بەيسەنبى, 21 قاراشا 2019
بيلىك 18124 11 پىكىر 25 ماۋسىم, 2015 ساعات 19:03

اسكەري وقۋ ورىندارعا قالاي قابىلدانۋعا بولادى؟

بيىل ەلىمىزدە 124 379 وقۋشى مەكتەپ ءبىتىردى. قانشاما جەتكىنشەك ارمانىنا قانات بايلاپ، جاڭا ومىرگە قادام باستى. رەسمي دەرەكتەرگە سايكەس بيىل تۇلەكتەردىڭ 70 پايىزى ۇلتتىق بىرىڭعاي تەستىلەۋدەن ءوتتى. مەكتەپ بىتىرۋشىلەر ءۇشىن ناعىز سىندارلى ءسات ەندى باستالادى. ءارتۇرلى سالا مامانى اتانۋدى كوزدەگەن جاستارىمىز قۇجاتتارىن ارقالاپ، «ەلىمىزدىڭ قاي جوعارى وقۋ ورىنىن تاڭداسام ەكەن، قاي ماماندىقتى مەڭگەرسەم» ەكەن دەپ تولعانىپ ءجۇر. تۇلەكتەردىڭ اراسىندا اسكەري ماماندىق مەڭگەرۋگە قۇلىقتى جاستار دا بار ەكەنىن ەسكەرىپ، قازاقستاندا اسكەري ءبىلىم بەرەتىن قانشا جوو بار، اسكەري ءبىلىم مەكەمەسىنە قالاي وقۋعا قابىلدانۋعا بولادى دەگەن ساۋالدارعا جاۋاپ ىزدەپ كوردىك.

 

الدىمەن قورعانىس مينيسترلىگىنە قاراستى اسكەري ينستيتۋتتارعا توقتالىپ وتەيىك. بۇگىنگى تاڭدا قورعانىس سالاسىنا قاجەتتى اسكەري مامانداردى وقىتاتىن ءۇش نەگىزگى اسكەري ينستيتۋت بار. ولار:قۇرلىق اسكەرلەرىنىڭ اسكەري ينستيتۋتى، راديوەلەكترونيكا جانە بايلانىس اسكەري ينجەنەرلىك ينستيتۋتى سونداي-اق اقتوبە قالاسىنداعى كەڭەس وداعىنىڭ ەكى مارتە باتىرى ت.يا.بەگەلدينوۆ اتىنداعى اۋە قورعانىس كۇشتەرىنىڭ اسكەري ينستيتۋتى.

قۇرلىق اسكەرلەرىنىڭ اسكەري ينستيتۋتى

ەلىمىزدەگى اسكەري ماماندار دايارلاۋ ىسىندە ناعىز ۇستاحانا سانالاتىن قۇرلىق اسكەرلەرىنىڭ اسكەري ينستيتۋتى وفيتسەرلىك كادرلاردى 11 ماماندىق  بويىنشا دايىندايدى:

موتواتقىش اسكەرلەرىنىڭ كوماندالىق-تاكتيكالىق دايارلىعى;

اۋە-دەسانتتىق اسكەرلەرىنىڭ جانە اسكەري بارلاۋدىڭ كوماندالىق-تاكتيكالىق دايارلىعى;

تانك اسكەرلەرىنىڭ كوماندالىق-تاكتيكالىق دايارلىعى;

ارتيللەريانىڭ كوماندالىق-تاكتيكالىق دايارلىعى; 

اۆتوكولىك اسكەرلەرىنىڭ ككوماندالىق-تاكتيكالىق دايارلىعى;

ازىق-تۇلىكپەن قامتاماسىز ەتۋ بويىنشا كوماندالىق-تاكتيكالىق دايارلىق;

كيىم-كەشەكپەن قامتاماسىز ەتۋ بويىنشا كوماندالىق-تاكتيكالىق دايارلىق; جانار-جاعار مايمەن قامتاماسىز ەتۋ بويىنشا كوماندالىق-تاكتيكالىق دايارلىق;

برونەتانكتىق قارۋ-جاراق جانە تەحنيكا;

ينجەنەرلىك اسكەرلەردىڭ كوماندالىق-تاكتيكالىق دايارلىعى;

اسكەرلەردى راكەتا-ارتيللەريالىق قامتاماسىز ەتۋ بويىنشا كوماندالىق-تاكتيكالىق دايارلىق;

اسكەري اۋدارما ءىسى.

قۇرلىق اسكەرلەرىنىڭ اسكەري ينستيتۋتى كەلەسى مەكەنجاي بويىنشا ورنالاسقان: الماتى قالاسى، كراسنوگورسكايا كوش. 35, تەل: 8 (7272) 90-18-20, 90-12-42

راديوەلەكترونيكا جانە بايلانىس اسكەري ينجەنەرلىك ينستيتۋتى

جوو-نىڭ نەگىزگى مىندەتى – قازاقستان رەسپۋبليكاسى قارۋلى كۇشتەرى اسكەرلەرى مەن قارۋلانۋدىڭ زەنيتتى راكەتالىق، راديوتەحنيكالىق اسكەرلەرىنىڭ، بايلانىس بولىمدەرىنىڭ، اۆياتسيانى راديوتەحنيكالىق قامتاماسىز ەتۋدىڭ، اۆتوماتتاندىرىلعان باسقارۋ جۇيەلەرىنىڭ كاسىبي وفيتسەرلەرىن دايىنداۋ بولىپ سانالادى.

ءبىلىم مەكەمەسىندە بولاشاق وفيتسەرلەر 5 ماماندىق بويىنشا وقىتىلادى:

راديوبايلانىس پەن كوزدەۋ;

راديوبايلانىس پەن زەنيتتى راكەتالىق اسكەرلەردىڭ قوندىرعىلارىن جوندەۋ;

زەنيتتى راكەتالىق اسكەرلەردىڭ بولىمدەرى مەن بولىمشەلەرىنىڭ راديوتەحنيكاسى;

راديوتەحنيكالىق اسكەرلەردىڭ بولىمدەرى مەن بولىمشەلەرىنىڭ راديوتەحنيكاسى;

قر قك اۆتوماتتى باسقارۋ جۇيەلەرىنىڭ ينجەنەرى.

كەڭەس وداعىنىڭ ەكى مارتە باتىرى ت.يا.بەگەلدينوۆ اتىنداعى اۋە قورعانىس كۇشتەرىنىڭ اسكەري ينستيتۋتى

اۋە قورعانىسى كۇشتەرىنىڭ اسكەري ينستيتۋتى دەپ اتى ايتىپ تۇرعانداي ەلىمىزدەگى اسكەري ۇشقىش، اسكەري ينجەنەر مامانداردى ازىرلەيتىن جالعىز ءبىلىم ورداسى. ينستيتۋتتىڭ نەگىزگى مىندەتتەرى – اسكەري اۆياتسياعا  وفيتسەرلىك كادرلاردى دايىنداۋ، اسكەري تەوريانى دامىتۋ، قوعامدىق عىلىمداردىڭ اسكەري، قارۋ-جاراق، اۆياتسيالىق اسكەري تەحنيكانىڭ ماسەلەلەرىنە  باعىتتالعان عىلىمي زەرتتەۋلەر جۇرگىزۋ، اسكەرلەردىڭ قاۋىپسىزدىگى جانە جاۋىنگەرلىك دايىندىعىن ارتتىرۋ بولىپ تابىلادى.

ينستيتۋت بولاشاق مامانداردى 8 ماماندىق بويىنشا دايارلايدى:

ۇشقىش اپپاراتتارىن پايدالانۋ، فرونتتىق اۆياتسيانىڭ كوماندالىق تاكتيكاسى;

ۇشقىش اپپاراتتارىن پايدالانۋ، ارميا اۆياتسياسىنىڭ كوماندالىق تاكتيكاسى;

شتۋرماندىق اۆياتسيانىڭ تاكتيكاسى;

اۆياتسيامەن جاۋىنگەرلىك باسقارۋدىڭ كوماندالىق تاكتيكاسى;

ۇشقىش اپپاراتتاردىڭ جانە وتالعىشتاردىڭ تەحنيكالىق پايدالانۋى; اۆياتسيالىق راديوەلەكتروندى قۇرال-جابدىق;

اۆياتسيالىق ەلەكتروفيكاتسيالىق جانە ۇشقىشتىق-كوزدەۋىش راديوەلەكتروندى قۇرال-جابدىقتىڭ تەحنيكالىق پايدالانۋى;

اۆياتسيالىق قارۋ-جاراقتانۋ.

اۋە قورعانىس كۇشتەرىنىڭ اسكەري ينستيتۋتى اقتوبە قالاسى، مولداعۇلوۆا كوشەسى 16 مەكەنجايىندا ورنالاسقان. تەل: 8 (7132) 52-28-45; 52-16-88.

تومەندە كورسەتىلگەن وقۋعا قابىلداۋ ەرەجەسى ءۇش اسكەري ينستيتۋتقا دا بىرەي قاتىسى بار.

وقۋعا قابىلداۋ ەرەجەلەرى

ال، ەندى وسى جوعارىدا اتالعان اسكەري ءبىلىم مەكەمەسىنە وقۋعا بارام دەۋشى تۇلەكتەر نە ىستەۋى كەرەك؟ قانداي قۇجاتتاردى قايدا وتكىزەدى؟

1)     اسكەري ماماندىقتى تاڭداعان تۇلەك 25 شىلدەگە دەيىن تەگىن، اتىن جانە اكەسىنىڭ اتىن، تۋعان كۇنىن، ءبىلىم دەڭگەيىن، اسكەري وقۋ ورنىنىڭ جانە ول بويىنشا وقۋعا نيەت بىلدىرگەن ماماندىقتىڭ اتاۋىن كورسەتە وتىرىپ، جەرگىلىكتى اسكەري باسقارۋ ورگاندارىنا ءوتىنىش جولدايدى;

2)     قازاقستان رەسپۋبليكاسى قورعانىس مينيسترلىگىنىڭ اسكەري ءبىلىم جانە عىلىم دەپارتامەنتى جىل سايىن 20 ماۋسىمعا دەيىن قازاقستان رەسپۋبليكاسى قورعانىس ءمينيسترىنىڭ بۇيرىعىمەن قابىلداۋ جانە اپەللياتسيالىق كوميسسيالاردىڭ قۇرامدارىن، ولاردىڭ مىندەتتەرىن، قابىلداۋ كوميسسياسىنىڭ جۇمىس جوسپارىن، سونداي-اق ۇبت-دان ءوتۋ بالىن بەكىتەدى.

3)     جوعارى اسكەري وقۋ ورىندارىنا قابىلداۋ 1-25 تامىز ارالىعىندا وتەدى. اسكەري ءبىلىم مەكەمەسىن تاڭداعان تۇلەك ەڭ اۋەلى ۇبت قورىتىندىسىن اپارادى. اسكەري ينستيتۋتتاردىڭ تالابى – تەستىلەۋدىڭ بالى جوعارى بولۋى ءتيىس.   

4)     كەلەسى كەزەكتە ۇبت بالى جەتكىلىكتى دەپ شەشىلگەن سوڭ، تۇلەكتەر دەنە دايارلىعى بويىنشا نورماتيۆتەر تاپسىرادى;

5)     مەديتسينالىق تەكسەرىستەن وتەدى;

6)     پسيحولوگيالىق تەست تاپسىرادى.

بۇگىنگى تاڭدا بىلەككە ەمەس، بىلىمگە سەنەتىن زامان. ۋاقىت وزگەرگەن سايىن، زامان تۇرلەنىپ، تالاپ تا كۇشەيدى. اسكەري سالاعا بارامىن دەۋشى تۇلەك ءۇشىن، ءبىلىم جانە دەنە دايارلىعىنىڭ جوعارى كورسەتكىشى ماڭىزدى ماسەلە بولىپ تابىلادى. سپورتتا دارەجەلى بولىپ، حالىقارالىق جارىستاردىڭ جەڭىمپازى بولسا ءتىپتى جاقسى. ءبىر ورىنعا بىردەي ۇپايمەن تالاس تۋعان جاعدايدا، سپورتتىق جەتىستىكتەر مەن وليمپياداداعى جەتىستىكتەر ەسكەرىلەدى. ودان كەيىن تالاپكەردىڭ ينتەللەكتىسى ماڭىزدى ورىن الادى. ويتكەنى، ول جەردە قاتارداعى سارباز ەمەس، بەرگەن تاپسىرمانى ورىنداي الاتىن، ماسەلەنى شەشۋگە كەلگەندە تاپتىرمايتىن مامان – بولاشاق وفيتسەرلەر دايارلانادى.

 

ىشكى ىستەر مينيسترلىگى توتەنشە جاعدايلار كوميتەتىنىڭ كوكشەتاۋ تەحنيكالىق ينستيتۋتى

قازاقستان رەسپۋبليكاسى ىشكى ىستەر مينيسترلىگى توتەنشە جاعدايلار كوميتەتىنىڭ كوكشەتاۋ تەحنيكالىق ينستيتۋتىندا كۇندىزگى جانە سىرتتاي وقۋ تۇرلەرى بويىنشا ماماندار ازىرلەنەدى. وقۋدى بىتىرگەن سوڭ كۇندىزگى وقۋ ءتۇرىنىڭ تۇلەكتەرىنە اسكەري ءىس جانە قاۋىپسىزدىك باكالاۆرى اكادەميالىق دارەجەسى مەن «ورتكە قارسى قىزمەت لەيتەنانتى» ارنايى اتاعى بەرىلەدى.

ماماندىقتار:

ء«ورت قاۋىپسىزدىگى»;

«توتەنشە جاعدايلاردا قورعاۋ»;

«ازاماتتىق قورعانىستىڭ كوماندالىق-تاكتيكالىق كۇشى»

اتالمىش ماماندىقتاردى مەڭگەرگەن ماماندار وقۋ ورنىن بىتىرگەن سوڭ، قازاقستان رەسپۋبليكاسى ءىىم توتەنشە جاعدايلار كوميتەتىنىڭ بولىمشەلەرىندە جۇمىسقا تۇرعىزىلادى.

وقۋعا قابىلداۋ شارتتارى:

ازاماتتاردى ينستيتۋتقا قابىلداۋ ءتورت كەزەڭ بويىنشا وتەدى:

ءبىرىنشى كەزەڭدە ينستيتۋتتىڭ مەملەكەتتىك قابىلداۋ كوميسسياسى ۇبت نەمەسە تكت (قازاق نەمەسە ورىس تىلدەرى، قازاقستان تاريحى، ماتەماتيكا جانە ءتورتىنشى ءپان - فيزيكا، بەيىندى ءپان – ماتەماتيكا) سەرتيفيكاتىنداعى بالدارعا سايكەس ىرىكتەۋدى وتكىزىپ، وقۋعا ۇمىتكەرلەردى قالىپتاستىرادى;

ەكىنشى كەزەڭدە مەديتسينالىق جانە پسيحوفيزيولوگيالىق كورسەتكىشتەر بويىنشا ىرىكتەۋ وتەدى;

ءۇشىنشى كەزەڭدە دەنە شىنىقتىرۋ كورسەتكىشتەرى بويىنشا ىرىكتەۋ جۇرگىزىلەدى  ءتورتىنشى كەزەڭدە - مانداتتىق كوميسسيا كۋرسانتتار قاتارىنا قابىلدايدى.

قازاقستان رەسپۋبليكاسى ۇلتتىق ۇلانى اسكەري ينستيتۋتى

ينستيتۋت ۇلتتىق ۇلانعا كوماندالىق، تاربيە جانە الەۋمەتتىك-قۇقىقتىق، تىلدىق، اۆتوموبيلدىك، ينجەنەرلىك-تەحنيكالىق، راكەتا-ارتيللەريالىق قامتاماسىز ەتۋگە تاكتيكالىق باسشىلىق ەتۋ ماماندىقتارى بويىنشا وفيتسەرلەر دايارلاپ، «لەيتەنانت» اسكەري اتاعىن جانە ماماندىعىنا سايكەس بىلىكتىلىگىن قوسا بەرەدى. وقىتۋ باعدارلاماسىندا كۋرسانتتاردىڭ ەەم وپەراتورلارى جانە «ۆس» ساناتتى جۇرگىزۋشى ماماندىقتارىن مەڭگەرۋى قاراستىرىلعان. كۋرسانتتاردى وقىتۋ 7 كافەدرادا جۇرگىزىلەدى.

ۇلتتىق ۇلاننىڭ اسكەري ينستيتۋتىندا ءبىلىم الۋدى ارمان ەتكەن تالاپكەرلەر قاتاڭ تالاپ سۇزگىسىنەنوتەدى. دەنساۋلىعىنا، كۇش-قۋاتىنا ەرەكشە ءمان بەرىلەدى. دەنە شىنىقتىرۋ دايىندىعىنان نورماتيۆتەر، اسكەري-كاسىپتىك باعىتتاعى پسيحولوگيالىق تەست، بىرنەشە پاننەن كەشەندى سىناق تاپسىرادى.

قر ىشكى ىستەر مينيسترلىگىنىڭ  الماتى اكادەمياسى

 

قر ءىىم الماتى اكادەمياسى كەلەسىدەي ماماندىقتار بويىنشا وقىتادى:

تەرگەۋ-كريميناليستيكا قىزمەتى;

جەدەل ىزدەستىرۋ قىزمەتى;

جەدەل-كريميناليستيكا قىزمەتى;

اكىمشىلىك-قۇقىقتىق قىزمەتى

ەرەجەگە سايكەس اكادەمياعا كاسىپتىك-تەحنيكالىق جانە جالپى ورتا ءبىلىمى بار، ىشكى ىستەر ورگاندارى قىزمەتكەرلەرىنە قويىلاتىن تالاپتارعا جاۋاپ بەرەتىن، وقۋعا جانە اسكەري قىزمەتكە دەنساۋلىعى جارامدى، 16 جاسقا تولعان جانە 25 جاستان اسپايتىن قازاقستان رەسپۋبليكاسىنىڭ ازاماتتارى قابىلدانادى. كەشەندىك تەستىلەۋ ازاماتتاردىڭ قالاۋى بويىنشا قازاق نەمەسە ورىس تىلدەرىندە جانە نەگىزگى ءپان (دۇنيەجۇزى تاريحى) بويىنشا كورسەتىلگەن ماماندىقتار تىزىمىنە سايكەس جۇرگىزىلەدى.

مەكەنجايى: الماتى قالاسى، وتەپوۆ كوشەسى، 29.

تەل: 8(727) 337-81-11, فاكس: 8(727) 337-80-88. ينتەرنەت پوشتا: Akademy_mvd@mail.ru سايت

قر ءىىم قاراعاندى زاڭ ينستيتۋتى

قازاقستان رەسپۋبليكاسى ۇكىمەتىنىڭ قاۋلىسىمەن 2001 جىلى قر ءىىم قاراعاندى زاڭ ينستيتۋتىنا ب.س.بەيسەنوۆتىڭ ەسىمى بەرىلىپ، 2005 جىلدىڭ 5 مامىرىندا عۇلاما تۇلعاعا ارناپ، جوو-نىڭ اۋماعىندا ەسكەرتكىش ورناتىلدى.

ينستيتۋت تومەندەگى ماماندىقتار بويىنشا كادرلار دايارلايدى:

قىلمىستىق قۇقىق، كريمينولوگيا جانە قىلمىستىق-اتقارۋ قۇقىعى;

قىلمىستىق ءىس جۇرگىزۋ;

كريميناليستيكا جانە سوت ساراپتاماسى;

جەدەل-ىزدەستىرۋ قىزمەتى.

قر ءىىم م.بوكەنباەۆ اتىنداعى اقتوبە زاڭ ۋنيۆەرسيتەتى

اقتوبە زاڭ ۋنيۆەرسيتەتى «قۇقىققورعاۋ ءىسى» ماماندىعى بويىنشا اسكەري كادرالاردى وقىتادى. ءبىلىم ورداسى بيىلعى تۇلەكتەردى وقۋ جۇيەسىنە ەنگىزىلگەن جاڭا وزگەرىمتەر بويىنشا قابىلدايتىنىن ايتا كەتكەنىمىز ءجون. قىسقارتىلعان باعدارلاماعا ساي تۇلەكتەر 2 جىل ءبىلىم الىپ، زاڭگەر ماماندىعىن مەڭگەرۋىنە مۇمكىندىك بەرىلىپ وتىر. ىشكى ىستەر مينيسترلىگى ۆەدوموستۆوسى باسشىلارىنىڭ ايتۋىنشا، 2016 جىلدان باستاپ اقتوبە زاڭ ينستيتۋتىن كاسىبي قايتا دايارلىقتان ءوتۋ ءۇشىن بىلىكتىلىكتى كوتەرۋ جانە كادرلاردىڭ بىلىكتىلىگىن ارتتىرۋ ينستيتۋتىنا اينالدىرۋ جوسپارلانىپ وتىر.

ينستيتۋتتىڭ مەكەن-جايى: اقتوبە قالاسى، 41-جول ايرىعى، كۋرسانتتار تاس جولى 1, 8(7132)41-43-15, 41-43-21, 98-80-37.

بۇگىنگى تاڭدا سولتۇستىك قازاقستان وبلىستىق ءىىد كادرلىق بولىمشەلەرى قازاقستان رەسپۋبليكاسى ىشكى ىستەر مينيسترلىگىنىڭ وقۋ ورىندارىن جابدىقتاۋ جۇمىستارىن باستادى.

مەديتسينالىق كوميسسيا، سونىمەن قاتار، ارنايى تەكسەرۋلەردى وتكىزۋگە بايلانىستى ءىىم جۇيەسىنىڭ ءبىلىم مەكەمەلەرى تالاپكەرلەردى تاڭداۋدى ۋاقىتىنان بۇرىن قولعا الادى. پوليتسيانىڭ وقۋ ورىندارىنا قابىلداۋ ەكى كەزەڭ بويىنشا جۇزەگە اسىرىلادى: ءبىرىنشى كەزەڭ – مەديتسينالىق، فيزيكالىق جانە پسيحولوگيالىق كورسەتكىشتەردى قامتىسا، ەكىنشىسىندە قابىلداۋ كوميسسياسى ۇمىتكەرلەردى تىڭداۋشىلار قاتارىنا قابىلداي باستايدى. قر ءىىم وقۋ ورىندارىنا تۇسۋگە قۇجاتتاردى ازىرلەۋ بارىسىندا قويىلاتىن باستى تالاپتار – ورتا جانە ورتا جوعارى ءبىلىم، سونىمەن قاتار، جاس مولشەرى 25-تەن اسپاۋى ءتيىس.

ءىىم وقۋ ورىندارىنا تۇسۋگە ۇمىتكەرلەردىڭ فيزيكالىق دايارلىعىنا جانە مەديتسينالىق كورسەتكىشتەرىنە ەرەكشە كوڭىل بولىنەدى. كاسىپ مىقتى دەنساۋلىقتى قاجەت ەتەتىندىكتەن، اسكەري-دارىگەرلىك كوميسسيا تەكسەرىستى ەكى اينالىم بويىنشا وتكىزەدى.

ۇقك شەكارا قىزمەتىنىڭ اكادەمياسى

اكادەميادا وقۋ مەرزىمى 4 جىل. 5 ماماندىق بويىنشا كادرلار دايارلانادى:

كوماندالىق-تاكتيكالىق;

جەدەل-بارلاۋ قىزمەتى;

شەكارالىق باقىلاۋ;

كينولوگيا;

قىزمەتتىك-جاۋىنگەرلىك ءىس-ارەكەتتى مورالدىق-پسيحولوگيالىق قامتاماسىز ەتۋ.

مەكەن-جايى: الماتى قالاسى، دوستىق داڭعىلى 103, تەل/فاكس: 8 (727) 264 65 29, e-mail: viknbrk@mail.ru

ۇلتتىق قاۋىپسىزدىك كوميتەتنىڭ ينستيتۋتى

ينستيتۋتتىڭ نەگىزگى مىندەتى – باسشىلىق بۋىننىڭ وفيتسەر كادرلارىن دايىنداۋ، سونداي-اق قر كك-ءنىڭ شەكارا اسكەرلەرى ءۇشىن وفيتسەر قۇرامىن قايتا دايىنداۋ مەن بىلىكتىلىگىن ارتتىرۋ، اسكەري عىلىمي-پەداگوگيكالىق ماماندارىن دايىنداۋ.

مۇندا قابىلداۋ كوميسسياسى قاراشا ايىنان باستاپ جۇمىس ىستەيدى. تالاپكەر 10 اي بۇرىنء وتىنىش بەرىپ قويۋى قاجەت. الدىمەن جەرگىلىكتى جەردەگى  ۇقك-ءنىڭ (اۋىلدىق جەردە بولسا اۋدان ورتالىعىنا بارىپ) كادرلار بولىمىنەن نە ىستەۋ كەرەك ەكەنىن سۇرايدى. ولار ارنايى تەكسەرۋدەن وتكىزگەننەن كەيىن، قۇزىرلى ورگان اكادەمياعا تاپسىرۋىڭىزعا ۇسىنىس بەرەدى. مەديتسينالىق كوميسسيادان ءوتىپ، مەكتەپتىڭ اتتەستاتىن «قۇشاقتاپ»، ايماقتىق ۇقك-ءنىڭ باسقارماسىنداعى قابىلداۋ كوميسسياسى مەن مانداتتى كوميسسيانىڭ قاراۋىنا بارادى. ودان وتكەننەن كەيىن ۇبت-ءنىڭ ناتيجەسىمەن ينستيتۋتقا تىكە تارتۋعا بولادى.

ال، ۇلتتىق قاۋىپسىزدىك كوميتەتىنىڭ ينستيتۋتى مەن اكادەمياسىنىڭ ايىرماسىن اجىراتا الماي جۇرگەندەر بولسا، جاۋاپ مىنانداي: اكادەميانى تامامداعان تۇلەك ۇقك ورگاندارىنا جۇمىسقا قابىلدانا بەرەدى، ال ينستيتۋت تامامداعاندار شەكاراشى قىزمەتىنە كەتەدى. اكادەمياعا تاپسىرعىسى كەلگەندەر اعىلشىن ءپانىن، ينستيتۋتقا تۇسكىسى كەلگەندەر گەوگرافيا ءپانىن تاڭداۋى كەرەك.

قادىرمەندى تۇلەكتەر، جوعارىدا اتالعان اسكەري ماماندىقتار بويىنشا كادرلار ازىرلەيتىن جوعارى وقۋ ورىندارىندا ءبىلىم الۋ مەملەكەت تاراپىنان تەگىن ەكەنىن قايتالاپ ايتقىم كەلەدى. جولىڭىز بولىپ، وقۋعا قابىلدانعان جاعدايدا 4 جىل تەگىن جاتىن ورىن، كيىم-كەشەك، تاماق سونداي-اق شاكىرتاقىمەن قامتاماسىز ەتىلەتىن بولاسىزدار!!! 

P.S. اسكەري سالانى تاڭداعان تۇلەكتەر، ءبىز تىزبەكتەپ وتكەن وقۋ ورىندارى وتان قورعاۋ، قۇقىق، ءتارتىپ سەكىلدى ۇعىمدارعا نەگىزدەلگەندىكتەن، بۇل سالادا السىزدىك، شىدامسىزدىق سەكىلدى قاسيەتتەرگە ورىن جوق ەكەنىن ەسكەرگەندەرىڭىز ابزال. بولاشاق اسكەري مامان يەسى – بولاشاق وتان قورعاۋشى مامان. بارشاڭىزعا ساتتىلىك تىلەيمىز!

 

باقىتگۇل ابايقىزى

el.kz

11 پىكىر