جۇما, 13 جەلتوقسان 2019
الەۋمەت 8628 0 پىكىر 31 ناۋرىز, 2014 ساعات 14:46

الىپساتارلار تاعى دا ۇكىمەتتىڭ الدىن وراپ كەتتى

اقپاننىڭ 11-ءى كۇنى دوللار باعامىن كەزەكتى رەت كوتەرگەن قازاقستان ۇكىمەتى ءساۋىردىڭ 1-نەن باستاپ مۇعالىمدەر مەن دارىگەرلەردىڭ،ت.ب. جالاقسى 10 پايىزعا وسەدى دەپ ۋادە بەرگەن. بۇل تۋرالى ۇكىمەت ناۋرىزدىڭ 29-ى كۇنى ارنايى قاۋلى قابىلدادى. قاۋلىدا بىلاي دەلىنگەن:

 «ازاماتتىق قىزمەتشىلەرگە، مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە، قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» قازاقستان رەسپۋبليكاسى ۇكىمەتىنىڭ 2007 جىلعى 29 جەلتوقسانداعى № 1400 قاۋلىسىنا (قازاقستان رەسپۋبليكاسىنىڭ ءپۇاج-ى، 2007 ج.، № 51, 648-قۇجات) مىناداي تولىقتىرۋ ەنگىزىلسىن:

كورسەتىلگەن قاۋلىعا 19-قوسىمشا مىناداي مازمۇنداعى رەتتىك ءنومىرى 14-جولمەن تولىقتىرىلسىن:

«مەملەكەتتىك مەكەمەلەر مەن قازىنالىق كاسىپورىنداردىڭ قىزمەتكەرلەرىنە لج-دان 10% ەرەكشە ەڭبەك جاعدايلارى ءۇشىن ۇستەماقى ەنگىزىلسىن».

جوعارىداعى سىرەسكەن رەسمي تىلدەن وقىرمان وزىنە كەرەگىن ۇعا جاتار، ءبىزدىڭ ايتپاعىمىز: الىپساتارلار تاعى دا ۇكىمەتتىڭ الدىن وراپ كەتتى. ازاماتتىق قىزمەتشىلەر ءساۋىردىڭ سوڭىندا ايلىعىن الىپ بولعانشا، ولاردىڭ ەڭبەكاقىلارىنا قوسىلعان بىرەر مىڭ تەڭگەنىڭ قۇنى قارا باقىرعا تاتىمايتىن بولدى. بۇعان، ارينە، تاڭقالمايمىز. تاڭقالمايتىن سەبەبىمىز – تاڭقالۋدان كەتكەنبىز. ويتكەنى، ۇكىمەت جالاقىمەن «جارىلقاپ» ۇلگەرگەنشە، قارا بازاردىڭ نارقى قاعىنىپ شىعا كەلەدى. مىنە، تاعى دا سولاي بولدى. جەمىس-جيدەكتى شىمكەنتتە قىزناقتىڭ ءبىر كيلاسى 550 تەڭگەگە، الما 250 تەڭگەگە كوتەرىلگەن. وسكەمەندە نان مەن ءسۇت قىمباتتاعان. اقتوبە مەن اتىراۋدا دا بارلىق تۇتىنۋ تاۋارلارىنىڭ قۇنى وسكەن. دەۆالۆاتسيا تۇسىندا ۇكىمەت جاستار اراسىنان بەلسەندى كوميسسيا قۇرىپ تۇتىنۋ تاۋارلارىنىڭ باعاسىن باقپاققا ارەكەتتەنگەن. ءسويتىپ ازىق-تۇلىكتىڭ نارقىن سەبەپسىز ارتىراتىن ساۋدا ورىندارىن جاۋاپ تاستاۋعا دەيىن بارعان-دى. ۇكىمەت سول پارمەنىن تىم قۇرىعاندا ءساۋىردىڭ سوڭىنا دەيىن ساقتاي المادى. بۇنىڭ اتىن جاۋاپسىزدىق دەيمىز. ال، جاۋاپسىزدىقتىڭ ايعاعى  تەڭگەنىڭ ەمەس، جالپى حالىقتىڭ قۇنسىزدانۋى بولىپ شىقتى. ەندى  نە بولادى؟ نە بولۋشى ەدى؟ ءبارى قىمباتتايدى. «قارىنىنىڭ اشقانىنا ەمەس، قادىرىنىڭ قاشقانىنا» ۇيرەنگەن حالىق بارىنە كونە بەرەدى.

ءبىر دوللار جانە ءبىز. ءبىزدىڭ الەۋمەتتىك احۋالىمىزدى وسى تەڭدەۋدىڭ ارالىعىندا ساراپتاۋعا بولاتىن سياقتى. اۋەلى ءبىر دوللار 4 تەڭگە بولدى (1993 جىلى، 15 قاراشا).  سودان سەكىرە-سەكىرە 80 تەڭگەگە جەتتى دە 1999 جىلى ءساۋىر ايىندا 138 تەڭگە مەن 140 تەڭگەنىڭ اراسىنان تۇراق تەپتى. 2009 جىلى 4 اقپاندا 150 تەڭگەنى ەڭسەردى. ەندى، مىنە 180 تەڭگە. دوللاردىڭ باعامى مۇنىمەن شەكتەلمەسى انىق. سوندا، ۇكىمەت پەن الىپساتارلاردان الدانىپ قالا بەرەتىن حالىقتىڭ تاعدىرى  اياقاستى بولا بەرمەك پە؟

Abai.kz

0 پىكىر