جۇما, 29 ناۋرىز 2024
ءجون-اق 4542 0 پىكىر 31 ناۋرىز, 2014 ساعات 09:24

كادرمەن قامتىماي – قاجەتتى ناتيجەگە جەتۋ قيىن

-  اۋىلشارۋاشىلىعىن دامىتۋدىڭ نەگىزگى امالدارىنىڭ ءبىرى – وعان مامان كادرلاردى تۇراقتاندىرۋ، -  دەيدى ءماجىلىس دەپۋتاتى تالعات ەرعاليەۆ.

-  قازىرگى اۋىلشارۋاشىلىعى قۇرىلىمدارىنىڭ كوبى، اسا ۇلكەن بولماعاندىقتان، وزدىگىنەن مامان تارتۋدىڭ شىعىنان كوتەرە المايدى. ماسەلەن، بۇرىنعى كەڭشاردىڭ ورنىندا جۇمىس ىستەيتىن 5-6 فەرمەردىڭ ارقايسىسى ءبىر-ءبىر اگرونوم، ينجەنەر، ەكونوميست، زووتەحنيك ۇستاۋعا قاۋقارسىز. ءتىپتى، قۋاتتى دەگەن فەرمەرلەردىڭ ءوزى مۇنداي مامانداردى ماۋسىمدىق ۋاقىتقا عانا ۇستاپ، قىستىڭ 4-5 ايىندا «اقىسىز دەمالىسقا» جىبەرەدى. بۇل فەرمەرگە جاقسى بولعانىمەن ماماننىڭ ءوزى مەن بالا-شاعاسىنا قيىن... ويتكەنى، ول وسى ۋاقىتتا تاماق ىشپەي وتىرا المايدى عوي.  

بۇرىنعى كەڭشاردىڭ ورنىنداعى اكىمشىلىك-تەرريتوريالىق بولىنىستە قازىر اۋىلدىق وكرۋگتەر وتىر. ولاردىڭ شتاتىندا تەك ۆەتتەحنيك ۇستاۋ عانا كوزدەلگەن. باسقا مامانداردىڭ شىعىنى اۋىلدىق وكرۋگتىڭ شىعىندارىندا قاراستىرىلماعان. سوندىقتان... 5 مىڭ گەكتاردان ارتىق جەر وڭدەيتىن 4-5 (نەمەسە ودان دا كوپ) فەرمەرلەرى بار اۋىلدىق وكرۋگكە كەم دەگەندە ءبىر-ءبىر اگرونوم، ينجەنەر جانە ەكونوميست ۇستاۋ شىعىنى بيۋدجەتتە قاراستىرىلۋى كەرەك دەپ سانايمىن. سونداي-اق 5 مىڭنان ارتىق گەكتار جەر وڭدەيتىن جەكە، ءىرى شارۋاشىلىقتار وسى مامانداردى ءوز ەسەبىنەن جىل 12 اي ۇستاۋدى زاڭدى تۇردە مىندەتتەرىنە الۋلارى كەرەك. سونىمەن بىرگە 1 مىڭنان ارتىق مال وسىرەتىن اۋىلدىق وكرۋگتەردىڭ بيۋدجەتىندە ۆەتتەحنيكتەن باسقا ءبىر زووتەحنيكتىڭ شىعىنى دا قاراستىرىلعانى ءجون. ال وسىنشالىق مالدى جەكە شارۋاشىلىعىندا وسىرەتىن ءىرى فەرمەرلەر بۇل ماماننىڭ شىعىنىن ءوز ەسەبىنەن 12 اي بويى كوتەرۋى كەرەك. سونىمەن بىرگە سىرتتان كەلگەن مامانداردىڭ ءبارى دە تۇرعىن ۇيمەن قامتاماسىز ەتىلەتىنى زاڭمەن مىندەتتەلسىن.

بۇل ءىس – پرەزيدەنت تالاپ ەتكەن، اۋىلشارۋاشىلىعىن دامىتۋدىڭ عىلىمي جولىن قامتاماسىز ەتۋگە مۇمكىندىك بەرەدى. مامان بولماسا ەشقانداي عىلىمي جول اۋىلشارۋاشىلىعىنا كەلمەيدى. سونداي-اق، بۇل امال جىل سايىن وقۋ بىتىرەتىن جۇزدەگەن سالا ماماندارىنىڭ باسقا سەكتوردان جۇمىس ىزدەمەي، ءوز ماماندىعى بويىنشا كەپىلدى تۇردە جۇمىس تابۋىنا مۇمكىنشىلىك بەرەدى، - دەيدى ت.ەرعاليەۆ.

جوعارىداعى ۇسىنىستارىن جالعاستىرا كەلىپ، دەپۋتات تالعات ەرعاليەۆ اۋىل شارۋاشىلىعىنا بارعان مامانداردى ىنتالاندىرۋ جولدارىن دا ايتتى. سونىڭ ىشىندە، دەيدى ول، ەلىمىزدىڭ باق قۇرالدارى  سالا ماماندارىنىڭ الەۋمەتتىك ماڭىزىن ارتتىراتىن، بەدەلىن كوتەرەتىن مەملەكەتتىك ساياساتتىڭ تاپسىرماسىن جۇرگىزۋلەرى كەرەك. ناسيحاتسىز، يدەولوگيالىق قولداۋسىز سالاعا جاقسى مامانداردى تۇراقتاندىرۋ قيىن. اۋىلشارۋاشىلىعى ماماندارىنا باق كوبىرەك كوڭىل ءبولىپ، وزاتتارىن ءجيى كورسەتىپ وتىرسا، ادامنىڭ قۇلشىنىسى دا ارتادى. ولارعا مەملەكەتتىك ناگرادالار بەرۋ ءىسى دە نازاردان تىس قالماعانى ءجون. سونداي-اق، اۋىلشارۋاشىلىعىنا بارعان ماماندارعا كەزەكتەن تىس قىزمەت كورسەتۋ سياقتى ىنتالاندىرۋ جۇيەسىن ەنگىزۋ قاجەت. مىسالى، مەديتسينالىق كومەك كورسەتۋدە اۋىل شارۋاشىلىعى مامانى اۋدان، وبلىستارداعى ەمحانالاردا كەزەكتەن تىس قابىلدانعانى ءجون. سونىمەن بىرگە ولاردىڭ بالالارىن جوو قابىلداۋدا جەڭىلدىكتەر بەرىلۋى كەرەك.

وسىنداي جەڭىلدىكتەرمەن قاتار مامانداردى اۋىلدا تۇراقتاندىرۋدىڭ تاعى ءبىر ءتاسىلى – ولاردىڭ قىزمەت باسپالداقتارىمەن وسۋىنە جاعداي جاساۋ. بۇرىن اۋىلشارۋاشىلىعى ماماندارى قىزمەتتەرىن جاقسى اتقارىپ، جاقسى ناتيجەلەرگە جەتسە، وزدەرىنىڭ قىزمەت باسپالداعىمەن وسەتىندىكتەرىنە، ءىرى مانساپقا قول جەتكىزەتىنىنە  سەنىمدى بولاتىن. كادر ساياساتى سونى كوزدەيتىن. ال قازىر ونداي مۇمكىندىك مۇلدە جوق. اۋدان اكىمدەرى مەن ونىڭ ورىنباسارلارى،  وبلىستىق مەكەمەلەردىڭ باسشى قىزمەتكەرلەرى، وبلىس اكىمدەرى مەن ورىنباسارلارى اۋىلشارۋاشىلىعى قىزمەتىنەن وسپەيدى. ولاردىڭ نەگىزى تەك بيزنەستىڭ وندىرىستىك ەمەس، كوممەرتسيالىق سالاسىنان نەمەسە قۇقىق قورعاۋ جاعىنان شىققاندار. سوندىقتان اۋىلشارۋاشىلىعى مامانى ءوزىنىڭ ەشقاشان كارەرا جاساي المايتىنىن بىلەدى. مىنە، وسى قايشىلىقتى دا جويىپ، اۋىلدىق اۋداندار مەن سالانىڭ وبلىستىق، ءتىپتى رەسپۋبليكالىق باسشىلىقتارىنا مىندەتتى تۇردە اۋىلدا مامان بولىپ ىستەگەن جانداردىڭ عانا كوتەرىلەتىنىنە كەپىلدىك بەرەتىن زاڭناما كەرەك. سوندا ماماننىڭ ىنتالانۋى ارتا تۇسەر ەدى. مىنە، ءبىز ۇكىمەتتىڭ قاراۋىنا وسى تارىزدەس ناقتى ۇسىنىستار دايىنداماقپىز، دەدى دەپۋتات ءسوزىنىڭ سوڭىندا.

جاقسىلىق قۋاندىق

Abai.kz

 

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1575
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2268
عيبىرات

قايسار رۋحتى عازيز جان

مۇحتار قۇل-مۇحاممەد 3577