جۇما, 6 جەلتوقسان 2019
قوعام 5311 0 پىكىر 31 شىلدە, 2014 ساعات 14:50

ادىلەتسىز شەشىمنىڭ ارجاعىندا ساياسي تاپسىرما بار سياقتى

 

«اڭىز ادام» جۋرنالىنىڭ ءساۋىر ايىنداعى ادولف گيتلەرگە ارنالعان سانىنان باستالعان داۋدىڭ سوڭى سوت ىسىنە جالعاسىپ، باسىلىمنىڭ باس رەداكتورىنىڭ ۇستىنەن ءۇش بىردەي ءىس قوزعالعان ەدى. سوڭعى سوت وتىرىسى 30 شىلدە كۇنى اياق استىنان ءوتىپ، سۋديا سوت شەشىمىن جاريا ەتتى.

الايدا، «جۇلدىزدار وتباسى»، «اڭىز ادام» جۋرنالدارىنىڭ قۇرىلتايشىسى ءارى باس رەداكتورى جارىلقاپ قالىباي abai.kz كە بەرگەن سۇحباتىندا سوت شەشىمىمەن كەلىسپەيتىنىن ءارى بۇل ءىستىڭ ساياسي استارى بار ەكەنىن ايتادى.  

جارىلقاپ قالىباي (سۋرەتتە), «جۇلدىزدار وتباسى»، «اڭىز ادام» جۋرنالدارىنىڭ قۇرىلتايشىسى ءارى باس رەداكتورى:

- مەن سوت شەشىمىمەن كەلىسپەيمىن. قازىر «اڭىز ادام» جۋرنالىنىڭ 100-ءنشى سانى دايىندالىپ جاتىر. جۋرنالدىڭ وسى ءجۇز سانىندا دا سوت ءبىزدى ايىپتى دەپ تاپقان اكىمشىلىك قۇقىق بۇزۋشىلىق كودەكسىنىڭ 334 بابى 2 تارماعىن بۇزاتىن ءبىر سويلەم دە جوق.

سوت شەشىمى قورتىندىسىنىڭ ءوزى قاراما-قايشىلىققا تولى. مىسالى، قورتىندىنىڭ ءبىرىنشى بولىمىندە ناعاشىباي ەسمىرزاەۆتىڭ «گيتلەر فاشيست ەمەس» دەگەن ماقالاسىندا ەكسترەميزمءدى اقتاۋ بەلگىلەرى بار دەيدى دە، ەكىنشى بولىمىندە رەداكتسيادان قويىلعان سۇراقتارعا ناعاشىباي ەسمىرزاەۆتىڭ «گيتلەر فاشيست ەمەس» جانە مىرزاعالي حاسەننىڭ «ماين كامپفتا كوپ نارسە دۇرىس جازىلعان»  تاقىرىبىمەن بەرىلگەن جاۋابىندا ەكسترەميزمدى اقتاۋ بەلگىلەرى بولۋى مۇمكىن دەيدى. مىنەكەي، ءبىرىنشى بولىمدە «بار» دەسە، ەكىنشىسىندە «مۇمكىن» دەيدى. جانە سوت ساۋالناما مەن ماقالانىڭ نە ەكەنىن اجىراتپاعان. بىرەسە «ماقالا» دەيدى، ەندى بىردە «رەداكتسيادان قويىلعان سۇراقتار» دەيدى. ياعني، ساراپتاما دۇرىس جاسالماعان. ساراپتامانى قايتا جاساتۋدى تالاپ ەتىپ ەدىك، ولار بۇدان باس تارتتى. سوتتىڭ ەكىۇشتى ءدۇدامال ساراپتاماعا سۇيەنىپ، جۋرنالدى سوتتاۋى – زاڭسىز.

ەكىنشى دۇنيەجۇزىلىك سوعىس جانە گيتلەرگە ارنالعان جۋرنالدىڭ سانى 52 بەتتەن تۇرادى. ال، سوت جۋرنالدىڭ ءبىر بەتىن عانا الىپ، بىزگە ۇكىم شىعارىپ وتىر.

بىزدە ادىلدىك جوق، ءادىل سوت جوق. بىزدەگى سوت مەملەكەتتىك ماشينانىڭ ءبىر تەتىگى.

سۋرەتتە: سۋديا اسەت بورانباەۆ. azattyq.org

سوتتىڭ جازبا قورتىندىسى قولىما تيگەن سوڭ، قالالىق سوتقا شاعىمدانامىن. قالالىق سوتتىڭ قانداي شەشىم شىعاراتىنىن بىلمەيمىن، بىراق، وسىعان دەيىن وتكەن ءۇش سوتتا دا مەنى ايىپتى دەپ ادىلەتسىز شەشىم شىعارعاندارىنا قاراعاندا، جوعارىدان ءبىر نۇسقاۋ بار سياقتى: ول – ساياسي تاپسىرما شاماسى.

جوعارى جاقتا وتىرعان ءبىر جىگىت كەزىندە مەنىمەن ارىپتەس بولعان. ەكەۋمىز دە وقىتۋشى بولدىق. ارالاسىپ جۇردىك. قازىر ول وتە ۇلكەن قىزمەتتە. سول جىگىت «جۇلدىزدار وتباسى»، «اڭىز ادام» جۋرنالدارى دۇرىلدەپ تۇرعان كەزدە، وسىدان ەكى جىل بۇرىن ماعان كەلىپ، ۇسىنىس ايتتى: «جاكە، ەكى جۋرنالدى مەنىمەن ءبولىس. مەنى قۇرىلتايشىنىڭ ءبىرى ەتىپ قوس» دەدى. بۇل ۇسىنىستان مەن باس تارتتىم. ول توعىز ايدان كەلىپ، تاعى ايتتى. مەن جانە باس تارتتىم. سودان كەيىن ول ماعان جاۋىعىپ كەتتى. ءدال وسى سەكىلدى جوعارعى بيلىكتە ءباسپاسوز سالاسىنا باس-كوز بولىپ وتىرعان ادامدار قوسىمشا ارەكەت جاساپ جاتقانعا ۇقسايدى. ارينە، قولىمدا دالەل-دايەك جوق، بىراق، ءىستىڭ قيسىنى سوعان سايادى. كۇدىگىم بار.

 مىنە، وسىنداي نارسەلەر تۇرعان كەزدە ادىلدىككە جەتۋىم قيىن. بىراق مەن تالماي كۇرەسە بەرەمىن.

Abai.kz

0 پىكىر