بۇل تۋرالى «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ القا وتىرىسىندا ايتتى. 

پارتيا توراعاسى ءبىرىنشى ورىنباسارىنىڭ ايتۋىنشا، ورتالىقتا، سونداي-اق وڭىرلەردە سىبايلاس جەمقورلىققا قارسى جۇمىس جۇرگىزۋشىلەرگە قويىلاتىن تالاپتار بار. ولار  وبەكتيۆتى، ءپرينتسيپشىل جانە جاۋاپتى بولۋى ءتيىس. سوندىقتان قازىرگى كەزدە پارتيا تاراپىنان سىبايلاس جەمقورلىققا قارسى ءىس-قيمىل جونىندەگى كەڭەستەرگە كادرلاردى تاڭداۋدىڭ ءتيىمدى جۇيەسى قۇرىلۋدا. سونداي وزىق تەحنولوگيانىڭ ءبىرى رەتىندە باۋىرجان بايبەك پارتياىشىلىك پرايمەريز وتكىزۋدى اتادى. بۇل ءتاسىل تەك پارتيا جانىنداعى ءتۇرلى كەڭەستەرگە عانا ەمەس، پارتيا اتىنان الداعى سايلاۋلارعا ۇسىنىلاتىن ادال، ىسكەر، ەل سەنەتىن تۇلعالاردى دا ىرىكتەۋگە ءوز سەپتىگىن تيگىزبەك.  

- بارىنشا بەدەلدى، بەلسەندى جانە جارقىن تۇلعالاردى انىقتاۋ ءۇشىن، ءبىز وسى جىلى پارتيانىڭ باسقالارمەن قاتار سىبايلاس جەمقورلىققا قارسى ءىس-قيمىل بويىنشا وزەكتى ەلەكتوراتىن قۇرايتىن كانديداتتاردى تاڭداۋ بويىنشا پارتياىشىلىك پرايمەريز وتكىزەتىن بولامىز, - دەدى باۋىرجان بايبەك. 

«Nur Otan» پارتياسى تاراپىنان حالىقپەن كەرى بايلانىس ارنالارىن ورناتۋعا ەرەكشە نازار اۋدارىلعان. بۇگىنگى كۇنى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق جانە ايماقتىق كەڭەستەردىڭ بارلىق باسشىلارى ءوز اككاۋنتتارىن اشىپ، الەۋمەتتىك جەلىلەردە بەلسەندى جۇمىس جۇرگىزۋدە. 

وسى ماقساتتا كەڭەستەردىڭ پارتيانىڭ قوعامدىق قابىلداۋ بولمەلەرىمەن ءوزارا قارىم-قاتىناسى ۇيىمداستىرىلعان، سىبايلاس جەمقورلىق ماسەلەلەرى بويىنشا جەكە «جەدەل جەلى» اشىلىپ، ازاماتتاردىڭ شاعىمدارىنا ارەكەت ەتۋدىڭ ناقتى الگوريتمى جاسالعان. جەدەل جەلى ارقىلى بارلىق ارىز-شاعىمدار كەيىننەن وزەكتى سىبايلاس جەمقورلىق تاۋەكەلدەرىن، ونىڭ ىشىندە مەملەكەتتىك ورگانداردىڭ جۇمىسىنداعى تاۋەكەلدەردى تالداۋ ءۇشىن تىركەلەدى. 

Abai.kz