"اقتوبەلىك تۇركولوگ عالىم، تاريح عىلىمىنىڭ دوكتورى تالعات جۇماعانبەتوۆ 1000 تەڭگەلىك كۋپيۋرادان قاتە تاپتى" دەپ حابارلايدى Tengrinews.kz

تاريحشىنىڭ سوزىنە قاراعاندا، جاڭا بانكنوتتا بەينەلەنگەن، تاستان جاسالعان باس ءمۇسىنى ەكىنشى تۇرىك قاعاناتىندا اسكەري قولباسشى بولعان كۇلتەگىنگە تيەسىلى ەمەس.

تاريحشى عالىمنىڭ ايتۋىنشا، ونى جۋرناليستەرگە جۇگىنۋگە ينتەرنەتتەگى روليك ماجبۇرلەگەن. ول روليكتە سۇحبات بەرۋشى 1000 تەڭگەلىك كۋپيۋرانى جاساۋعا مۇقيات دايىندالعانىن ايتقان. "مەنىڭ اشۋىمدى كەلتىرگەنى، بۇل بەينەنى 1000 تەڭگەلىك كۋپيۋرگە ورنالاستىرۋدا تۇركولوگتارمەن اقىلداسپاعان. بۇل تاقىرىپ جاپونيادا، اقش-تا، ەۋروپادا زەرتتەلىپ جاتىر. ەرتەڭ ولار ءبىزدىڭ ۇستىمىزدەن كۇلەتىن بولادى، بۇل ءبىزدىڭ تاريح قوي" دەگەن جۇماعانبەتوۆ.

ونىڭ سوزىنە قاراعاندا 1000 تەڭگەلىك بانكنوتتا بەينەلەنگەن تاستان مۇسىندەلگەن باس كۇلتەگىنگە تيەسىلى ەمەس ەكەنىن انىقتاۋ ءۇشىن ءسال عانا تۇركىلەر تۋرالى تۇسىنىك بولسا، سونىڭ ءوزى دە جەتكىلىكتى. تاڭىرشىلدىكتە شاشقا تابىنۋ بولعان. كۇلتەگىننىڭ قابىر باسىنداعى جازبادا، "ونىڭ ارعى اتاسى بۋمىنيانى جانە ونىڭ جۇبايىن ءتاڭىر قۇدايى شاشىنان ۇستاپ تاققا وتىرعىزدى" دەلىنگەن. سوندىقتان "شاش قانشالىقتى ۇزىن بولسا، قۇدايمەن بايلانىسى سونشا كۇشتى بولادى" دەگەن ۇعىم بولعان. ەرلەر شاشتى 40 ءورىم ەتىپ ورگەن، ساقال-مۇرتىن دا ۇزىن قىلىپ وسىرگەن. ال مىنا مۇسىندە ۇزىن مۇرتتان دا، ۇزىن ساقالدان دا نىشان جوق.

تاريحشىنىڭ ويىنشا، 1000 تەڭگەلىك اقشادا ايەل ادامنىڭ باسى بەينەلەنگەن. ء"بىز بۇل ايەلدىڭ كىم ەكەنىن بىلمەيمىز. ءبىزدىڭ بولجام بويىنشا، بۇل كۇلتەگىننىڭ جۇبايى، ءوزىنىڭ كەڭەسشىسى، اشيدە رۋىنان شىققان ايگىلى تونىكوكتىڭ قىزى بولۋى ىقتيمال. بىراق بۇل كۇلتەگىن ەمەس ەكەنى انىق. 1000 تەڭگەلىك بانكنوتتا جىبەرىلگەن قاتەلىك تۋرالى بارلىق تۇركولوگتار بىلەدى. اقشانى دايىنداپ، ونى تاراتپاس بۇرىن ماماندارمەن اقىلداسپاعانى وكىنىشتى" دەپ قوستى عالىم.

ەستەرىڭىزگە سالساق، قازاقستان ۇلتتىق بانكى 1000 تەڭگەلىك جاڭا بانكنوتتى 2013 جىلدىڭ 12 جەلتوقسانىندا اينالىمعا شىعارعان بولاتىن. بانكنوتتىڭ ءتۇسى قوڭىر-سارى. بەت جاعىندا كۇلتەگىن ءمۇسىنى، "قازاق ەلi" مونۋمەنتى جانە ۇشىپ جۇرگەن كوگەرشىندەر بەينەلەنگەن. مامىر ايىنىڭ باسىندا 1000 تەڭگەلىك كۋپيۋرا حالىقارالىق بانكنوتتار قاۋىمداستىعىنىڭ "2013 جىلدىڭ ۇزدىك بانكنوتى" دەگەن اتاعىنا لايىق دەپ تابىلعان بولاتىن.

اباي-اقپارات