جۇما, 29 ناۋرىز 2024
قوعام 17990 1 پىكىر 19 ءساۋىر, 2014 ساعات 17:45

«اڭىز ادام» جۋرنالىن قارالاۋشىلاردىڭ نازارىنا!

«اڭىز ادام» جۋرنالىنا «جاپتىم جالا، جاقتىم كۇيە» دەپ قارالاۋشىلاردىڭ نازارىنا!

«ادولف گيتلەردىڭ ءومىربايانى مەن قىزمەتىن جازدىڭ» دەپ جازعىرىپ، ماسەلەنىڭ بايىبىنا بارماي تۇرىپ بايبالام سالعان، ءبىزدى قازاقستان رەسپۋبليكاسى بايلانىس جانە اقپارات اگەنتتىگىنە ايداپ سالىپ، سىرتىمىزدان ۇكىم شىعارتۋعا دەيىن الىپ بارعان داۋدىڭ باسىندا تۇرعان كىم دەڭىزشى؟ رەسەي جۋرناليستەرى! ناقتىراق ايتساق، رەسەيلىك REGNUM «نوۆوستي» اقپاراتتىق اگەنتىگىنىڭ اتى بەلگىسىز اۆتورى. ولار بىرىنشىدەن، «بۇل جۋرنال گيتلەردىڭ 125 جىلدىعىنىڭ قۇرمەتىنە باسىلدى» دەيدى. جۋرنالدا ونىڭ 125-كە تولعانى تۋرالى ءبىر اۋىز ءسوز جوق، ول، ءتىپتى، ءبىزدىڭ ويىمىزعا دا كەلمەپتى. بۇل – ءبىر. ەكىنشىدەن، «فاشيستىك يدەولوگيانى اقتاۋعا ارنالعان» دەيدى. ال، ءبىز بولساق، جۋرنالدىڭ العى سوزىندە باس رەداكتورىمىز جارىلقاپ قالىبايدىڭ ء«بىز نە ءۇشىن ادولف گيتلەردى جازىپ وتىرمىز؟» دەگەن ماقالاسىندا بۇل سۇراققا تولىق جاۋاپ بەرىپ وتىرمىز: «ونىڭ ەكى سەبەبى بار: ءبىرىنشىسى – مەملەكەت باسىنا، عايىپتان تايىپ ا.گيتلەر سەكىلدى ءبىر ادام كەزدەيسوق كەلىپ قالعان جاعدايدا، وعان ەرگەن بۇكىل حالىقتىڭ ورعا جىعىلاتىنىن كورسەتۋ ءۇشىن!.. ماسەلەن، ءبىر عانا تاريحي تۇلعا دۇنيەنىڭ استاڭ-كەستەڭىن شىعارىپ، توڭكەرىپ جىبەرە جازدادى. بۇكىل الەمنىڭ 72 مەملەكەتى قاتىسقان ادامزات تاريحىنىڭ ەڭ سۇراپىل سوعىسىندا 60 ملن.-عا جۋىق ادام قازا تاۋىپ، 110 ملن.-نان استام ادام جاراقات الدى. وسىلايشا ادولف گيتلەر – ەكىنشى دۇنيەجۇزىلىك سوعىستىڭ ەڭ باستى قىلمىسكەرى بولىپ تابىلادى. ال وعان ەرگەن نەمىس حالقى گيتلەردىڭ ۇلتشىلدىق-فاشيستىك يدەياسىنىڭ قۇرباندىعىنا اينالا جازدادى.

ەكىنشىسى – ۇلتشىلدىق-شوۆينيستىك يدەيانى قايتا جالاۋلاتىپ كەلە جاتقان قۇدايى كورشىمىز – رەسەي يمپەرياسىنىڭ قازىرگى بيلىگىنىڭ اسا قاۋىپتى ساياساتىنان قورعانۋ ماقساتىندا جازىپ وتىرمىز!».

«گيتلەر مەن ءپۋتيننىڭ ءىس-ارەكەتتەرىندە ۇقساستىق بار ما؟» دەگەن ساۋالىمىزعا بەلگىلى تاريح عىلىمدارىنىڭ دوكتورلارى – سايىن بورباسوۆ پەن زاردىحان قيناياتۇلى جانە ساياساتتانۋشى-عالىم راسۋل جۇمالى رەسەيگە ءپۋتيننىڭ باسشى بولىپ كەلۋىمەن بىرگە، سكينحەدتەردىڭ، نەوفاشيستىك قوزعالىستاردىڭ پايدا بولعانىن، گيتلەر چەحيانىڭ سۋدەت قالاسىن قولدان ۇيىمداستىرىلعان رەفەرەندۋممەن قوسىپ السا، ءپۋتيننىڭ قىرىمدى وسىعان ۇقساس ءادىس-تاسىلمەن رەسەيگە قوسقانىن، سوندىقتان مۇنداي يدەولوگياعا دەر كەزىندە تويتارىس بەرىپ، ادامزات بالاسى فاشيزمنەن ساباق الۋ كەرەگىن تىلگە تيەك ەتتى.

بىراق، جۋرنال رەداكتسياسىنىڭ نەگىزگى ۇستانىمىن كوپە-كورنەۋ كورگىسى كەلمەگەن رەسەي اگەنتتىگىنىڭ ءجۋرناليسى جۋرنالدىڭ مازمۇنىن ودان ءارى قاراي قارا كۇيەمەن بوياي تۇسەدى. ماسەلەن، قوعام قايراتكەرى ناعاشىباي ەسمىرزانىڭ جۋرنال رەداكتسياسىنىڭ «گيتلەر قانداي تۇلعا؟» دەگەن سۇراعىنا بەرگەن جەكە پىكىرىن، ۇيالماي-قىزارماي بۇل جۋرنال ءجۋرناليسىنىڭ «گيتلەر – فاشيست ەمەس» دەپ جاقتاعان ماقالاسى رەتىندە كورسەتسە، ەكىنشى جەردە – گيتلەردىڭ ەڭبەگىن «ماين كامپف» قانداي كىتاپ؟» دەپ جازعان دەپ ايىپتايدى. بىراق، ءوز پايداسى ءۇشىن «ماين كامپفتىڭ» قانداي كىتاپ ەكەنىن اناۋ-مىناۋ ەمەس، ءفاشيمزنىڭ ەڭ باستى جاۋى ۋينستون چەرچيللدىڭ سول ءۇشىن نوبەل سىيلىعىن العان «ەكىنشى دۇنيەجۇزىلىك سوعىس» كىتابىنان الىنعان ءۇزىندى ەكەنىن ادەيىگە بايقاماي قالادى. ال، ناعاشىبايدىڭ پىكىرى تۋرالى ايتار بولساق، «جۋرنال جاريالانىمدارىنداعى اۆتور پىكىرى رەداكتسيانىڭ تۇپكىلىكتى كوزقاراسى بولىپ ەسەپتەلمەيتىنى» بەسەنەدەن بەلگىلى.   

كەيبىرەۋلەر «اڭىز ادام» جۋرنالى نەگە تەك ۇلى ادامداردى عانا جازبايدى؟» دەپ ايىپتايدى. ءبىز ولارعا بىرنەشە رەت قايتالاپ ايتامىز: «اڭىز ادام» دەگەن ءسوز – ۇلى ادام دەگەن ءسوزدىڭ بالاماسى ەمەس، بۇل مەدياجوبا ەلدىڭ اۋزىندا ەڭ كوپ ءسوز بولىپ جۇرگەن تاريحي تۇلعا تۋرالى باسىلىم. جانە ەڭ باستىسى، ءبىرىنشى بەتكە جەكە تۇلعانىڭ سۋرەتى جاريالانعانىمەن، ءبىز ارقاشان دا جەكە تۇلعا ءومىر سۇرگەن تاريحي كەزەڭنىڭ اقيقاتىن اشۋعا باسا كوڭىل بولەمىز. ءبىرىنشى بەتتى مۇقيات وقىعان ادام بايقاماۋى مۇمكىن ەمەس! وندا «ەكىنشى دۇنيەجۇزىلىك سوعىستىڭ تاريحى» دەپ جازىلعان، ال گيتلەردىڭ سۋرەتىنىڭ جوعارعى جاعىنا «ادامزات قاسىرەتى» دەگەن بەلگى قويىلعان.

الايدا، رەسەي اگەنتتىگىنىڭ باستى ماقساتى – ۆلاديمير ءپۋتيندى ادولف گيتلەرمەن سالىستىرعان قازاق جۋرنالىن جاپتىرۋ، ال ونىڭ «سكات» كومپانياسىنىڭ ۇشاعىندا قازاق تىلىندە قىزمەت كورسەتۋدى تالاپ ەتكەن «ۇلتشىل» باس رەداكتورىن جازاعا تارتقىزۋ. سول ءۇشىن دە «اراب ەلدەرىنىڭ مامانى بولىپ تابىلاتىن» (اگەنتتىكتىڭ جازۋى بويىنشا) راسۋل جۇمالىنىڭ ءوز سۇحباتىندا ۆلاديمير ءپۋتيندى ادولف گيتلەرمەن سالىستىرعان جەرىنە ەرەكشە شۇيلىگەدى. راسۋل جۇمالىنىڭ قازاقستانداعى بەلگىلى ساياساتتانۋشى عالىم، قوعام قايراتكەرى ەكەنىن ادەيى اۋىزعا المايدى.

ەڭ باستىسى، قازاقستاننىڭ «قۇقىق قورعاۋ جانە باقىلاۋ ورگاندارى نەگە مۇنى ەلەمەي وتىر؟» دەپ قر بايلانىس جانە اقپارات اگەنتتىگى مەن باسقالارىن جۋرنال رەداكتسياسىنا قاراي ايداقتايدى. ء«بىز بۇل وقيعانىڭ دامۋىن مۇقيات قاداعالايتىن بولامىز» دەپ سەس كورسەتىپ قويادى. بۇعان كەيىننەن Rosbalt.ru سايتى قوسىلدى.

اتالمىش رەسەي اقپاراتتىق اگەنتتىگىنىڭ ءوز ۇلتتىق مۇددەسىن قورعاپ جازعان «جاپتىم جالا، جاقتىم كۇيە» ماقالاسىن جەردەن جەتى قويان تاپقانداي قۋانا-قۋانا قايتا باسقان Nur.kz سايتى قاي ەلدىڭ مۇددەسىن قورعاپ وتىر؟ ونى ودان ارى قولداي كەتكەن Tengrinews.kz, Today.kz, Zakon.kz سايتتارى مەن ءورىستىلدى تەلەارنالار قاي ەلدىڭ مۇددەسىنە جۇمىس ىستەپ وتىر؟ ماسەلەن، رەسەي ماتەريالىن ءبىرىنشى بولىپ باسقان Nur.kz پورتالىنىڭ قۇرۋشىسى ءارى باس ديرەكتورى ۆاسيلي ۋليانوۆ نوۆوسىبىردە ءبىلىم العاندىقتان رەسەيگە بۇيرەگى بۇرىپ وتىرعان بولار. ال، باسقالارعا نە جوق دەسەيشى؟

اسىرەسە، فەيسبۋك سياقتى الەۋمەتتىك جەلىلەردەگى كوپتىڭ دۇرمەگىنە ەرىپ، جۋرنالدى وقىماي، كورمەي تۇرىپ، رەسەي اگەنتتىگى مەن رەسەيگە بۇيرەگى بۇرعان قازاقستاندىق ءورىستىلدى سايتتاردىڭ جازعان ەشقانداي نەگىزسىز، دايەكسىز جالاسىنا سەنىپ،

«كوپ ايتسا كوندى،
جۇرت ايتسا بولدى –
ادەتى نادان ادامنىڭ» (اباي) دەگەن پسيحولوگيا بويىنشا «اڭىز ادام» جۋرنالى مەن ونىڭ باس رەداكتورى جارىلقاپ قالىبايدى جەردەن الىپ، جەرگە سالۋىنا جول بولسىن. ايتسە دە، جۋرنالدى وقىعاندار دا از ەمەس. ولار ماسەلەنىڭ بايىبىنا بارماي تۇرىپ، بايبالام سالۋشىلارعا ءتيىستى تويتارىس بەرۋدە.

قىسقاسى، بۇل قازاقستان مەن رەسەي ازاماتتارىنىڭ اراسىنداعى اقپاراتتىق سوعىستىڭ ءبىر كورىنىسى. وكىنىشكە وراي، ءبىزدىڭ بيلىك 23 جىلدان بەرى تاۋەلسىزدىگىمىزدىڭ ەڭ باستى تۇتقاسى بولىپ تابىلاتىن – اقپاراتتىق قاۋىپسىزدىگىمىزدى قامتاماسىز ەتە المادى. سوندىقتان دا، كورشى ەلدىڭ اقپاراتتىق «اسكەرى» بىزگە نە جازىپ، نە قويۋىمىزدى جانە قالاي جازۋ كەرەك ەكەنىمىزدى باسقارىپ، كەرەك بولسا، جوعارىدان بۇيىرىپ وتىر. بىراق، ول ارىپتەستەر ءدال وسى ادولف گيتلەردىڭ «ماين كامپف» كىتابىنىڭ 1992 جىلى رەسەيدە جاريالانعانىن (گيتلەر ا. مويا بوربا. موسكۆا، يزداتەلستۆو ت-وكو، 1992 گود), ەلەكتروندى نۇسقاسىنىڭ رەسەي سايتتارىندا كۇندە ءىلىنىپ تۇراتىنىن http://www.911-truth.net/Adolf_Hitler_Mein_Kampf_Russian_translation.pdf, بۇدان باسقا دا ا.گيتلەر تۋرالى جۇزدەگەن رەسەيلىك باسىلىمداردىڭ جاريالانعانىن جانە ۆلاديمير پۋتين بيلىككە كەلگەن ۋاقىتتان باستاپ سكينحەدتەر دەپ اتالاتىن نەوفاشيستىك  ۇيىمدار مەن قوزعالىستاردىڭ قاپتاپ كەتكەنىن، ولاردىڭ ءار كۇنى تۇندە سلاۆيان ەمەس حالىقتاردىڭ وكىلىن ۇرىپ-سوعىپ، ەشكىم كورمەگەن جەردە ءولتىرىپ جاتقانىن تۇك بولماعانداي بايقاماعانسيدى. ال، ادولف گيتلەردىڭ ءدال وسىنداي ۇلتشىلدىق-فاشيستىك يدەياسىنا ەرگەن حالىقتىڭ ادامزات بالاسىنا قانداي قاسىرەت اكەلگەنىن اشىپ كورسەتپەك بولعان قازاقتىڭ «اڭىز ادام» سياقتى جۋرنالى مەن ونىڭ «ۇلتشىل» باس رەداكتورىن ءپۋتيندى – گيتلەرگە، ورىس سكينحەدتەرىن – نەوفاشيستەرگە تەڭەپ كورسەتكەنى ءۇشىن جازاعا تارتقىزعىسى كەلەدى. جانە ولارعا رەسەي ءباسپاسوزىن وقىپ، تەلەارناسىن كورۋ ارقىلى قوعامدىق پىكىر قالىپتاستىرىپ وتىرعان كەيبىر جەرگىلىكتى ءورىستىلدى جۋرناليستەر  مەن قازاقستاندىقتار ء«ايت، باس» دەسە قوسا قابادى.

ۇزىن ءسوزدىڭ قىسقاسى، قۇرمەتتى وقىرمان قاۋىم، ەڭ الدىمەن جۋرنالىمىزدى تولىقتاي وقىپ شىعىپ – سوتتاساڭىزدار دا، جاقتاساڭىزدار دا سودان كەيىن بارىپ – ءادىل پىكىر  بىلدىرىڭىزدەرشى. 

قۇرمەتپەن،

جارىلقاپ قالىباي جانە «اڭىز ادام» جۋرنالىنىڭ ۇجىمى   

Abai.kz

1 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1579
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2280
عيبىرات

قايسار رۋحتى عازيز جان

مۇحتار قۇل-مۇحاممەد 3606