بۇگىن استانا قالاسىنىڭ اكىمى ادىلبەك جاقسىبەكوۆ  مىرزا «الماتى» جانە «سارىارقا» اۋداندارىنىڭ اكتيۆتەرىنە  جاڭا اكىمدەردى تانىستىردى. بۇل تۋرالى abai.kz سايتى استانا قالاسى اكىمدىگىنىڭ رەسمي سايتىنا سىلتەمە جاساي وتىرىپ حابارلايدى.

استانا قالالىق ءماسليحاتتىڭ كەزەكتەن تىس سەسسياسىندا دەپۋتاتتار «الماتى» جانە «سارىارقا» اۋداندارىنىڭ جاڭا اكىمدەرى قىزمەتىنە ۇسىنىلعان ەرماعانبەت قابدۋلاۇلى بولەكپاەۆ پەن پاۆەل سەرگەەۆيچ كۋلاگيننىڭ كانديداتۋرالارىن ءبىراۋىزدان قولدادى.

ال قالا اكىمى ادىلبەك جاقسىبەكوۆ جاڭا تاعايىندالعان  ەكى اكىم دە ەڭبەك جولىندا وزدەرىن جاقسى جاعىنان كورسەتە بىلگەن، ءتۇرلى لاۋازىمداردى اتقارۋدا تاجىريبەلەرى مول ەكەندىگىن ايتتى.

ايتا كەتەيىك، ەرماعانبەت بولەكپاەۆ بۇعان دەيىن مەملەكەتتىك قىزمەت ىستەرى جونىندەگى اگەنتتىك جۇيەسىندە، قاراعاندى جانە وڭتۇستىك قازاقستان وبلىستارىندا اگەنتتىكتىڭ اۋماقتىق باسقارمالارىندا باسشى، استانا قالاسى تارتىپتىك كەڭەسىنىڭ توراعاسى قىزمەتتەرىندە بولعان.

اقمولا وبلىسى اكىمى سەرگەي كۋلاگيننىڭ ۇلى پاۆەل كۋلاگين بۇعان دەيىن استانا قالاسىنىڭ كوممۋنالدىق شارۋاشىلىق باسقارماسىنىڭ باسشىسى، «الماتى» اۋدانىنىڭ اكىمى قىزمەتتەرىن اتقارعان.

ەستەرىڭىزدە بولسا، 2013 جىلى ەلىمىزدەگى ەڭ جاس اكىم بولىپ كۇتپەگەن جەردەن پاۆەل كۋلاگين (استانا قالاسىنا قاراستى «الماتى» اۋدانىنا) تاعايىندالعان ەدى. وتىزعا تولماي جاتىپ وسى لاۋازىمعا قايتا ۇسىنىلعان پاۆەل كۋلاگيننىڭ ءومىربايانى جۇتاڭ. ماسكەۋدە جوعارى ءبىلىم العان. ەڭبەك جولىن قوستاناي وبلىسىنداعى ەكونوميكا جانە بيۋدجەتتى جوسپارلاۋ دەپارتامەنتىنەن باستاپتى. كەيىن باس شاھارعا قونىس اۋدارىپ جەرگىلىكتى اكىمدىكتە قىزمەت اتقارعان. سودان مانسابى كوز ىلەسپەس جىلدامدىقپەن ءوسىپ، استاناداعى ەسىل اۋدانى اكىمىنىڭ ورىنباسارى بولدى. ەندى جاقسىبەكوۆ مىرزاعا جاقسى قىرىنان تانىلىپ، الماتى اۋدانىنا جەتەكشىلىك ەتپەك. جاس شەنەۋنىكتى اسا جاۋاپتى لاۋازىمعا تاعايىنداعان استانانىڭ اكىمى جاقسىبەكوۆ كۋلاگيننىڭ ۇلىنا ۇلكەن ءۇمىت ارتىپ وتىرعانعا ۇقسايدى. 

ءجا، دەيسىزدەر عوي. سەرگەي كۋلاگيننىڭ ءوزى ەرتەرەكتە ۇلى پاۆەلدىڭ مانسابى تۋرالى قويىلعان سۇراققا اقتارىلا جاۋاپ بەرگەن-ءدى (http://kaz.tengrinews.kz/kazakhstan_news/kulagin-memlekettk-kyizmetteg-ulyina-katyistyi-oyyin-ayttyi-259059/).

"سىزدەر ء"سىز قانشا جاستا اكىم بولدىڭىز؟" دەپ سۇراڭىزدار. مەن 26-27 جاستا كەڭشار ديرەكتورى بولدىم، مەن شوشقا باعاتىن ساۋىنشى ايەلدىڭ بالاسىمىن، وتباسىندا ۇشەۋمىز، اكەمىز جوق، مەن ەڭ كەنجە بالامىن. ۇشەۋمىز دە وقىدىق، شارۋاشىلىقتاردى باسقاردىق، كەيىن مەن جىلدام كوتەرىلىپ، ول كەزدە اعام دا اۋدان باسشىسى بولاتىن، مەن وبلىستى باسقارىپ، اعامدى جۇمىسىنان شىعاردىم. سىزدىڭشە ەرتە مە؟ قازىر تالداۋ جاساپ، قاراپ كورىڭىز، 26 جاستاعىلار جوق پا ەكەن؟ الدە كۋلاگيندى عانا كورىپ قالدىڭىز با؟", - دەيدى اقمولا وبلىسىنىڭ اكىمى سەرگەي كۋلاگين.

ءتۇيىن: اقتوبە وبلىسى اكىمىنىڭ ورىنباسارى سارا نۇرقاتوۆا حانىم، ءوزىنىڭ ۇلى مەن كەلىنىن قىزمەتكە العانى ءۇشىن باسى داۋدان ارىلماي، اقىرىندا وتباسىمەن قىزمەتتەن كەتۋ تۋرالى شەشىمگە كەلگەندىگى تۋرالى قازاقستاندىق باق از جازبادى. دەسە دە كۋلاگين مىرزانىڭ قۇرىعى نۇرقاتوۆاعا قاراعاندا ۇزىن بولسا كەرەك.  ايتپەسە جاسى وتىزعا دا تولماي جاتىپ تاسماعامبەتوۆ تاققا وتىرعىزىپ، ساياسي مانساپ بەرگەن پاۆەل سەرگەەۆيچتى وسىنشاما اسپەتتەردەي جاس اكىم جاقسىبەكوۆ مىرزاعا نەسىمەن جاعۋى مۇمكىن؟ پاۆەلدىڭ پوتەنتسيالى قانداي؟ استانانىڭ ءبىر اۋدانىن وركەندەتۋ ءۇشىن ول نە ىستەي الادى؟ وسىعان دەيىن پاۆەلدىڭ پارمەن سالىپ ىستەگەن قانداي شارۋاسىن بىلەمىز؟ بۇل سۇراقتارعا الداعى ۋاقىتتاردا جاۋاپ تابىلا جاتار... ال ازىرگە بىلەتىنىمىز اكىمنىڭ ۇلى اكىم بولىپ تاعايىندالدى.

نۇرگەلدى ابدىعانيۇلى

Abai.kz