انكارادا وقىپ جۇرگەن قازاق ءبىلىمپازدارىنىڭ  ۇيىمداستىرۋىمەن  جاستار ساياباعىندا  دۋماندى كەش ءوتتى. قازاق ەلىندە كەڭ قانات جايىپ كەلە جاتقان «دومبىرا پاتي» جانە «اسىق پاتي» ۇلگىسىندە وتكىزىلگەن كەشتىڭ ءالحيساسى انۇرانمەن اشىلدى، ازاماتتار اۋىلدا وتكەن بالالىق كۇنىن ەسكە الىپ اسىق اتىپ مەرگەندىگىن سىنادى. ىلە-شالا جايلاۋدىڭ كوك شالعىنىنا جايعاسقانداي ساياباقتا القا-قوتان وتىرعان كوپشىلىك قاسيەتتى دومبىرانىڭ ۇنىمەن تىنىستاپ، شىرقالعان اندەرگە شابىتتانا ەلىتتى.

قۇلاق قۇرىشىڭدى قاندىرىپ، قۋات كۇشىڭدى ەسەلەيتىن قازاق اندەرىن كەزەكتەسە شىرقاعان ءانشى جاستاردىڭ ونەرىنە سەرۋەندەپ جۇرگەن جەرگىلىكتى تۇرعىندار دا  ءتانتتى بولىپ ەلەڭ ەتىپ تىڭداستى. ءال-فارابي اتىنداعى قازۇۋ-دىڭ فيلولوگيا، ادەبيەتتانۋ جانە الەم تىلدەر فاكۋلتەتىنەن سىرتقى اكادەميالىق ۇتقىرلىق باعدارلاماسى بويىنشا كەلگەن بەلسەندى ستۋدەنتتەردىڭ ونەرى بارلىق كورەرمەندى ءبىر سىلكىنتىپ، قوسىلا ءان سالۋعا جەتەلدى. اتالعان وقۋ ورنىنان گازي ۋنيۆەرسيتەتىنە وقۋ تاجىريبەسى بويىنشا ات باسىن تىرەگەن  ارحەولوگيا-ەتنولوگيا ماماندىعى بويىنشا ماگيسترلەر دە كەش كورىگىن قىزدىرۋعا ات سالىستى.

ۇلتتىق رۋحتىڭ شىراعى جاعىلعان ءساليحالى ورتادا «ەلەكتروندى قازاق ءۇي» ءونىمىنىڭ تانىستىرىلىمى بولدى. يگى شارانى ۇيىمداستىرعان گازي ۋنيۆەرسيتەتىنىڭ جۋرناليستيكا ماماندىعى بويىنشا دوكتورانتى مىرزاحان بايبول باستاعان ۇلتشىل ازاماتتاردىڭ جاقسى باستاماسىنا جيىلعان قاۋىم جوعارى باعا بەرىپ، جالعاسا بەرۋىن تىلەپ تارقاستى. اسىرەسە تۇركيادا تۇرعانىنا بىرنەشە جىل بولعان قانداستارىمىز تۋعان ەلگە دەگەن ساعىنىشىن ءسال دە بولسا سايابىرسىتىپ، مارقايىپ قالعاندارىن قۋانا جەتكىزدى.

ساۋلە تۇزمان، انكارا قالاسىنىڭ تۇرعىنى:

- ايتارعا ءسوز تاپپاي تۇرمىن، اۋىلعا بارىپ كەلگەندەي اسەرلەندىم. وتە قاجەتتى شارا بولعاندىقتان، ءجيى-ءجيى وتكىزىپ تۇرۋ كەرەك دەپ سانايمىن. مەنىڭ مۇندا كەلگەنىمە 22 جىل بولدى. بۇنداي باس قوسۋلار وتاننان جىراق جۇرگەن باۋىرلارىمىز ءۇشىن رۋحاني ازىق بولادى دەپ ويلايمىن. ءبىر اتاپ وتەرلىگى، تابيعي، شىنايى ءوتتى. بۇل وتە دۇرىس، كەڭ تاراتىپ، جاستاردى تارتۋ كەرەك.

گامزە، گازي ۋنيۆەرسيتەتىنىڭ مۋزىكا ماماندىعى بويىنشا 1-كۋرس ستۋدەنتى:

- مەن قازاقتاردى ءوزىمىزدىڭ باۋىرلارىمىز رەتىندە جاقسى قابىلدايمىن. قازاقتاردىڭ ولەڭدەرىن، دومبىراسىن، ءداستۇرلى ونەرىن جاقسى قۇرمەتتەيمىن، ءسۇيىپ تىڭدايمىن. كەلەشەكتە قازاقستانعا بارىپ، ءوزىمىزدىڭ تۋىستارىمىزدى تانىپ، ونەرىن ۇيرەنگىم كەلەدى. بۇل كەشتەن العان اسەرىم وتە كەرەمەت بولدى. بۇل ورتادان كەتكىم كەلمەي قيماي تۇرمىن. وتە جاقسى اندەر ايتىلدى، تارتىمدى كەش بولدى.

 جارقىن سالەنۇلى

سۋرەتتەردى تۇسىرگەن: سامات ساپاتاي

انكارا، تۇركيا

 www.ulas.kz