قايتا تاليباننىڭ قولىنا ءتۇستى. ۇيلەردىڭ توبەلەرى قايتا قيراپ جاتىر، بايى اۋەجاي ارقىلى، كەدەيى پياندج ارقىلى قايتا سىرتقا قاشىپ شىعۋعا تىرىسىپ جاتىر. بۇل بەيباق قالا وسىنشاما وڭاي تاليبتەرگە بەرىلە سالاتىن بولسا، 14 جىلعى ينۆەستيتسيا مەن ينتەگراتسيانىڭ نە قۇنى قالدى دەپ قايران قاپ وتىرمىن.

عالىم بوقاش

Facebook-تەگى پاراقشاسىنان

0 پىكىر