بەيسەنبى, 28 ناۋرىز 2024
وزىڭە سەن 7097 0 پىكىر 26 قاراشا, 2015 ساعات 12:26

ۇكىمەت كاسىپورىنداردى قولمەن باسقارۋدا

قازاقستان ۇكىمەتى داعدارىسقا قارسى بىرنەشە باعىتتاردا جەمىستى جۇمىس جۇرگىزىپ كەلەدى دەپ جازادى ءبىزدىڭ ەلەكتروندى پوشتامىزعا ماقالا جولداپ تۇراتىن تۇراقتى اۆتورىمىز ءامىرلان ءالىمجان مىرزا. سونىڭ ءبىرى – ءوندىرىس كولەمىنىڭ تومەندەۋىنە جانە جۇمىسشىلاردى قىسقارتۋعا جول بەرمەۋ.

ينۆەستيتسيالار جانە دامۋ مينيسترلىگى مۇنداي ماسەلەنى وڭ شەشۋ ءۇشىن، ونەركاسىپتىك كاسىپورىنداردى قولمەن باسقارۋ باعىتىندا جۇمىس جۇرگىزۋدە. بۇل تۋرالى 23 قاراشاداعى ۇكىمەتتىڭ سەلەكتورلىق وتىرىسىندا ينۆەستيتسيالار جانە دامۋ ءمينيسترى اسەت يسەكەشەۆ حابارلادى. مينيستر ۇكىمەتتىڭ داعدارىسقا قارسى ءىس-شارالار جوسپارىن قابىلداپ، سونىڭ ناتيجەسىندە ەلىمىزدەگى 200-دەن استام ءىرى كاسىپورىندار مەملەكەتتىك قولداۋعا يە بولعانىن ايتتى.

بىرىنشىدەن، قارا مەتالل سىنىقتارىنىڭ جانە قۇرامىندا التىنى بار شيكىزاتتىڭ ەكسپورتىنا سالىنعان تىيىم 2015 جىلدىڭ سوڭىنا دەيىن  ۇزارتىلدى. ەكىنشىدەن، «قازحروم» ترانسۇلتتىق كومپانياسى» اق-ى، «تاراز مەتاللۋرگيا زاۋىتى» جشس-ءى، «وسكەمەن تيتان-ماگني كومبيناتى» اق-ى، «تەمىرتاۋ ەلەكترومەتاللۋرگيالىق كومبيناتى» اق-ى، «Tau-Ken Temir» جشس-ءى سياقتى كاسىپورىندار ءۇشىن ەلەكتر قۋاتىن جانە ونى جەتكىزەتىن قىزمەت تۇرلەرىنە جەڭىلدەتىلگەن تاريفتەر ۇسىنىلعان. ۇشىنشىدەن، «ارسەلور ميتتال تەمىرتاۋ»، «قازاقستان ءاليۋمينيى»، «سوكولوۆ-سارىباي كەن-بايىتۋ كومبيناتى»، «تەمىرتاۋ ەلەكترومەتاللۋرگيالىق كومبيناتى»، «Bapy Mining»،  «KSP Steel» سياقتى ءىرى كاسىپورىندارعا 2015 جىل بويىنا ماگيسترالدىق تەمىرجول جەلىسى قىزمەتىنىڭ تاريفتەرىنە تومەندەتىلگەن كوەففيتسيەنتتەر بەرىلگەن.

«شاعىن جانە ورتا كاسىپورىندارعا ءىرى كاسىپورىنداردىڭ تاپسىرىسى ارقىلى قولداۋ جاسالدى. سونىڭ ناتيجەسىندە شاعىن جانە ورتا كاسىپورىندار وتاندىق ءىرى كاسىپورىندارمەن جالپى قۇنى 1,3 ترلن. تەڭگەنى قۇرايتىن 23 مىڭنان استام كەلىسىم-شارت جاسادى. اعىمداعى جىلدىڭ 10 ايىنىڭ قورىتىندىلارى بويىنشا، ونەركاسىپتىك ءوندىرىس كولەمى 13 پايىزعا كەمىدى. بۇعان تاۋ-كەن ونەركاسىبى ءوندىرىسىنىڭ 22 پايىزعا تومەندەۋى اسەر ەتتى. بىراق ونىمدەردى قايتا وڭدەۋ ونەركاسىبىندەگى ءوسىم 0,5 پايىزدى قۇرادى» دەپ اتاپ كورسەتتى اسەت يسەكەشەۆ. ينۆەستيتسيالار جانە دامۋ ءمينيسترىنىڭ پايىمداۋىنشا، جوعارىداعى احۋالعا سىرتقى فاكتورلاردىڭ اسەرى زور. ماسەلەن، كوپتەگەن ەلدەردە قايتا وڭدەۋ ونەركاسىبى وتە قيىن جاعدايدى باستان كەشۋدە. مينيستر ءوز بايانداماسىندا كورەيا، نورۆەگيا، فينليانديا، برازيليا جانە ەۋرازيالىق ەكونوميكالىق وداقتاعى ارىپتەسىمىز بەلارۋس رەسپۋبليكاسىن (بۇل ەلدەگى كورسەتكىش 5 پايىزعا كەمىگەن) مىسالعا كەلتىردى.

قازاقستانداعى داعدارىسقا قارسى ءىس-شارالاردىڭ باسقا ەلدەردەن ارتىقشىلىعى بار. ماسەلەن، يندۋستريالاندىرۋدىڭ ءبىرىنشى بەسجىلدىعىندا باسىمدىق بەرىلگەن سالالار قازىر جاعىمدى ءرول اتقارۋدا. مۇنداي سالالارعا ءتۇستى مەتاللۋرگيا، حيميا ونەركاسىبى جانە قۇرىلىس ماتەريلدارى ءوندىرىسىن جاتقىزۋعا بولادى. ينۆەستيتسيالار جانە دامۋ مينيسترلىگى تاراتقان مالىمەتكە سايكەس، شاعىن جانە ورتا كاسىپورىندارعا كورسەتىلگەن قولداۋ ناتيجەسىندە 10 ايدا ارماتۋرا ءوندىرۋ 40 پايىزعا، تسەمەنت شىعارۋ – 14 پايىزعا، كاۋستيكالىق سودا ءوندىرۋ – 34 پايىزعا، اممياك سەليتراسى – 13,4 پايىزعا وسكەن. بۇعان قوسا، كەۋەكتى تيتان ءوندىرىسى 2,8 ەسەگە، تيتان قورىتپاسى مەن قۇيماسى 23 پايىزعا، رافينيرلەنگەن مىس – 20 پايىزعا، فەرروقۇيمالار مەن گلينوزەم – 2 پايىزعا، كۇمىس 30 پايىزعا ۇلعايعان.

 

ءامىرلان ءالىمجان

Abai.kz      

 

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2251
عيبىرات

قايسار رۋحتى عازيز جان

مۇحتار قۇل-مۇحاممەد 3504