جۇما, 29 ناۋرىز 2024
ۇلتتىق كەڭەس قورىتىندىسى 5628 13 پىكىر 20 جەلتوقسان, 2019 ساعات 13:57

ءتىل رەفورماسى. پارلامەنتتىك وپپوزيتسيا. ميتينگتەر. سالىق پەن جەر ماسەلەلەرى...

بۇگىن نۇر-سۇلتان قالاسىندا قر پرەزيدەنتى جانىنان قۇرىلعان ۇلتتىق قوعامدىق سەنىم كەڭەسىنىڭ ەكىنشى وتىرىسى ءوتتى. بۇل جيىن - قوعامدىق ماڭىزعا يە وزەكتى ماسەلەلەر مەن وسىعان دەيىن ايتىلعان پىكىرلەر، ۇسىنىستار مەن ۇكىمەتتىك دەڭگەيدە تالقىلانعان ماسەلەلەردىڭ قورتىندى جيىنى بولدى

جيىندا ءسوز العان مەملەكەت باسشىسى قاسىم-جومارت توقاەۆ قوعامدىق سەنىم كەڭەسىنىڭ ماڭىزىنا توقتالدى.

- ءبىز اتاپ ءوتۋى كەرەك، بىرقاتار تۇيتكىلدى ماسەلە بويىنشا ورتاق ۇستانىمعا كەلدىك. بۇل دەموكراتيانى نىعايتۋعا جانە قوعامنىڭ بيلىككە دەگەن سەنىمىن ارتتىرۋعا ۇلكەن سەرپىن بەرەتىن جۇمىس دەپ سانايمىن.

ءبىزدىڭ تاجىريبەمىز حالىقارالىق ۇيىمدار تاراپىنان جوعارى باعالانىپ وتىر. كوپشىلىك ونى جاۋاپتى ءارى سىندارلى ديالوگتىڭ ۇلگىسى رەتىندە قابىلدادى. ەڭ باستىسى ۇلتتىق كەڭەس قوعامنىڭ سەنىمىن اقتاي الاتىنىن دالەلدى.

مۇنىڭ تاعى ءبىر ماڭىزدى قىرى بار. ءبىز سىندارلى ديالوگ ارقىلى جاڭا ساياسي مادەنيەتتىڭ نەگىزىن قالىپتاستىرىپ جاتىرمىز. سونىڭ ارقاسىندا سانالۋان پىكىرلەر مەن بالاما كوزقاراستار، سىندارلى ۇستانىم، جاۋاپكەرشىلىك سياقتى قۇندىلىقتار الدىڭعى قاتارعا شىعادى، - دەدى قازاقستان پرەزيدەنتى.

بوس جاتقان جەرلەرگە سالىناتىن سالىق 20 ەسە ءوسۋى مۇمكىن

بوس جاتقان جەرلەرگە، ياعني پايدالانىلماي جاتقان جەرلەرگە سالىناتىن سالىق 20 ەسە ءوسۋى مۇمكىن.

پرەزيدەنت سەنىم كەڭەسىنىڭ وتىرىسىندا جەر ماسەلەسىن تالقىلاپ، پايدالانىلماي جاتقان جەرلەرگە قاتىستى سالىق مولشەرىن ۇلعايتۋدى ۇسىنعان.

سونىمەن قاتار ول پايدالانىلماي جاتقان جەرلەرگە سوت تاركىلەۋ تەتىكتەرىن قاراستىرۋ كەرەكتىگىن تاپسىردى.

ۇلتتىق ۆاليۋتانىڭ تۇراقسىزدىعى تۋرالى...

سونىمەن قاتار پرەزيدەنت سىرتقى قارىزدىڭ بىرىڭعاي ءتىزىمىن جاساۋعا تاپسىرما بەردى.

- ءبىز ەلىمىزدىڭ سىرتقى كرەديتورلار الدىنداعى ارتىق قارىزى تۋرالى الدىن-الا بولجام جاساۋدى توقتاتۋىمىز كەرەك. 2020 جىلعى 1 ساۋىرگە دەيىن ۇلتتىق ەكونوميكا، قارجى مينيسترلىكتەرى مەن ۇلتتىق بانك ساندىق مالىمەتتەر بازاسى نەگىزىندە  سىرتقى قارىزدىڭ بىرىڭعاي ءتىزىمىن جاساۋى كەرەك، - دەدى مەملەكەت باسشىسى.

سونداي اق، ق.توقاەۆ ۇلتتىق بانك وكىلدەرىنە ۆاليۋتا ايىرباسىنا قاتىستى مالىمەتتەردى قولجەتىمدى ەتۋدى تاپسىردى.

- ۇلتتىق ۆاليۋتانىڭ تۇراقسىز، قۇبىلمالى بولۋى - ءبىزدىڭ ازاماتتاردى، كاسىپكەرلەرىمىزدى الاڭداتاتىن ماسەلە. وسىعان بايلانىستى مەنىڭ تاپسىرمام بويىنشا ۇلتتىق بانك وسى ماسەلەنى باقىلاۋعا الىپ، مەحانيزمىن ازىرلەيدى.

ۇلتتىق بانك 2020 جىلدىڭ 1 قاڭتارىنان باستاپ اي سايىن جانە توقسان سايىن ۆاليۋتا ايىرباسىنا قاتىستى ەسەپ بەرىپ وتىرادى. سونداي-اق، ۆاليۋتا باعامىنىڭ كەستەسى جاريالانادى. اقشا-نەسيە ساياساتىنىڭ ستراتەگياسى قابىلدانادى،- دەدى پرەزيدەنت.

ميتينگىلەردى ۇيىمداستىرۋ پرينتسيپتەرىن ەنگىزۋ قاجەت 

وتىرىس بارىسىندا پرەزيدەنت "بەيبىت جيىندار" تۋرالى زاڭ جوباسى جونىندە ايتتى. پرەزيدەنتتىڭ سوزىنشە، مەملەكەتكە ءوز پوزيتسياسىن كوپشىلىك الدىندا ايتاتىن ازاماتتارعا وڭ قارايتىن كەز كەلدى.

- ميتينگىلەردى ۇيىمداستىرۋ پرينتسيپتەرىن ەنگىزۋگە كىرىسۋ كەرەك. قوعامنىڭ سانا-سەزىمىنە ميتينگ مادەنيەتىن قالىپتاستىراتىن ۋاقىت كەلدى. قوعامعا دا، مەملەكەتكە دە ءوز پوزيتسياسىن كوپشىلىك الدىندا ايتاتىن ازاماتتارعا دۇرىس قارايتىن كەز كەلدى. بۇل شاراسىزدىق، مۇنىڭ بارلىعىن ءماجبۇرلى ەمەس، سانالى تۇردە ىستەۋ كەرەك. بىراق ميتينگىلەردىڭ قۇقىق قانا ەمەس، جاۋاپكەرشىلىك ەكەنىن دە ءتۇسىنۋ قاجەت, - دەدى توقاەۆ.

مەملەكەتتىك ءتىلدى رەفورمالاۋ قاجەت

مەملەكەت باسشىسى لاتىنعا كوشۋدە اسىعىستىققا جول بەرىلمەيتىنىن ايتتى. ال، وسى ۋاقىتقا دەيىن ۇسىنىلعان نۇسقالار جەتىلمەگەن دەيدى پرەزيدەنت. سوندىقتان، وسى سالاداعى مامانداردىڭ، لينگۆيست عالىمدار مەن فيلولوگتاردىڭ پىكىرىن كۇتىپ وتىرعانىن ايتتى.

- مەن لاتىنعا كوشۋ تۋرالى دا ايتقىم كەلەدى. ونىڭ ۇستىنە بۇل ماسەلە ۇلتتىق كەڭەستىڭ وتىرىسىندا كوتەرىلدى. بۇل ماسەلەدە اسىعىستىققا جول بەرىلمەيدى. جاڭا ءالىپبيدى ەنگىزۋدىڭ بارلىق اسپەكتىلەرىن مۇقيات تەكسەرۋ، جان-جاقتى تالداۋ جانە پىسىقتاۋ قاجەت.

ۇسىنىلعان نۇسقالار جەتىلمەگەن بولىپ شىقتى. سوندىقتان بۇل ماسەلەگە عىلىمي تۇرعىدان قاراۋ قاجەت. ونى جەڭىلدەتۋگە بولمايدى. ءبىز تەك كيريلليتسا ءالفاۆيتىن لاتىن الىپبيىنە كوشىرۋ تۋرالى ايتىپ وتىرعان جوقپىز. ەگەر ءتىلىمىزدى جاڭعىرتقىلارىڭىز كەلسە، بىزگە قازاق ءتىلىن رەفورمالاۋ قاجەت، - دەدى ق.توقاەۆ.

بىزگە پارلامەنتتىك وپپوزيتسيا ينستيتۋتى قاجەت

كەڭەس وتىرىسىندا قازاقستان پرەزيدەنتى ەلدە پارلامەنتتىك وپپوزيتسيا ينستيتۋتى قاجەت ەكەنىن ايتتى. ول ءۇشىن، ۇكىمەتكە ءتيىستى ۇسىنىستار مەن زاڭ جوباسىن ازىرلەپ، پارلامەنتكە ەنگىزۋدى تاپسىردى.

- بىزگە پارلامەنتتىك وپپوزيتسيا ينستيتۋتى قاجەت. ءبىز جاڭا قوعامدىق پاراديگمانىڭ باستى شارتى بالامالى كوزقاراستار مەن پىكىرلەر ەكەنىن ءتۇسىنۋىمىز كەرەك.

سوڭعى جىلدارى ءوز ۇستانىمدارىن اشىق ءبىلدىرىپ جۇرگەن بەلسەندى ازاماتتار بىرقاتار الەۋمەتتىك-ەكونوميكالىق ماسەلەنى شەشۋگە اتسالىستى.

ءبىز بالاما پىكىرلەر مەن قوعامدىق تالقىلاۋ توقىراۋدىڭ باسى ەمەس، دامۋدىڭ باستى تالاپتارىنىڭ ءبىرى ەكەنىنە كوز جەتكىزدىك. سوندىقتان پارلامەنتتەگى ساياسي ازشىلىقتىڭ نەگىزىن زاڭ جۇزىندە بەكىتۋ قاجەت، - دەدى توقاەۆ.

پرەزيدەنت ول ءۇشىن باسقا پارتيا وكىلدەرى پارلامەنتتەگى كەيبىر كوميتەتتەردىڭ توراعاسى لاۋازىمىن يەلەنە الاتىنداي جاعداي جاساۋ كەرەك ەكەنىن ايتتى.

پرەزيدەنتتىڭ ايتۋىنشا، بۇل بيلىكتىڭ زاڭ شىعارۋ تارماعىنداعى بالامالى قىزمەتتىڭ جۇيەلى جۇمىسىن قامتاماسىز ەتۋگە مۇمكىندىك بەرەدى.

Abai.kz

13 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2262
عيبىرات

قايسار رۋحتى عازيز جان

مۇحتار قۇل-مۇحاممەد 3553