«تاڭەرتەڭ ءتورت ادام اۋرۋحاناعا جەتكىزىلدى. الماتىدا ەكى ادام ۇيىنە قايتتى. قازىر عانا الماتىدا ءبىر ادامنىڭ اۋرۋحاناعا جاتقىزىلعانى جايلى حابار جەتتى. اقمولا وبلىسىندا دا ءبىر وتباسى اۋرۋحاناعا جەتكىزىلدى. ولار دا قىتايدا بولعان. بارلىعى جەدەل رەسپيراتورلىق ۆيرۋستىق ينفەكتسيا كۇدىگىمەن اۋرۋحاناعا ءتۇستى» دەدى بەكشين.

ونىڭ سوزىنشە، اقمولا وبلىسىندا اۋرۋحاناعا جاتقىزىلعان وتباسىنىڭ ەكى بالاسىنىڭ قىزۋى كوتەرىلگەن. «ەرەسەكتەرىندە جاعدايى جاقسى. بىراق ولار بالالارمەن بىرگە بولعاندىقتان اۋرۋحاناعا جاتقىزىلدى» دەدى بەكشين.

قازاقستان ۇكىمەتى قىتاي ازاماتتارىنا بەرىلەتىن 72 ساعاتتىق ترانزيت ۆيزاسىن ۋاقىتشا توقتاتتى. بۇدان بولەك، قىتاي ازاماتتارىنا اۋەجايدا ەلەكتروندى ۆيزا ازىرلەۋ پروتسەسى دە ۋاقىتشا دوعارىلدى. ال قىتاي ازاماتتارى قازاقستانعا ەلشىلىك يا كونسۋلدىق ارقىلى ۆيزا ازىرلەگىسى كەلسە دەنساۋلىق جاعدايى جايلى انىقتاما وتكىزۋى ءتيىس.

قازاقستان قىتايدا تاراعان كوروناۆيرۋسقا بايلانىستى وسى ەلدىڭ ازاماتتارىنا ۆيزا بەرۋدى شەكتەدى. بۇل تۋرالى قازاقستان سىرتقى ىستەر ءمينيسترىنىڭ ورىنباسارى شۋحرات نۇرىشەۆ حابارلادى.

نۇرىشەۆتىڭ سوزىنشە، نۇر-سۇلتان پەكيننەن ۆيرۋس وشاعى ۋحانداعى قازاقستاندىق 98 ستۋدەنتتى الىپ شىعۋعا رۇقسات سۇراعان. ۆيتسە-مينيستر قازاقستان قىتايدا جۇرگەن ازاماتتارىنىڭ ەلگە كەلۋىنە كەدەرگى كەلتىرمەس ءۇشىن شەكارانى جاپپايتىنىن ايتادى.

قىتايدا كوروناۆيرۋس جۇقپالى اۋرۋىنان ولگەندەر سانى سوڭعى دەرەكتەر بويىنشا 106 ادامعا جەتىپ، 1291 ادامنىڭ جۇقتىرعانى انىقتالدى. الەم ەلدەرىنىڭ ءبىرازى حالقىن قىتايعا بارۋدان تارتىنا تۇرۋعا شاقىرىپ جاتىر.

كوروناۆيرۋستى جۇقتىرعان ادامدار گەرمانيا، شري-لانكا،مالايزيا، وڭتۇستىك كورەيا، تايۆان، تايلاند، كانادا، نەپال، ۆەتنام، ساۋد ارابياسى، سينگاپۋر، جاپونيا، اقش، فرانتسيا، اۆستراليادا كەزىككەن.

Abai.kz