جۇما, 29 ناۋرىز 2024
46 - ءسوز 6758 0 پىكىر 27 ماۋسىم, 2014 ساعات 12:51

"كورەسىڭ ءالى كوكەم كەلەدى"

...17 جاسىمنان باستاپپىن. اۋەلى اۋداندىق، وبلىستىق، رەسپبۋليكالىق گازەتتىڭ وبلىستاعى مەنشىكتى ءتىلشىسى، رەسپۋبليكالىق گازەتتىڭ ءبولىم مەڭگەرۋشىسى... وسىلاي جالعاسىپ كەتە بەرەدى. قازىر قازاق ءباسپاسوزى سالاسىندا بىرەۋ ءبىلىپ، بىرەۋ بىلمەيتىن اتى-ءجونىم بار كورىنەدى. بىراق وسى ۋاقىتقا دەيىن ۇيرەنىپ بولماعان سياقتىمىن. ەشتەڭە بىتىرمەگەن سەكىلدىمىن. تەككە كەتىپ جاتقان ۋاقىت... ءىشىم اشيدى. گازەت-جۋرنالداردا جاريالانعان ماقالاسىماقتارىمنىڭ باسىن ءبىر جەرگە ءۇيىپ كىتاپ شىعارۋ دا مەنىڭ شابان ويلايتىن ميىمنىڭ ماڭايىنا جۋىماپتى. ونىڭ ۇستىنە سونى ءوزىم دە اسا قالامايمىن. كىمگە كەرەك ءبىزدىڭ شيماي-شاتپاعىمىز؟ بۇگىنگى جازعانىڭ بۇگىنگىنىڭ بۇكتەۋىندە كەتەدى. ەرتەڭىندە ەشتەڭە جوق. 
قازاق ءباسپاسوزى (تۆ، راديو، ت.ب.) قۇردىمعا كەتىپ بارادى (الدە كەتىپ تىندى ما؟) ويتكەنى بيلىككە جاقپادى. «قازاق ءباسپاسوزى پاتريوت ەمەس» دەيدى بيلىك (ارينە، بۇنى «كاسىبيلىگى تومەن»، «اناۋ-مىناۋ» دەپ ءسال باسقاشالاۋ ايتادى). پاتريوت دەگەن مەنىڭشە – وتاندى ءسۇيۋ، بيلىكتى ءسۇيۋ ەمەس. قازاق جۋرناليستيكاسىندا قانشاما تالانتتى ۇل-قىز «پاتريوت» بولا الماعاندىقتارىنان قىزمەتتەرىنەن قۋىلدى، قانشاسى قولدى ءبىر-اق سىلتەپ باسقا سالاعا اۋىسىپ كەتتى... قيساپ جوق. 
ءباسپاسوز كۇنىنىڭ قارساڭىندا تەلەارنا بىتكەن مەنەن سۇحبات العىش. سۇراقتارى سول باياعى ءبىر سۇراق: قازاق باسپاسوزىنە نە جەتىسپەيدى؟ ارىپتەستەردىڭ كوڭىلى ءۇشىن ءايتىپ-ءبۇيتىپ جاۋاپ بەرگەن بولاسىڭ، ويتكەنى مەنىڭ بەتكە ۇرعانداي ەتىپ ايتا سالاتىن پىكىرىم وتپەيدى. سويتە تۇرىپ ءوزىمدى دە، ولاردى دا ايايمىن. قازاق ءباسپاسوزىنىڭ ماسەلەسى بار عوي، ءبىر-اق ماسەلەگە تىرەلىپ تۇر. ول – ءتىل ماسەلەسى. ال، ءتىل ماسەلەسى بار عوي، رەسمي بيلىكتىڭ ناقتى شەشىمىنە تىرەلىپ تۇر. بايى ساباعان قاتىنداي قاشانعى ءبارىن وزىمىزدەن كورە بەرەمىز؟ شىندىعى وسى ەمەس پە؟ قازاق باسپاسوزىنە اقپاراتتىق تەحنولوگيانىڭ دەندەپ ەنۋى، قازاق جۋرناليستەرىنىڭ كاسىبي بىلىگىنىڭ كەمەلدەنە ءتۇسۋى الدىمەن ونىڭ قوعامداعى ورنىن باعالاۋدان، قۇرمەتتەۋدەن، ساناسۋدان باستالادى. وسىنىڭ ءبىرى بولماعان جەردەن نە ونەدى دەيسىز؟
باستاپقى سوزىمىزدە «وسى ۋاقىتقا دەيىن ۇيرەنىپ بولماعان سياقتىمىن. ەشتەڭە بىتىرمەگەن سەكىلدىمىن» دەگەندى ايتتىم. ايتسەدە بۇل مەنىڭ «اي قاراپ، جۇلدىز ساناپ جۇرگەنىمدى» بىلدىرمەسە كەرەك. ەتكەن ەڭبەگىڭ، توككەن تەرىڭ (مەنىڭ عانا ەمەس، ءبارىمىزدىڭ) دالاعا كەتكەن سوڭ، ناتيجەگە جەتپەگەن سوڭ نە ءبىتىردىم دەي الاسىڭ؟ ەسەسىنە ءبىزدىڭ ءورىستىلدى ارىپتەستەرىمىز جان قيناپ، ارىپ-اشىماي-اق ءتورتىنشى بيلىكتىڭ تورىنە شىعىپ الدى. 
ءبىز ءبارىمىز قازىر جادىگەردىڭ زارلى كۇيىن كەشىپ ءجۇرمىز. كۇش جەتەدى، جۇرەك بار. جۇيرىككە ءمىنىپ جەلەر ەدىك، قول-اياعىمىز كىسەندەۋلى، قوزى باعىپ ءجۇرمىز. «كورەسىڭ ءالى كوكەم كەلەدى!»
بۇگىن بە ەدى، ەرتەڭ، الدە ونىڭ ارعى كۇنى مە ەدى كاسىبي مەرەكەمىز؟ مەن قازىر سوعان اسا ءمان بەرمەيتىن بولىپ بارامىن. دەگەنمەندە سىيلىق الىپ، سىي-سىياپاتقا بولەنىپ جاتقاندارعا قۇتتى بولسىن دەلىك. قايتسەكتە قاجىمايىق.

(داۋرەن قۋاتتىڭ فەيسبۋكتەگى پاراقشاسىنان) 

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2277
عيبىرات

قايسار رۋحتى عازيز جان

مۇحتار قۇل-مۇحاممەد 3596